講故．講夢: 廿三

「其實我好羨慕你。」凱瑞轉移話題的速度有點令我吃不消。

「你知唔知我出第一本書之前寫過幾多個故仔？五個。有啲由一開始到完結都係無人問津，有啲甚至食負評食到飽晒，但你第一個故仔已經咁成功。話就話而家我準備梗出第二本書，但我知道你一定比我行得更遠。」凱瑞突然提到他的過去，原來他也不是一帆風順。「所以你嗰陣為咗撐阿天而放棄咁好嘅機會我真心好嬲，要知道一個作家得到讀者嘅支持已經毫不容易，更何況係一間牟利嘅出版社。你知唔知每年有幾多人投稿去出版社為咗發呢個夢，好多人只能為慨嘆自己的文筆不如人，自己的故事未夠班吸引人，佢哋就好似用一對蠟造嘅翅膀去飛向太陽，那怕自己永遠到達唔到自己嘅夢想，但寧願係半空跌死，都不甘於喺地上度過匆匆一生。」我感覺到凱瑞由衷地說出這一番話。

「死仔，搞咩又咁感性，你畀咁多建議我嘅故事，我都應該要幫返你。」我不了解凱瑞面對過的失敗。我也知道一步登天未必是好事，經歷過失敗的人才知道成功的珍貴，而他正正在分享他的經驗給我，為的就是不想我重轁覆轍。

「你寫完呢個故事，有冇新主意？」

「冇啊，我發覺我次次都會腦閉塞。」





「你有冇睇過陳四月嘅《夢慾願墮》，我覺得單元性嘅故事有睇頭。陳四月嘅故事好叻於建立一個個散落嘅碎片，而最後利用呢堆碎片埋下嘅伏筆去敘述一個扣人心弦嘅主線。之前《輪迴交易現場》已經係咁，我好鐘意佢呢種鋪排嘅細心。」

「我諗我可以試吓可唔可行，不過真係要啲時間。」

「隨住時間嘅推進，故事嘅新意可以話越嚟越少，但作家就係要做創造獨一無二嘅新主意。呢個係我哋嘅本份啊！」我笑笑。
資料搜集可不是易事，所以我把《紅白極速約會》暫時擱置，先把畢業論文做好，不然要defer的話就糟了。

連續辛苦了三個月，終於把畢業論文和最後一個學期的考試都完成，亦代表畢業之時不遠矣。身邊的同學都為了畢業後的出路而苦惱，除了家澧。

「我諗過喇，畢業完做全職模特兒！同埋而家都有實驗電視搵我客串，我覺得試下做藝人或者唔錯。」家澧一邊幻想一邊跟我說。





我呷一口咖啡說：「你都決定晒，我都阻唔到你啦！同埋我都支持你啊，有個明星女朋友成件事不知幾威幾疊馬！係呢……對面個枱有個女仔好似眼甘甘咁望住你，佢係咪識你啊？」家澧回頭望一望那邊的女生微笑。此舉令女生鼓起勇氣走過來，「你係咪……袁家澧？我好鐘意你㗎，可唔可以同我影張相？」

女生毫不客氣地把手機遞給我，我沒好氣地為她們拍照。

「係呢你有冇睇過一個叫伊高仙貝寫嘅故事？好好睇㗎！」家澧識趣地為我宣傳意圖令我消氣。

「有啊，係幾sweet嘅，你都有睇嘅？」女生回答後家澧指向我。

「佢係伊高仙貝。要唔要影相？」家澧提議，女生望一望我，然後轉身就走。





……我以後一定令你後悔的！你要為拒絕合照而後悔一世！

家澧沒想到女生會狠狠拒絕，竟按捺不住笑了。

「夠喇！夠喇！」我已經生氣得面紅耳赤，但她沒有停止的意圖。

我伸出雙手捏她雙頰，「笑笑笑，咁鐘意笑？笑吖！你敢再笑？」雖然家澧沒辦法作出笑顏，但她仍發出「咔咔」的笑聲。我決定出絕招，不待她反應就親下去，一邊親一邊說：「笑吖！你敢再笑？」

「喂你啲口水漏入嚟喇！」

「仲好，食過我口水尾以後就係我嘅人！」
讀者們，大家好！我是誰？我是袁家澧啊！這故事一直以高烙然那個衰人作第一人身敘述，想必大家都厭倦了，所以作者想以我的角度去講述我的故事。對啊，最近模特兒的工作忙過不停，但懷緬過去常陶醉，樂事總比流淚事多。我明天跟大家說我的故事吧！等我啊！