失戀200天後,我遇上的女孩們: 第十一話

「你聖誕節打算點過?」兩個女人,唔同時間,唔同地方,卻問上同一條問題。
我曾經係度講過,無論單身定拍緊拖,大時大節都係一個字:煩!而當你有兩個女人問你點過時,就係煩煩!
「睇戲掛...」我用同一個答案膚衍佢地...
「咩戲呀?」換來同一既問題...
「星球大戰。」我估佢地對依啲片應該無興趣...
「你訂左飛喇?我都想睇啊。」我有懷疑佢地係識同一早夾定既,不過無證據咁解...
「我約左同事啊,阿明呢...」對唔住,阿明,要你犧牲個聖誕節喇...
「洲際酒店自助餐兩位,一打粉紅色玫瑰,仲有咩呢?啊!訂埋房丫唔該!」以上係阿明既條件...
仆街!我好少講粗口但今次我真係真心咁鬧自己...
老實講,有時真佩服啲人一腳踏兩船,錢就唔洗講啦,又要預埋啲節日呢日陪邊個果日陪邊個,諗起都頭痛。




「我想提你呢...聖誕節假係有三日既...搞掂左一日,咁剩底兩日你點呢?」
「係喎,橫掂都係死,咁即係唔使你都得啫,慳返!」
「孤寒種!無錢就唔好學人一腳踏兩船!」
唉...其實我自己都唔想,唔係我俾藉口自己,如果感情係以相處時間計既,無疑Mandy比Tracy有優勢,但可惜感情無數計。每次見到Tracy總覺得佢有啲憂傷,唔忍心傷害佢,好想保護佢,而Mandy俾人既感覺就好獨立,而依種獨立卻吸引著我,但當我地一齊時,佢又可以小鳥依人咁。可以既話,兩個我都唔想傷害,如果一定要有人受傷既話,我寧願自己受傷我都唔會去傷害任何人。
「你唔係約左阿明咩?」Mandy同我操完拳,落左車準備行返屋企。
「咁佢有女嘛!聖誕節梗係陪女朋友啦,你話係唔係?」
「嗯...」見到佢既微笑,頓時甜在心...
「我請你食雪條丫,特價啊。」行過便利店,佢突然同我講。
「冬天食雪條?咁晚食你唔驚肥咩?」
「一枝半枝唔驚喇,要肥咪一齊肥囉!你食咩味?」




「我食...」
「我食抺茶,你食紅豆喇!去俾錢喇!」咁你問我來做咩?
睇住佢食雪條...由於雪條既形狀加上佢食既動作同表情,好難唔令我有瑕想...
「做咩唔食呀?溶喇...」
「吓?哦...」
唔知你地有無食過隻阿波羅雪條前端藏有煉奶果隻,而當佢咬斷前端既時候(唔知點解好似有啲痛既感覺),白色液體由佢嘴邊一絲絲拉出,令我不禁回想睇過既日本愛情動作片...
「做咩?呆左既?諗咩呀你?」
「吓?無野呀,無諗野,你...你小心啲啦...」
「嗯,我知你諗咩喇,嘿嘿...」
「無,無諗果啲野...行喇,返屋企喇,污糟貓!」




「喵~」我用手指公抺走佢嘴角既白色液體...
「咁呀,咁好喇...」Tracy好失望咁同我講,「平時已經咁少見...」
係度講下我既時間分配先,由於Mandy住我附近加上泰拳班關係,所以一至五我同佢都返工放工日日見;到左星期六日,我就呃Mandy出去睇波同Tracy見面。
「無辦法喇,你平時咁夜放工...」順帶一提,Tracy而家係投資銀行做野,八點收到工已經好感恩。
只要佢說服到佢,咁聖誕節就煩少樣野,但...佢用楚楚可憐既眼神望住我,半開合既嘴唇令其樣子更加性感。我相信依一刻無一個正常男人可以低擋依個眼神攻勢(有既請介紹我識),但我要堅守要心腸硬起來我要...
「依個係我地第一個一齊既聖誕節...」
「唔...其實...聖誕節...」
「吓?」
「其實聖誕節有三日既...25號唔得,仲有26,27嘛...」我屈服,屈服係佢既可憐加性感樣度,以前有「牡丹花下死,做鬼也風流」,今日有「Tracy腿下死,阿Jack也風流」。
「真嫁?好野!錫返先!繼續行咯!」佢蹦蹦跳咁撓住我隻手,十足細路女咁,好難想像兩個月前既佢係個cool到爆既型女(而家個頭都染返深色)。
「睇下...」佢指住隻情侶表,我一睇個價錢...
「你想要咩?」廢話,唔係叫你睇咩!
「其實有你陪就足夠喇,不過我想有啲情侶野...無都無所謂,嘻嘻...」我講過女人係鍾意講反話既動物...
「好喇,咁當聖誕禮物囉...」
「好啊!」




俾Tracy提一提,我都未決定買咩俾Mandy添!
「你送咩我都鍾意嫁喇!」假如Mandy淨係講呢句,我會開心到彈起來,但...
「不過我想你三日都陪我喎!」
我既聖誕計劃遇上左阻滯...