女神話我考試排名高過佢 就滿足我一個願望: 第二十二章-----決定
「喂！屌你快啲起身啦！遲到啦！」方野吉把聲喺我耳邊響起。
我望一望手機。
「而家七點半咋，洗唔洗咁趕呀......」我睡眼惺忪地説。
「大佬呀，我地呢到返學校最快都要半粒鐘呀。」方野吉説。
「我屌你唔早講！」我即刻起咗身。
梳洗完之後，我呆住咁望住枱上面果兩杯杯麵。
「早......早餐食杯麵？」我問。
「冇計，我懶得煮早餐。」方野吉説。
食完所謂嘅「早餐」之後，我同方野吉一齊行返學校。
「喂，聽講林浩雪同曉琳bb分咗手喎。」
「你邊到聽返嚟㗎？」
「有人同我講嘅。」
「如果係真嘅話就好啦，我地又有機會啦！」
「喂喂，佢地係咪講緊你呀？」方野吉問。
「唔知喎。」我強顏歡笑。
點解會有人知......
係咪曉琳講㗎......
上到三樓，我同方野吉分道揚鑣。
入到班房，照舊成班男仔都圍住曉琳。
不過今次曉琳見到我之後都繼續同班男仔傾計，班男仔都冇散去。
我亦都冇權利再干擾。
唯有行去張家樂果邊傾陣計先啦。
「喂！林浩雪！」張瑜叫停咗我。
「咩事？」我問。
「你搞咩？」張瑜問。
「乜野搞咩呀？」我問。
「琴晚曉琳喊住咁打電話俾我，話你要同佢分手呀！」張瑜説。
咩話？
我要同曉琳分手？
天大嘅笑話呀！
「佢真係咁樣同你講？」我問。
「係呀。」張瑜説。
「我估唔到......原來佢係啲咁嘅人。」我説。
冇等張瑜回應，我就已經行咗去張家樂果邊。
「呀雪，你冇野丫嘛？」張家樂問。
「你地都知道哂？」我問。
「琴晚曉琳喊住咁打電話過嚟，話你要同佢分手喎。」王銘然説。
曉琳......
「咁你地又點睇？」我問。
「我地呢，就唔信嘅，不過想問下你啫。」王銘然説。
我用手機開咗我同曉琳嘅對話，搋咗俾佢地睇。
佢地睇完之後都沉默。
「而家你地又點睇？」我問。
「如果係真嘅話，咁點解.......曉琳要咁做？」張家樂説。
「who knows?」我説。
又一次沉默。
「可能有啲誤會呢，曉琳老豆好憎窮人㗎，可能係佢逼曉琳呢。」王銘然嘗試幫曉琳揾籍口。
「就算真係咁，點解曉琳要同班男仔咁親近？」我問。
再一次沉默。
「各位同學返埋位啦。」Miss.Wong啱啱好入咗嚟。
我一坐返埋位，曉琳就係條頸到除返「月」之戒俾我。
我呆呆咁望住「月」之戒。
「林浩雪同學，你做乜攞隻戒指出嚟呀？快啲收好佢，等間俾人沒收㗎啦！」Miss.Wong説。
我即刻收好「月」之戒。
就係咁，我同曉琳就完結咗兩日嘅戀情。
一切，都好似一個夢，
但係，一切都係真嘅。
再見，亦如同陌路人。
三個月後，我望住我眼前嘅試卷，狠心下咗一個決定。
我所有嘅試卷都冇寫上任何答案。
既然我同曉琳都唔會再傾計，我入A班仲有乜意義。
我知道，當我做出呢個決定嗰陣，好多老師都會過嚟問候我。
但係我真係唔想再見到曉琳。
果然，考完試之後兩日，有教我嘅老師都聯合約我見面。
基本上都係同一個問題。
「林浩雪同學，點解你冇做過份卷？」
「我唔想做。」呢個就係我嘅答覆。
「原因？」啲老師煩到成條撚樣咁。
「冇原因。」我説。
其中一個老師歎咗口氣，佢係教我數學嘅洪老師。
「你真係唔後悔？你下年會讀4D㗎喎。」洪老師説。
「我已經決定。」我説。
啲老師見勸唔郁我，就俾我上返去。
唉......難得真心鐘意一個人，結果原來我俾人玩。
曉琳喺同我分手之後一個禮拜，就已經揾到多個男朋友。
好快佢地就散咗，然後曉琳再揾一個，再散再揾。
感覺上，佢就好似玩弄緊所有男人嘅感情。
我而家只係希望，岳希晨唔會俾曉琳迷上。
話哂佢都係雪彤男朋友。
已經預知自己下年會入4D班嘅我，喺班上冇再同張家樂佢地講野。
張瑜由我同曉琳分手嗰刻就以不屑嘅眼神望住我，睇嚟佢信哂曉琳。
----第三人稱開始----
時間返到去林浩雪同陳曉琳分手嗰一日。
岳希晨望住前幾日仲喺到打情罵悄嘅林浩雪同埋陳曉琳，今日異常地安靜。
好多人都知道岳希晨識讀心術，但係冇人知佢真正嘅能力。
為咗知道呢對小情侣點解變成咁，岳希晨足足用咗三個月先得知故事嘅前因後果。
結果，佢喺陳曉琳身上發現咗個秘密。
佢約咗陳曉琳今日放學之後落小食部，陳曉琳爽快應承咗。
放學之後，岳希晨執完書包就落咗去小食部，佢見到陳曉琳已經坐喺張櫈到等佢。
「點呀岳希晨，做乜約我落嚟呀？想同我表白呀，但係你唔係已經有林雪彤咩？」陳曉琳以妖艷的聲線説。
「陳曉琳，你真係變咗好多呀。定係我應該叫你做，陳曉晴呢？」岳希晨説。
陳曉晴臉色明顯變咗。
「你......你講緊乜野？我唔係幾明。」陳曉晴緊張地説。
「唔好喺我面前扮野，從來都冇人可以呃到我！」岳希晨説。
陳曉晴知道自己已經穿煲，就將所有野都講哂出嚟。
岳希晨靜靜地聽哂成個故事，面上連一絲起伏都冇。
「咁你之後唸住點？繼續你而家做緊嘅野，破壞陳曉琳喺林浩雪心入面嘅形象，直到畢業？」岳希晨問。
「中四嗰陣，所有事情就會解決。」陳曉晴歎了口氣説。
「值得咩？」岳希晨問。
「為咗佢，值得。」陳曉晴堅定地説。
「你話，如果我將所有野都同林浩雪講，咁件事，又會點發展呢？」岳希晨笑了一笑。
「你夠膽？」陳曉晴怒道。
「點解唔夠？勸你地一句，唔好對林浩雪玩到咁盡，遲啲你地就會後悔㗎啦。」岳希晨説。
「以我地陳家嘅勢力，有乜野我地惹唔起？」陳曉晴説。
岳希晨冇答佢，手上把玩住一個戒指，直接走咗。
隻戒指，刻住一個風嘅圖案。
陳曉晴返到屋企之後，同佢呀爸講返今日嘅事。
「呀爸，你點睇？」陳曉晴問。
「可能佢亂講啫，不嬲都冇人夠膽得罪我地陳家。你返上房先啦。」陳曉晴呀爸説。
「知道。」陳曉晴説。
入房之前，陳曉晴照舊望住隔離俾鐵鍊鎖住嘅房。
陳曉晴已經好耐冇見過佢家姐，佢好想打開道門見佢一面，但係佢知道唔得。
「家姐，再忍耐一陣，件事好快就解決㗎啦。」陳曉晴輕聲説。
陳曉晴家姐好似聽到佢呢句説話，不停咁拍擊門。
----第三人稱結束----
--------------------
話説喺不經不覺間，
最多留言排名榜我居然排第十，
認真嚇親。
究竟我幾時先可以一日一更......