[真人真事][校園][純愛]緣定·十年前: 第十九章

第二朝好快就醒左,
諗起以往聖誕節都係一條友渡過,
今年算係一個幾大突破
雖然一陣都應該要唱Lonely Christmas
但以往係一個人喺屋企唱,
或者係打打下機對住班男人唱
而今年係喺k房同呀雪佢地唱
完全係兩回事,
咁我醒左之後就打丁啦,
打完丁就搵呀余打機,




呀余:「諗起一陣可以同呀婷唱k就覺得好興奮喇 」
我:「咁興奮去打下丁先囉 」
呀余:「頂你唔係嗰種興奮呀
估唔到我地四個會發展得咁快(指朋友嗰種關係).」
我:「都係呀,只係短短三個月到.」
呀余:「咁啦,大家一場老死,一陣識做嘅 」
我:「我都識做,放心 」
事關我地間唔中都會唱k,
但兩條男人唱k
好少會唱到啲男女合唱,




我地之前都有私底講過,
第日同到女仔唱k都應該幾有趣,
毒勁個心態就是這樣的,
今次仲要同各自有好感嘅女仔唱,
個感覺應該會好特別

打完機之後食埋晏晝就出,
由於我地四個住埋同一區,
於是就相約喺巴士站一齊出去,
準備出門嗰陣,




呀雪撥左個輪俾我,
我:「有屁就放 」
呀雪:「真係冇俾個假電話我喎 」
我:「似你咁無聊咩 」
呀雪:「呢句野出自你把口話我,
硬係唔多服 」
我:「得喇,你地出門未?」
呀雪:「我出門喇,呀婷平時都準時嘅 」
我:「咁一陣見啦,拜拜.」
呀雪:「拜拜喇無聊鬼 」
到左巴士站,
我就最早到,
之後離遠見到呀雪,
佢著左件大褸,
有條及膝裙加legging,




配一對啡色靴,
實在係超晒班
呀雪:「果然同上次一樣咁早到喎.」
我:「上次?」
呀雪:「運動會食早餐嗰次呀 」
我:「咁你都仲記得,你平時係咪唔用腦留嚟記呢啲野 」
呀雪:「你就唔用腦 」
我:「話時話,今日著得幾靚,加分 」
呀雪:「係咩,多謝丫 」
之後佢又頭耷耷咁笑,
冇幾耐呀婷又到左,
佢戴左頂聖誕帽,
其實都幾可愛,
不過都係覺得呀雪靚啲
呀婷:「你兩個咁早到嘅,唔通一齊嚟?」




呀雪:「唔係呀.」
呀婷:「講下笑姐.」
呀雪:「話時話呀余呢?」
我:「佢不嬲準時嘅,
唔知今日係咪打丁打遲左呢 」
呀雪:「打咩呀 」
我:「打機姐,冇野冇野 」
一講曹操,曹操就到,
呀余:「梳梳梳各位大佬.」
呀婷:「係我地早左到姐.」
之後我地坐巴士去mk喇,
我同呀余坐,
同呀雪呀婷坐,
而佢地坐我地前面,
呢個時候當然係我同呀余密密斟嘅時候




呀余:「呀婷戴左頂帽仲正過平時.」
我:「係幾可愛嘅.」
呀余:「呀雪都幾靚,
不過塊面有返多啲血色仲好睇 」
我:「睇左幾個月乜都慣啦 」
呀余:「估唔到我地聖誕終於有街出,
仲要同靚女去唱k 」
我:「上年今日我地仲喺屋企打緊機咋陰公 」
呀余:「不過一陣我地應該唔可以好似平時咁癲喇 」
點解呀余會咁講,
因為平時我地兩個去唱k嗰陣會成日大聲叫,
又會dum地撞門等等,
一陣有女仔喺度又點可以咁做呢
我:「係呀,唯有收斂啲啦,下次先再癲過.」
之後我地都戴耳機聽歌.





落車行左幾步就到k房,
拎左間大房,唔使咁逼,
咁跟住大家就揀歌啦,
之前都講過,
呀雪係鍾意聽Stephy,
自自然然佢就揀Stephy啦,
至於呀婷原來鍾意唱千嬅啲歌嘅
我就梗係揀Eason
呀余就百撘,
個個歌手都揀啲,
由於班女仔仲揀緊歌,
所以我同呀余就唱先,
第一首唔使問就梗係Lonely Christmas
應節嘛
咁過左幾分鍾唱完之後,
呀雪,呀婷o晒咀:「原來你唱歌都幾好聽 」
其實我自己就覺得自己唱歌麻麻地,
最多都係唔走音姐
講返正題,
之後呀余話:「聖誕節又點止淨係唱Lonely Christmas?」
我地三個:「咁唱乜 」
之後佢揀左首歌唱,
螢幕上顯示「聖誕結」
呀余你係得嘅
最好笑係呀雪同呀婷唔知咩歌嚟
一唱第一句呀雪同呀婷已經狂笑
呀婷:「原來係頭先嗰首嘅國語版.」
唱完之後,
呀雪,呀婷:「呀余都好好聽呀 」
我睇死呀余實扯晒旗
俾呀婷咁樣讚,
唱左幾首後呀雪同呀婷終於點完,
之後到呀雪唱藍孩子,
原來呀雪唱歌好勁
把聲去到好高音,
又冇走音,
我同呀余聽到o晒,
「如不敢親我　仍可高聲唱　愛歌」
佢唱埋哩句之後,
我同呀余即刻拍爛手掌
呀余:「好好聽 」
呀雪:「麻麻姐.」
我:「估唔到你唱歌咁好聽.」
呀雪:「我都估唔到你唱歌都咁好聽.」
之後到呀婷唱可惜我是水瓶座,
佢都係唱得之人,
把聲冇呀雪咁尖,但厚啲
我同呀余:「你都好勁 」
呀婷:「哈哈,多謝呀.」
靚女而唱歌又好聽喺我心目中會加分,
之後大家就繼續唱啦,
呀余好識做,
逢親有Stephy嘅合唱歌就讓俾我唱
就扮晒野話唔識唱
明明早幾日打機嗰陣仲唱緊好心好報
不過同有好感嘅女仔合唱又真係好特別
有少少緊張但又好期待,
好複雜,
佢識做時我亦識做
其他合唱歌就讓俾佢同呀婷唱
唱唱下,
隨機出左首刻不容緩,
之後呀雪笑笑口咁話:「丁仔一齊唱 」
大家都驚訝
原來呀雪係識唱Stephy以外嘅歌,
不過好奇怪,
呀雪唔止識唱Stephy以外嘅歌,
佢仲應該好熟刻不容緩呢首歌,
好多時都望左嚟我呢邊(我眼尾昅到)
我就唔係好熟呢首歌,
所以都係集中望住個螢幕
之後無謂野唔多講,
唱完之後都十一點要交房,
我地喺k房都食飽左,
所以就決定返屋企

我同呀余喺巴士度細細聲講,
一陣落到車都十一點十到,
不如陣間各自送女仔返屋企
佢送呀婷,我就送呀雪,
跟住再行慢啲,
咁咪可以搭正十二點同佢地渡過聖誕節
毒勁就是看重這些事情
我地亦夾晒口供一陣點講,
落到車果然真係十一點十
呀余:「都咁夜,不如送埋你地返屋企.」
我:「係囉,條街又凍.」
呀婷:「會唔會麻煩到你地呀......」
呀余:「唔麻煩
咁夜你地一個女仔行危險呀.」
呀婷:「咁好啦 」
就係咁,計劃就成功了,
我:「我同呀雪住近啲,我送佢啦,
你送呀婷啦 」
呀婷:「明白嘅.」
我,呀雪,呀余,呀婷:「拜拜.」
呀雪:「唔該晒丫.」
我:「成日都送架啦,使乜咁客氣 」
呀雪:「今日真係好凍.....」
呢個時候我見佢真係凍到青晒,
比平時更加蒼白,
我拿拿臨捉實佢隻手,
原來佢隻手凍到起冰咁滯
之後我就除左我件羽絨,用件羽絨搭住佢膊頭行,
嗰刻真係冇諗住抽水,
純粹想佢舒服啲,
呀雪:「你咁樣會凍病架 」
其實就真係好乸凍
不過冇計啦,要做威水
我:「小姐好似你仲凍過我喎,
呢段路好快姐.」
呀雪:「咁唔該丫.」
之後我送埋佢入大廈先走,
因為真係太凍,
咁我行返屋企嗰陣先醒起睇錶,
原來一早過左十二點,
唔記得講聖誕快樂,
就係咁,又晒左個機會

返到屋企開電腦,
見到呀雪msn留左訊息俾我,
呀雪:「啱啱唔該晒你丫
除左件羽絨俾我保暖,
下次我會著多啲衫架喇,
免得你好似今次咁捱凍,
今年係我第一次過平安夜過得咁開心,
以前好少咁夜出街架,
多謝你丫傻仔,
今日唔叫你做衰人啦,
聖誕快樂丫 」
我:「聖誕快樂.」
之後上左陣網就訓覺,
上到床仲回味緊今日嘅事,
同呀雪唱歌,
之後搭住佢膊頭行,
嗰下衝擊好大,
係第一次同親戚以外嘅女性有咁耐嘅身體接觸
仲要出於非抽水嘅心態,
嗰晚個腦諗左呀雪好耐,
睇嚟真係鍾意左佢了,
唔再係有好感嘅階段,
不過美中不足嘅係唔能夠親口講聖誕快樂
算啦,下年先補中啦,
當時嘅我係咁諗,
不過,世事嘅野又點會盡如人意呢.