[有沙入眼]是咁的，我覺得我住嗰度有啲唔妥: 82卡住咗

避唔切嘅左手由搏頭直落到前臂嘅一條肉好似批蘋果皮咁被片出嚟。

火辣嘅痛楚由上而下蔓延，隨即喺大腦落地生根。

豬頭打側望向我，似乎理解唔到我點樣避得開佢快如閃電嘅直劈。

事實上，如果係第一次見到豬肉佬同佢把又大又重嘅屠刀，自然會覺得佢缺乏快速攻擊嘅靈活性。

如果咁諗，頭一刀就會分勝負，因為無人估到佢可以手起刀落得咁快。



慶幸嘅係啱啱全身劇痛嗰陣，我亦記翻起自己點樣畀豬肉佬斬死，於是將佢攻擊我嘅方位盡量記咗入腦。若然無記起被殺嘅經歷，又或者我無記住豬肉佬嘅攻擊模式，咁我個頭肯定會好似西瓜咁畀佢劈爛，爆哂啲果肉出嚟。

不過記得還記得，實際體驗嘅時候仍然覺得佢斬得太快太俐落，所以結果都係輸咗一片左手皮肉。

血靜靜喺我手指尖聚集。

依個時候豬肉佬背對Lucy，Lucy已經拉出消防喉⋯⋯卡住咗？

「屌！仆街喇！」