森林裏面遇見你: 十二
嘉欣成個月都冇聲冇氣。
雖然佢唔係第一次唔睬我，但從未試過好似今次咁，成個月連一粒字都冇，而且我畀佢嗰啲訊息全部都係得一個剔，好似連電話都冇開。
我靈機一動，走去書櫃左摷右摷，摷咗中學畢業嘅時候我有份整嗰本記念刊出嚟。揭去嘉欣嗰版，上面果然有佢屋企嘅電話號碼。
電話打通。接聽嘅係Anna。
「喂。」
「Anna，我係家俊呀，即係之前上嚟探嘉欣嗰個……」
「哦！係你？」
「係呀，請問嘉欣喺唔喺度？」
「佢唔知去咗邊呀！」
「佢出咗街？」
「佢唔見咗！」
「吓？」
「嗰日佢話去游水，之後就冇返過嚟，我地以為佢去樓下個泳池游水，但救生員話冇見過佢。」
「係幾時嘅事？」
「上個月喇。」
「咁耐？」
「先生太太報咗警，但咩消息都冇。」
「佢有冇話同邊個去游水？」
「冇呀，佢通常一個人落樓下游水。」
「咁佢平時同啲咩人有聯絡㗎？」
「先生太太去佢之前做嘢間琴行問過，冇人見過佢。我話畀佢地知幾個月前有個男仔嚟過探佢，但我唔記得你叫咩名，又唔知點聯絡你。佢有冇搵過你？」
「冇呀，佢成個月都冇覆我啲message。」
「連你都搵唔到佢，真係唔知邊個可以搵到佢。」
「或者我搵下佢啲舊同學，睇下有冇消息啦。」
「好。」
收線之後，我再揭開記念刊，打畀幾個讀書嗰時同嘉欣比較熟嘅同學。
其實我知道嘉欣好少同啲舊同學聯絡，但只要有機會揾到佢，我都要試下。
不出所料，佢地對於嘉欣失蹤覺得好驚訝，又話已經好多年冇見佢。
我再打畀Anna，約佢見面。
星期日上晝十一點正，我坐喺馬爾代夫餐廳等Anna。
十一點零二分，Anna拉住個篋入嚟。
「你去邊呀？」我問。
「我走喇。先生太太冇同我續約。」
「咁你會去邊？」
「我個新老闆住喺北角，但我會返菲律賓探下屋企人先。」
「好彩喺你走之前見到你。我想問下，嘉欣失蹤之前有冇咩特別嘅事發生？」
「冇喎。同平時一樣。」
「有冇同阿爸阿媽嗌交？」
「冇。」
「咁你可唔可以話畀我知嘉欣失蹤之前做過嘅每一件事？」
「冇乜特別喎，都係同平時一樣。」
「就算冇乜特別都唔該你話畀我知。可能你會覺得我好煩，但我好需要知道。」
「嗰日……佢都係十二點幾起身……入廁所……跟住出嚟食飯……」
「食飯嗰時有冇講嘢？」
「應該冇……」
「食完飯呢？」
「應該入咗房……冇幾耐就出嚟同先生太太講去游水……」
「佢著住咩衫？拎咗咩出去？」
「我洗緊碗睇唔到……」
「咁你地之後有冇發現字條或者遺書之類嘅嘢？」
「冇呀。先生開埋佢部電腦嚟睇，但入面咩都冇。」
「咩都冇？」
「先生係咁講。佢話部電腦好似新買返嚟咁。」
我記得嘉欣將佢細個啲相同舊年去行山影嘅相擺晒喺C Drive，佢地冇理由搵唔到，除非嘉欣喺失蹤之前已經洗晒。
「佢床下底嗰啲舊玩具仲喺唔喺度？」我問。
「冇晒啦，前排佢揀咗啲新淨嘅公仔同玩具出嚟捐畀人，其餘嗰啲就叫我幫佢掉。」
我個心沈咗一下。
聽到呢度，已經心中有數。
食完嘢之後，我陪Anna行去大圍站。
「你會留喺菲律賓幾耐？」我問。
「兩個禮拜。」
「咁都好吖，可以探下個仔。」
Anna苦笑。
「做咩呀？唔係應該開心咩？」我問。
「係嘅，不過……」Anna望住遠處嘅車站，「我唔識佢，佢又唔識我……不過我好幸福㗎喇，起碼仲有個仔。先生太太連唯一嘅女都冇埋，好慘。」
「佢地而家點呀？」
「好唔開心呀，食又食唔落，瞓又瞓唔著。我想繼續幫佢地手㗎，不過佢地話唔使。呢排佢地成日做家務，可能有啲嘢做下日子易過啲啦。太太而家仲開始煮飯，佢煮啲嘢好難食，不過我諗佢地而家食咩都冇味。」
送咗Anna去車站之後，我唔知去邊好，又唔想返屋企。
我一口氣跑咗上望夫石。
星期一，我如常喺七點九起身，如常刷牙洗面剃鬚，如常換上裇衫西褲，如常喺八點三出門口，但冇如常返工。我打電話返去話屋企有急事，請假一日。
我搭車去北潭涌。我想行返同嘉欣一齊行過嘅路，想喺呢個遠離塵囂嘅地方，俾裏面嘅情感盡情傾瀉。
行到大浪西灣，我見到一班後生仔著住印有「山社」字樣嘅T裇，面對面排成兩行，喺度玩集體遊戲。我唔知佢地玩緊乜，總之就歡天喜地。
我搵咗一個冇人嘅位置坐低。
呢日陽光燦爛，天空一滴雲都冇，微風將海水嘅生命力吹送過嚟。我合埋眼，將手插喺溫暖柔軟嘅沙入面，幻想自己捉住嘉欣隻手。
我記起嘉欣挨喺我身上面嘅感覺，甚至隱隱聞到嘉欣頭髮上面嘅淡淡幽香，我全神貫注，怕一個唔留神，香氣就會消散喺四周嘅空氣之中。偏偏喺呢個時候，一陣不近人情嘅風喺我身上擦過，將香氣連同嘉欣嘅氣息完全吹散。
空蕩蕩嘅感覺令我不自覺咁喊起嚟。
我感覺到身體入面僅餘嘅水份不斷被抽上眼，成為淚水。淚水滋潤俾太陽曬到乾裂嘅皮膚，然後又俾太陽蒸發，留底痛澀嘅淚痕。
我從未試過喺大庭廣眾之下流眼淚，但有咩所謂？佢地沈醉喺歡樂之中，跟本冇發現我嘅存在，更加唔會留意我做緊乜。我同佢地屬於兩個唔同嘅世界。我係一個幽靈，只有我見到佢地，佢地唔會見到我。佢地年輕、純真、無憂無慮，而我，已經永遠失去青春同歡樂。
沙灘嘅另一邊，有兩母子坐咗喺蓆上面，仔仔大約兩歲，嬌嗲咁伏喺媽媽身上，又用塊面摩擦媽媽嘅大脾，媽媽就一邊睇書一邊撫摸佢柔軟幼嫩嘅頭髮。
冇幾耐之後，有兩父女由海邊走向佢地。囡囡大約四歲，喺高大健碩嘅爸爸身邊顯得更加幼小。囡囡喺媽媽手上接過水樽，飲咗兩啖，然後又拉住爸爸隻手走去海邊。
佢地停留喺海水啱啱浸過囡囡大脾嘅地方，囡囡用手將水潑向爸爸，爸爸就扮跌喺水入面，然後突然跳起將水撥到佢身上，搞到佢呱呱大叫。就喺呢個時候，一個大浪湧埋嚟，爸爸即刻掅起佢等佢跳過個浪，佢興奮到尖叫。
呢邊廂，仔仔企起身，喺媽媽嘅注視下論論盡盡咁行咗兩步，然後停喺度，望住媽媽儍笑。有兩個少女行過，覺得佢好可愛，同佢玩咗一陣，又同佢影相。
我受唔住，起身離開呢個快樂得令人傷感，美麗得近乎殘忍嘅地方。
我行上山，由大路轉入小路，再走上山坡，穿過叢林，之後又係小路、山坡、叢林……最後已經唔知自己喺邊。我隱隱聽到海浪聲，於是向住聲音嚟嘅方向走，最後行咗落一個海灘。
又係大浪西灣。
我喺士多買咗一份腿蛋治同一枝可樂，一陣狼吞虎嚥之後，就成身軟晒咁攤喺沙上面，連郁一隻指嘅力都冇，好似將會死喺度。我有啲迷糊，好似瞓著咗，又好似清醒；忽然覺得自己喺夢入面，忽然又覺得眼前事物真實得可怕。
坐返起身嘅時候，我發現自己仍然生存。太陽已經落山，沙灘上面得返好少人。
望住海中間嘅小島，我諗記嘉欣話想游過去。
游水？冇錯，嘉欣話去游水。
我企起身，慢慢向住海嘅方向行。
電話震咗一下。
「返嚟未？」Vivian 7:07PM。
我將電話插入一個用沙堆起嘅城堡入面，然後除鞋，走落水。水由腳㬹浸到小腿，由小腿浸到膝頭，再由膝頭浸到心口。
我停落嚟，合埋眼感覺自己嘅呼吸。心裏面有把聲喺度數：一……二……三……四……一……二……三……四……