與你相遇好幸運

大家好我叫阿津，由於真名太難讀，所以個個都叫我呢個名。我係一間上水既中學讀緊中五。由於英文收左皮所以又要讀多次中五。呢個就係故事既開始......

我平時鐘意做咩？打機囉，上高登睇故囉。最近有個高登故都幾好睇嫁，講一個叫佳士因為係機緣巧合之下就去左異世界做魔法師啦。

另外又有一個叫西野七瀨既巴打作既無啦啦有兩條女同我一齊住都幾好睇。就咁樣睇睇下故，得閒同人打下lol就到左九月一日。

亦係我同佢相遇既果一日。

「起身啦，九月一日啦要翻學啦。」





一朝早我姨媽就叫我起身。無錯，係姨媽。你問我阿媽去左邊？翻工囉。由於父母都去左翻工既關係，所以就扔左比姨媽照顧。

簡單黎講即係一條寄生蟲。

「得啦。」

我打一個哈欠再伸一個靚懶腰就起身執床拎校服。換好衫就出左門。由於我地屋企無好似日本仔煮早餐一齊食既習慣，

所以我習慣同姨媽拎零用錢去樓下m記買17蚊芝士雞堡餐當早餐。





當我準備萬全只欠拎手機之際，姨媽就問我

「喂，你又拎電話呀？你上次比人收過幾次啦喎。」

無錯我學校係唔比帶手機，所以我都有幾次比學校沒收左手機。姨媽又話

「嗱，你又比人沒收手機我就叫你老母黎拎，我唔拎。」

我姨媽就係咁，好鐘意叫我阿爸阿媽幫我處理呢d事，就連家長日都要佢地去。但係我同我阿爸關係好差。





就好似聯邦軍同自護既關係咁，差在未拎RX-78出黎打鳩佢，唉屌無啦啦高達上身。

我嗯左一聲就出門口，姨媽都無眼睇表示繼續訓。

尋尋找找為何都找不到，為何有無盡孤苦的單數。聽到aga既一就代表左我黎到m記。

同靚靚既m記姐姐買左個17蚊芝士雞堡餐就起程翻學。

翻學有兩條路，一條就係經運動場，一條就係經奕翠園。奕翠園果條路兩邊都有好多樹遮蔭，

而且因為果邊近大陸邊境所以都好少污染，最多有幾架車經過下。所以多數我翻學都好鐘意行果邊，而且又有風景睇，簡直係一件賞心樂事。

話咁快就到左我間學校，唉又要認識新既同學。身為一個毒撚其實又係一件幾痛苦既事黎。