[有沙入眼]是咁的，我覺得我住嗰度有啲唔妥: 73提高難度

我用力㩒住頭部兩側，力度大到好似想扯哂啲頭髮落嚟咁。而我嘅四肢亦繼續體驗嘅分離撕裂嘅劇痛。

畀我死⋯⋯痛到我寧願死！我寧願死都唔想再受手手腳腳不停畀人斬斷嘅痛苦呀呀呀呀呀呀呀！！！！！

Lucy一邊將刀尖指住喺地吓好似臨死蚯蚓咁蠕動嘅我，一邊貼牆行去大門。

佢想出去！

「唔⋯⋯好呀⋯⋯」你個腦裝屎架？定個腦生喺屎忽度呀？啲臭味已經擺明係出面傳入嚟，你仲想出去？！



「對⋯⋯對唔住⋯⋯你啲行為實在太奇怪喇！我⋯⋯我真係信你唔到！」唔好呀！我都唔知點解啲臭味會突然激活咗我嘅痛覺同之前被斬件嘅記憶架嘛。

啱啱見到豬肉佬都無咁嘅反應，點解而家淨係聞到啲臭味就喚醒翻之前被殺嘅體驗？唔通係因爲我淨化咗兩個體驗，所以增加難度？唔會有錯架喇，試諗吓如果我喺外面突然全身劇痛，豬肉佬實可以即刻吊起我嚟肢解。

系統喚醒我嘅痛楚，係因為要提高逃生難度。

咔嚓。扭開門鎖嘅聲音。