失戀200天後,我遇上的女孩們: 第三話
星期六,對毒L既我來講同平時差唔多,係多半日俾我行街行下書局,跟住返屋企食飯。係分手前既星期六,放工後我會去佢屋企等佢沖完涼化好妝,跟住去經常去既茶餐廳食飯,跟住行去朗豪坊行街,而果條長電梯就係我地...
咦?做咩又諗返舊時啲野既?始終...
今日橫掂無咩做,於是放工就去中環果頭行下,順便今晚去老蘭會合Eric。今朝上網知道PMQ有live band表演,於是走去湊下熱鬧。之前都有去過依度,感覺有啲似外國既市集,加上今日天氣唔錯,坐係長櫈吹下微風,成個人都舒服晒。
去到表演場地,雖然人唔多,但氣氛還好,我睇下佈版,原來表演緊既係一隊新晉唱作組合,叫S.K.Y,由兩女一男組成。歌既曲風屬於輕鬆及田園風格,主音叫Stella,一頭烏黑長髮,瘦削高挑身材,五官端正但樣子唔算特出。而深刻既係佢唱Beyond既「喜歡你」,佢唔似某女歌手咁演其唱功,而係唱出個感覺,當然佢把聲亦好好聽。老實講,都有啲妒忌個男成員可以左擁右抱,因為另一個女成員Yuki都幾可愛同靚女。
「喜歡你~那雙眼動人~笑聲更迷人~
願再可~輕撫你~那可愛面容~挽手說夢話~
像昨天~你共我~」
睇完表演,到附近食左啲野,大約九點十點就去到老蘭S Bar。可能真係早左來,人唔算太多,嗌左支啤酒就企係吧枱附近等Eric。環視四周,我被一個坐係吧枱既女人所吸引。佢身穿黑色絲質吊帶連身裙,紅色高踭鞋,黑色絲襪藏著修長美腿,褐色及腰長髮,紅唇襯上白裡透紅臉孔,顯得冷豔無比,繞在頸既絲巾填補左頸既空洞感。佢撓著腳,身挨著吧枱,拎起酒柸淺嚐一口雞尾酒,跟住將柸裡既櫻桃慢慢放在口中,手轉動竹籤令櫻桃在舌上轉動,品嚐,此刻相信場內所有狗公(包括我)都目不轉睛望住佢。
其中一隻著西裝手帶名牌鋼錶既狗公已上前搭訕...
「小姐,我好似係邊度見過你?」老套既開場白,不過,呢句係我既設計對白(基本上我係聽唔到佢地講咩...)
而家淨係見到個男人自說自笑(我覺得似苦笑),靚女只係間中報以微笑,有時把玩枱上既雞尾酒柸,有時望住酒櫃上既酒,彷彿沈醉係自己既世界入面。過左陣,女士示意行開陣(應該去廁所),待女士走開左,然而男既有所動作。
落藥?雖然我睇唔清楚,但肯肯定條友將一啲粉倒落柸野度。
其實人地搵食我唔應該多管閒事既(而且唔知條友咩料,黑底既咪死...),但果刻唔知係唔係正義聯盟上身,追左上去準備去廁所既靚女度...
「小姐...小姐...我知你唔識我,但想話你聽頭先條友係你柸野落左料,希望你小心啲啫...」
佢無出聲,只係回頭點一點頭,一個微笑,就行入廁所,留下一陣好似冰既香水味...
始終我都係唔放心,所以我係廁所附近守候,正當我計劃緊要點做時,一陣啱啱聞過既香水味傳來,但陣味係來自一個身穿牛仔褸,牛仔裙,綠色波鞋頭帶cap帽,揹住紫色outdoor背包既女仔。
一定係佢!佢一定係頭先個女人!我帶住呢個信念跟住個女仔,雖然我唔知為咩要跟住佢,但我雙腳已不自控咁隨佢步出酒吧。大約跟左一個街口左右,佢轉入左另一間酒吧度,然而我正想入去時,卻被門口既職員攔住。
「先生,唔好意思,我地依度只招待會員。」
聽到「會員」兩個字,我就聯想到極高級既野,我抬頭望個招牌,「Les Pub」,我知道我點都做唔到「會員」,除非去醫院做一個手術,但我絕對唔須要。
「係邊呀?」手機傳來Whatapp訊息,係Eric。
「我到左,來join你。」於是我就行返去S Bar,就係門口見到Eric同佢啲朋友。
「Hey,Jack,介紹返先,呢個Peter上次見過喇,呢個阿Sam,呢度幾間吧都有佢份...」
「Nice to meet you!」眼看呢個阿Sam,應該係啲贏在起跑線既有錢仔,睇佢青靚白淨,身上傳來Polo古龍水味,完全睇唔出佢曾經捱過既痕跡...
「至於呢個...喂!應該係你助手定女呀?」Eric問阿Sam佢身邊既金色短髮女仔係咩關係。
「唔通仔咩?問埋啲廢話題!呢個Tracy...」Sam講完就隨即把手搭上Tracy膊頭,以意佢地既關係...
「Nice to meet you!」Tracy同我握完手後,雙眼卻刻意迴避我視線,我知道我地應該見過,但而家依個情況無可能追問落去,更何況依度係老蘭...
「今日你好彩,Peter帶左支好野,來啦,入去先啦!」
原來Eric講既好野係威士忌,講真呢樣野我真唔在行,咩泥煤味煙燻味,咩質感,對我來講都係好難入口既酒,但為左唔好掃佢地興,只好勉強飲落去。佢地三個邊飲邊講笑,而Tracy則坐左一邊,一時飲酒,一時玩手機。
飲到咁上下,人有三急,走去廁所交水費。交完水費,出左廁所經過後門,就聽到有人好似係電話度嗌交,本來唔關我事,但把女聲講左句:「攬住一個唔鍾意我既人,比起攬住一個我唔鍾意既,仲辛苦...」
呢句話我曾經對自己講過,就係我分手後想復合攬住佢果時所感受到...
正當我沈思之際,聲音既主人就由後門入來,係Tracy,佢見到我當堂愕左一愕,表情就好似講「你點解係度?」,跟住無出聲係我身邊擦過。返到位,阿Sam已經走左,剩低Peter同Eric係度,而Tracy則係吧枱果邊自己飲酒。與此同時,我見到頭先落藥條友想行過Tracy到似乎有所企圖,果一刻有啲擔心Tracy,於是我行去佢身邊,希望條友知難而退,點知佢第一句竟然同我講:「你係唔係想同我做呀?」