[真人真事][校園][純愛]緣定·十年前: 第十七章

上回講到我同呀雪食完早餐,
咁食完之後就同佢一齊行去運動場
大約行左幾個字就到(個運動場係喺我地住個區),
一入到去就分社坐啦
我同呀雪,呀婷同社,
呀余就同我地唔同社,
不過話晒都已經讀到中四,
點會仲咁硬膠膠好似中一咁自己坐自己社
所以到最後呀余都坐左嚟我地度
咁之後就成班跑狗喺個場跑啦,




過程都冇咩好講,
之後我提議話不如我同呀余同呀雪佢地一齊食飯,
見係兄弟益你呀屎忽鬼
咁晏晝返去就跑二百米決賽(我地學校鍾意將啲決賽分兩日搞),
話說我地班就有隻跑得好快嘅狗
唔係講笑,
佢係乙組(學校將中五或以上歸納做甲組,而中三中四就係乙組,
中一中二係両組)跑步跑得最快嗰個嚟
所以我喺學校揸人丁呀,玩千年殺呀全部都唔會玩佢
貪佢仲唔夠快咩,




與此同時,
呢隻跑狗就係呀雪其中一隻狗公
有時會過嚟呃水吹呀,請佢食糖呀咁,
好彩最後啲糖都係歸我,
咁當佢跑二百米嗰陣,
一入直路已經抛離其他人,
跑狗即係跑狗
就喺佢即將衝過終點嗰陣,
我聽到呀雪細細聲同呀婷講左一句:「玩運動嘅男仔真係好型 」
之後呀婷話:「係呀 」




講完後佢兩個就好似發春咁喺度笑,
之後隻跑狗行返上嚟看台,
準備行返去佢個社,
咁當佢經過我地個社嗰陣,
呀雪竟然同佢講:「你好勁呀,跑得超快 」
呀婷:「真係好快!」
呀雪平時好少主動同其他人吹水,
咁跑狗見到佢女神竟然主動同佢吹水
梗係high爆啦,
佢個樣笑得衰到丫,成隻老虎狗咁
跑狗:「都唔係好快姐,哈哈.」
呀雪:「聽日仲有咩比賽?」
跑狗:「一百米決賽.」
呀雪&呀婷:「加油呀.」
跑狗:「好 」




之後跑狗就走左,
我:「嘩笑得衰到丫,跑狗真係跑狗,
連笑個樣都成隻狗咁 」
呀雪:「跑得快都要俾你鬧,慘 」
我:「狗同人跑梗係贏啦 」
呀雪:「得喇得喇,最快係你喇 」
我:「我廢事......」
呀雪:「你廢事拎晒啲牌搞到其他人冇得拎丫嘛 」
我:「醒喎.」
呀婷:「呀雪你又真係知佢想講乜喎 」
呀雪又面紅咁講:「佢日日都講幾十次,好難唔知 」
呀余:「咁點解我唔知 」
我:「咪再玩佢喇,佢又變胖虎喇.」
呀雪:「你先係胖虎 」





夜晚返到去,
喺床度有句野徘徊喺我個腦好耐,
嗰句就係呀雪講嗰句:「玩運動嘅男仔真係好型.」
「玩運動嘅男仔真係好型.」
「玩運動嘅男仔真係好型.」
我自問自己絕對唔係咩運動天才
跑步唔夠人快,
籃球排球羽毛球更加唔好講,
哩三樣要用手玩,
我對手冇力,
加上學校又有好多籃球,排球,羽毛球嘅高手,
好難威俾人睇,
唔係喎,
學校咁啱冇乜踢波高手
嚟嚟去去都係得一兩個




加上平時有玩開,
一於決定練呢樣
本身呀余都有踢開波,
於是第二日就同佢講:「呀婷尋日話覺得玩運動嘅男仔好型 」
呀余:「真係?」
事實上呀婷真係認同呀雪呢一句說話,
我冇吹水呀
我:「堅,遲啲班足就係我地天下 」
呀余:「到時仲唔做威水.」
我:「咁遲啲我地落街場練咯.」
呀余:「好 」
咁就說服到呀余陪我練波,
之後嗰日跑狗真係贏左一百米
咁兩日運動會就咁完左,
好懷念以前做中學生嗰陣




會為左一樣野就不斷去衝,
明知到頭來唔一定成功,
但都會出晒奶力去做,
而且,
為嘅只係少少野,
可能係暗自對女仔嘅承諾,
亦可能係對老師,屋企人嘅諾言,
甚至只係對朋友嘅一場牙骹戰,
依家真係冇晒呢啲動力,
或者要好老套講句,
呢一種就叫做青春,
各位巴打,
你地又有冇試過為左一個女仔嘅一句說話而去不斷衝呢?