[真人真事][校園][純愛]緣定·十年前: 第五章

我呢個時候都呆左一呆
因為我可以同一個我自己認為係靚女嘅女仔坐,
要知道我對上次同靚女坐係小六嘅事
都離晒罩嘅
之後我對住呀余笑一笑
而佢露出一副牙震震嘅樣
點解?
因為佢要同呀雪掉位,
而呀雪原本係坐喺好煩同好多口水嘅肥仔隔離
如今掉左位,即係呀余要同好煩同好多口水嘅肥仔坐




又好難怪佢咁淆嘅

之後呀雪坐左過嚟,
由於我已經變得唔擅長同陌生人溝通,
所以我同佢基本上冇乜野講,
最多都係間唔中昅一昅佢
毒男即係毒男,
近望之下,發現佢更加靚,
皮膚一流
但真係好似白得過分左少少




不過整體仍然係好迷人

之後小息嗰陣呀余一出班房就同我講:「你就好啦同靚女坐,我同個死肥仔坐真係不得了 」
我:「點不得了呀 」
呀余:「佢啲口水仲勁過我啲精,可以係咁噴冇停過 」
我:「咁你用返你啲精同佢鬥噴囉,唔淆呀 」
呀余:「食屎啦.」
我:「含啦.」
呀余:「如果我當初坐左邊,俾人調走嗰個係你呀.以後唔會再揀右邊 」
事後佢次次有左右揀佢都全部揀左邊




睇嚟嗰個好煩同好多口水嘅肥仔對佢有好深影響
呀余:「不過話時話,同靚女坐感覺點呀?我見你地好似好靜咁 」
我:「冇野講咪唔講.」
呀余:「唔好晒左個機會呀.」
我:「小息之後試下囉.」

講就咁講姐,
但冇話題又點同呀雪傾計呢?
所以諗諗下都係算數,
反正大把日子,唔急唔急,
但幾個字之後竟然係呀雪親口問我野,
呀雪:「我想問呢,呢個學校嘅中四係咪一定要出去外面食架 」
咁身為毒男嘅我,
同靚女第一次傾計梗係有少少緊張架啦
但又要不失霸氣喎




所以扮到懶係鎮定咁答:「唔使一定要出去食,你可以去小食部食,亦都可以帶飯喺班房食,你可以去樓下用微波爐叮,再唔係可以叫家長送嚟都得.」
呀雪:「唔該 」
我:「唔使,你以前間學校規定中四要出去外面食 」
呀雪:「係呀.」
我:「哦,原來係咁.」
就係咁,我同呀雪第一次嘅傾計就完左了

放學後,我同呀余行過其他班等埋朋友A,朋友B,朋友C一齊放學,
之後就行返屋企,
呀余不停訴苦:「個肥仔傻架 可以壓低把聲等老師聽唔到,然後再狂同我講野,
最傻嘅係佢仍然可以狂噴口水 」
朋友A,朋友B,朋友C笑到收唔到聲
我:「忍下啦,冇事嘅 」
呀余:「頂你啦,你同靚女坐梗係咁講架 」
朋友A:「邊個靚女?」




呀余:「我地班個插班生.」
朋友B:「我都收到風你嗰班有個插班生,原來係靚女嚟 」
朋友C:「真係好靚架丁仔?」
我:「唔錯架,眼大大又夠白.」
朋友A:「佢靚定呀瑩靚?」
我:「頂你又抽水 」

我好鍾意夜晚準備入睡嗰陣一個人喺張床度諗野(唔係甜野),
因為咁樣可以俾自己沉澱下
好奇怪嘅係,
嗰一晚我冇好似平時咁諗住呀瑩,
反而諗起呀雪,
諗緊同佢第一次傾計嗰一刻,
自此我就好記得我同呀雪第一次傾計嗰日係中四嘅開學日,
直至依家仲係銘記喺心入面,




不過當時嘅我仲係同自己講自己係鍾意呀瑩,
唔想自己亂諗野.