[有沙入眼]是咁的，我覺得我住嗰度有啲唔妥: 164莫名嘅感動
當時嘅我，重新有翻活力同鬥志。
阿婆嘅情況愈嚟愈樂觀，醫生話啲癌細胞死得七七八八，有望年底之前出院。
屋企嘅積蓄勉強仲淨幾萬蚊，而持續兩年嘅抗癌路，亦喺聖誕節正式結束。
雖然阿婆仲係咁瘦，頭髮亦無可能好似以前生得咁濃密，但仍然可以陪住我地，咁就已經夠。
嗰年聖誕節，我地嘅大餐只係好簡單咁叫咗pizza hut嘅聖誕套餐。三舊水，對我地嚟講已經好奢侈。
不過一年先一次，再加上阿婆出院始終係值得慶祝嘅事，所以無所謂啦。
以前佢可以食到兩塊pizza，而家食一塊，飲埋碗湯就會飽。雖然去唔翻全盛時期嘅食量，但已經比治療期間好好多。
見到佢食得哂一塊pizza嘅時候，有種莫名嘅感動。