[有沙入眼]是咁的，我覺得我住嗰度有啲唔妥: 121下個

「哎呀阿媽，你餵到隻豬把口刁哂。」媽咪有時會抱怨阿婆整畀我食嘅野太好味。

我諗起《食神》入面嘅家燕姐話：「畀我食到碗咁好食嘅叉燒飯，我第日食唔翻點算呀？」

我都想話，畀我食到碗咁好食嘅紅豆沙，我第日食唔翻點算？

「嗰時養你咪又係咁養。」

我對媽咪嘅印象唔深，共同擁有嘅回憶亦唔多，因為佢同爸爸平日要翻工，所以將我交畀阿婆養，星期六日先會嚟探我。



「下個咪再養到佢咁嘴刁喇。」

「係係⋯⋯咩話？下個？」

媽咪笑笑口，無答到，而係抱起我，將我隻手放喺佢肚上面：「同細妹打招呼吖。」

生命嘅鼓動，好似血管之中有岩漿流動一樣。我理解唔到咩叫細妹，但見到慈祥微笑嘅我，都笑起上嚟。

細妹，係咪甜甜嚟架？