[有沙入眼]是咁的，我覺得我住嗰度有啲唔妥: 49共鳴成功

我終於明白，點解吳非凡會對我個名，同「幫」字產生共鳴。我亦理解到，佢鑿牆嘅意義。

「你想鑿穿嘅，係人同人之間嘅牆。」吳非凡靜靜咁，點頭。佢潛意識中最深層嘅願望，就只係咁簡單。

「但已經唔需要喇。」吳非凡嘴邊勾起一個滿足嘅角度：「因為你每一次都會注視到，牆後面嘅我。」佢嘅表情，就彷如遙遠嘅昔日萬聖節之中，向媽媽講「trick or treat」嗰陣嘅微笑。

「Clear」電視現出完成淨化嘅英文字，與此同時，吳非凡嘅身體，亦由腳尖開始化為點點星火，猶如夏日草叢之中飄舞嘅螢火蟲，滲入虛無。

「阿金，你幫我通咗關，系統而家將我嘅意識登出緊，無時間喇，你留心聽我講。」吳非凡嘅消失速度好快，眨眼間已經無咗小腿。



「聽住，淨化就係直接面對畀系統扭曲成恐怖體驗嘅潛意識願望同記憶。戰勝恐懼好難，但你一定做得到。淨化之後系統就會還翻你原本嘅記憶畀你。」佢見下身完全消失，於是又快快口再講：「由而家開始，你千祈唔好死！如果唔係記憶又會清空，你唔會記得我講過嘅野，咁要通關就真係幾乎無可能架喇。」

喺一個走唔甩嘅空間面對一堆幽靈怪物，仲要唔死得，仲難過喺大陸爭取民主喎大佬！

「嗰項技術我已經幫你完成咗，你只要繼續完成共鳴同淨化就可以見翻佢。」得翻胸口以上。

「佢？」

吳非凡無視我嘅提問，因為佢已經得翻個頭仲未化為星光。



「只要你同人喺現實中有聯系，恐怖體驗就有機會重疊，好似你會見到我咁，你一定都會見翻佢！」

「佢係邊個？」睇嚟吳非凡已經聽唔到我講乜，亦無打算答我。