[有沙入眼]是咁的，我覺得我住嗰度有啲唔妥: 119紅豆沙

對每個人類嚟講，既係最快樂亦係沈得最深嘅記憶，莫過於嬰兒時期嘅日常生活。

「訓啦，訓醒食甜甜。」眼皮好重，清醒嘅時間唔長，醒一陣又要訓。

BB就好似知道，以後嘅日子都無機會想訓就訓，所以預支定自己訓教嘅份量同發夢嘅時間咁樣，沈睡⋯⋯沈睡。

「食野唔食呀？」到我睡眼惺忪咁伸懶腰嘅時候，床上嘅我已經長大咗，應該兩歲左右。

食呀，我要食甜甜。



「射，腰射呀。」

「食。」

「色？」

「食。」

「骰。」



「講多次，食。」

「射⋯⋯食！」

「食咩呀？」

「田田。」

「甜甜。」



「舔舔。」

「甜。甜。」

「田⋯⋯舔⋯⋯甜！甜甜！」

阿婆微笑，行入廚房，拎出一碗暗紅色嘅糖水。佢用匙羹攪拌，匹到鼻前：「嗯，好香。」然後遞去我面前。

粒粒紅色異物被匹起，又墮落到有啲傑嘅暗紅湯水入面。

第一次見到咁嘅甜甜。

「依個叫紅豆沙，好味架，啊。」阿婆幫我吹兩吹冒煙嘅紅豆沙，餵我食。

我拍手：「兜撒！」



「係紅，豆，沙。」又一羹餵入我個嘴仔度，我都未呑曬就擘大口，䟴吓䟴吓個身，又想食下一啖。

「叻仔叻仔，食多啲野先會快高長大架！嗱，呀。」

如果我識講多啲野，我想同你講：「唔係好味，係好好味。」