[有沙入眼]是咁的，我覺得我住嗰度有啲唔妥: 9哥哥

沖完涼出嚟，樓上條友仲鑿緊，我都係決定打電話落管理處投訴。

一拎起個手機，我又再一次莫名其妙咁覺得有啲可怕，唔通以前發過一啲有關電話嘅惡夢？

「咪咁痴線啦你。」我自言自語，拍一拍自己塊面，打咗電話落管理處。

「嘟嘟⋯⋯」

等咗一段時間都無人聽，唔通看更巡緊樓？



算啦咁，費事麻煩，我都係帶耳機聽歌訓算。

「哥哥⋯⋯」一陣氣若游絲嘅細路女聲音喺我戴起耳機之後鑽入耳窿。

我除低耳機，望咗兩眼，就喺我確定聲音來源同個耳機無關嘅時候，屋入面唔知邊度又再次傳出女聲：「哥哥⋯⋯嚟搵我吖。」

轉頭，靠啱啱嘅聲音辨清音源。

有人喺我屋企個衣櫃入面。



好喇，我一向做人嘅中指就係唔好撩鬼攞命，而家個衣櫃擺到明有啲奇怪野，我梗係死人冧樓都唔去望入面有乜啦。

細個嗰陣阿婆有講過，唔亂搞啲神怪野，人地都唔會搞你。

直到今日，我先知就算咩都唔做，都會無啦啦比佢地睇中。