女神話我考試排名高過佢 就滿足我一個願望: 第四十九章

今日係嚟到日本嘅第四日，聽日就係走嘅日子。

今日我冇揾曉琳，曉琳亦都冇揾我。

我唔知曉琳去咗邊，呢排佢收收埋埋乜都唔同我講。

其實諗返轉頭，我都唔係好了解曉琳。

佢每次都知道我想要咩，但係我永遠都唔知佢真正想要嘅野。





曉琳係咪已經開始厭倦呢種情況啦？

因為我從來都冇理過佢真正嘅感受，所以佢唔想繼續呢段關係？

我地之間，係咪已經無法挽救啦……

再諗返轉頭，大部分出嚟拍拖嘅時間日子地點都係曉琳去定，得節日同佢生日嗰陣先係我諗。

佢為我付出咗咁多，我又為佢做咗啲乜野？





為咗令我勤奮學習，同我打賭。

喺我扮窮嗰陣，得佢冇厭棄我。

為咗令我冇咁易遲到，日日嚟我屋企叫醒我。

喺我頹廢嗰陣，係佢令我振作。

佢估到我唔會記得幫雪彤買生日，所以特登幫我買埋。





但係我……

又為佢做過咩……

只係平時傾下計，生日送下禮物，咁就係我為佢做過嘅野？

可能由一開始，曉琳就冇鐘意過我。

佢只係咁啱坐我隔離，對嗰陣時嘅我有新鮮感。

我好亂呀老豆……

如果你仲在生嘅話，應該可以俾多啲意見我……

我無力地挨喺牆到，一直喺到思考，直到食晚餐嗰陣先被飢餓感喚醒。





好是但咁食完一餐飯之後，我就渾渾噩噩咁繼續挨喺牆到。

我呆望住曉琳嘅whatsapp icon，係我地之前嘅合照。

「曉琳……」我自言自語。
------------------------------
開始踏入結局篇啦，
大約會喺第五十三章完故。
可能有外傳。