[真人真事][校園][純愛]緣定·十年前: 第三十二章

要來的,始終都係要來
我地人類係阻唔到時間前進,
話咁快嗰個零星期已經完左,
唔知點解,
呢個零星期過得特別快
轉眼間已經到左八月三號,
八月三號嗰日朝早,
我一早去左呀雪屋企幫手拎野去機場,
事關喺尋晚呀雪問我可唔可以今朝去佢屋企(冇甜的)
話想見多啲,




我搵唔到拒絕嘅理由
所以就去左喇,
一入到去呀雪屋企,
就見到世伯同伯母,
今次係我第一次見世伯,
原本世伯同伯母一樣,
都係冇乜架子
我一入到去就係咁俾水,飮品我飮
好熱情
我想企起身幫手拎呀雪啲野出嚟嗰陣即刻叫我坐返低,




話佢地拎得喇
所以我上去剩係坐喺度陪呀雪傾計
搞到有啲唔好意思
之後我地出發去機場
伯母:「呀雪,丁仔你地坐巴士去啦,
我同世伯坐的士得喇 」
世伯:「我地後生都拍過拖嘅,
知你地想要多啲二人世界 」
世伯同伯母都算唔話得,
呀雪:「咁我地早啲出門喇,




你知巴士冇的士咁快.」
我:「拜拜世伯,拜拜伯母 」
呀雪:「拜拜爸爸,拜拜媽咪 」
世伯同伯母:「拜拜,你地小心呀 」

上到巴士,
我同呀雪講:「你爸爸媽媽真係好好人 」
呀雪:「嗯,佢地知我拍拖都冇反對,
媽咪仲話你好有禮貌 」
我:「吓,幾時嘅事 」
呀雪:「上次我地同佢食完飯之後 」
我:「咁你男朋友又真係幾好嘅 」
呀雪:「唔知醜 」
我:「我認真架喎 」
呀雪:「我都好認真 」




我:「咁我都係有一個好好嘅女朋友先想做一個好嘅男朋友嘅 」
呀雪:「把口你就叻 」
我:「真架 」
呀雪又面紅紅講:「嗯,知喇
不如我地呢程聽下歌,
好似上次旅行咁一人一邊 」
我:「好呀 」
之後我地就聽歌,
聽聽下呀雪合埋對眼訓左覺,
其實去到呢個位,
佢要走係必要嘅事,
對於佢個病而言,
去外國亦係最好嘅做法,
唔捨得都要接受





之後我地去到機場,
等左兩三個字就見到世伯同伯母,
世伯:「我地依家搞埋啲登機手續先,
你地坐喺度啦.」
我同呀雪又開始二人世界,
我:「呀雪,今次你一定要ko個病呀 」
呀雪:「其實我知你係好擔心
但你唔想我擔心所以先扮冇野.」
呀雪真係好了解我
咁都俾佢知道左
呀雪:「放心喎,一個月好快過姐 」
之後世伯同伯母返左嚟,
準備check in,
呢個時候呀雪俾左封信我,
呀雪:「應承我,返屋企先睇 」




我:「冇問題,不過點解嘅 」
呀雪:「返屋企先睇啦,
寫左好耐架 」
我:「好.」
然後佢地三個就準備行入去,
我就喺出面望住呀雪行入去,
呀雪都眼濕濕
估唔到佢都咁唔捨得
我大聲叫:「一個月姐,好快過 」
呀雪眼濕濕咁講:「我走喇,拜拜 」
我:「拜拜 」
就係咁,
呀雪就喺我眼前消失左,
一個月後再見啦,
本來我想喺巴士拆嚟睇,




不過呀雪話返屋企先睇就返屋企先睇啦

坐完巴士一返到屋企,
第一件事原本係打丁,
不過今日破例
要拆開封信睇先,
睇下呀雪寫咩比我
封信內容如下:
「男朋友:
我知你會返屋企先睇呢封信嘅,
今次好似係第一次寫信比你,
點解會寫信?
因為我好想喺臨走前將我地嘅野寫出嚟,
一直以嚟我都冇講過我對你嘅感覺,
今次我一次過講俾你知啦.

其實我初初嚟呢區嗰陣,
我係有少少唔開心架,
因為我同之前班朋友冇晒聯絡,
又驚唔適應新嘅學校,
不過為左個病冇辦法,
所以第一次踏入依家間中學,
心情有啲複雜,
好彩呢度啲同學好多都好友善,
我好快就適應左,
講到呢度,你記唔記得我地一開頭喺鬧交先架,
你個衰人,
問我係咪因為___(我估係指打丁)所以面青青,
你知唔知我嗰時幾驚因為呢個病而被同學嫌棄,
你仲喺度笑人,
原本我都好嬲架,
但見到你個衰人又想道歉又要面個樣好搞笑,
仲點嬲得落呢
之後見你唔識答問題,
坐你隔離梗係幫你啦,
之後你順便道歉,
我已經冇嬲喇,
但梗係要玩玩你啦,
咁多口,
所以咪扮未嬲完,
點知你真係咁愛面子,
算啦,
唔玩你喇,
就係咁就和好.

對你改觀應該係有一次成班人屈左你做壁報,
你喺lunch time自己做個壁報,
嗰下唔知點解覺得你好有責任感,
之後你又唔厭煩咁教我數學,
連返到去msn都仲肯幫我,
咁就覺得你其實係一個好好嘅人,
可能我地日頭見住夜晚又msn,
我對你可能真係日久生情,
但我係女仔嚟架嘛,
點會做主動姐,
點知你個傻仔又咁遲鈍,
我俾左咁多signal你都唔知,
燒野食又幫你燒埋,
唱k特登揀刻不容緩你又feel唔到,
情人節送埋朱古力俾你都仲未知,
不過你嗰晚攬住我真係好正,
凍到咁你都肯俾件羽絨我,
呢下令我更加鍾意你喇,
之後睇你踢波,
你真係好勁呀,
我又鍾意啲運動型嘅男仔,
咁自自然然更加鍾意你啦,
我知你有啲唔開心,
因為關鍵嗰球唔係你入,
但如果唔係你傳,
我地班可能已經輸左喇,
所以你都係好叻呀.

不過呢,
你個傻仔啲表白方式真係……
邊有人咁表白架,
唔知話你有創意好定係騎呢,
但係我又受喎,
因為真係等左你好耐.

講到呢度,
我首先要同你道歉,
因為我有一樣野呃左你,
其實我今次去外國唔係去一個月,
詳細留喺嗰邊留幾耐我都唔知,
可能留一年,
又可能留三年,
亦可能留五年,
甚至更耐都有可能,
原因係醫生話留喺嗰邊對個病會更加好,
方便定時檢查住同埋休養,
到我真係完全好返先會返返嚟香港,
但康復期肯定唔係幾個月唔少,
仲有一點,
我今次去做呢個手術,
有七成機會會失憶,
我唔想你唔開心,
亦唔想你等一個人等幾年,
而嗰個人到頭來可能已經唔記得晒啲野,
咁樣對你好唔公平
所以一直冇話你知,
希望你諒解啦,
我地拍左拖就嚟半年,
哩段日子我地冇鬧過交,
日日都咁開心,
已經好難得架喇,
多謝你俾左呢啲咁美妙嘅日子我,
你唔使擔心我喺嗰邊會唔適應,
因為喺嗰邊我有親戚喺度,
同埋媽咪都會過去陪我.

丁仔,你俾心機讀落去呀,
我知你好想會考之後升返原校,
你肯俾心機一定得嘅,
你又唔係蠢,
同埋呀,
有啲人會覺得你成日懶懶閒唔認真,
其實唔係呀,
你認真嗰陣一樣可以做得好好,
多啲俾人睇你認真嗰樣,
俾啲信心自己呀.

最後,
你仲差我一份生日禮物呀,
你話我要乜你都俾我架
唔好諗住走數呀,我記得架,
我依家諗到喇,
呢份生日禮物就係忘記我啦,
唔好將我放得咁重要,
我只係你生命嘅其中一個過客咋,
日後仲有好多路要行架,
你係eason粉絲,
想送佢嘅其中一首歌俾你做結尾,
希望你會接收呢份禮物,
呢首歌你一定識,
叫做<<活著多好>>,
好喇,
拜拜喇男朋友.
                                                永遠愛你的女朋友
                                                                      雪」