講故．講夢: 二

「你知唔知一個故事最重要嘅係咩？」
       
「主題？寫作風格？故事？同讀者嘅互動？」我不斷提出一個故事基本的元素，但可惜統統不都是答案。
       
「係個心！用心寫既故事先係最重要！」
       
「……」太俗套的答案一時間令我反應不來。
       
「咁係吖嘛，唔信？話你知我大個一定會做一個好出名嘅作家。」他拍案而起，一邊歡呼一邊衝出課室，而我就留在原地捧腹大笑。
       




——對了，你最近如何？
       
我從睡夢中醒過來，惺忪之間拿起手機，打開通訊錄一個一個地搜索。
       
「喂……」       
他是中四的插班生，沉默寡言的他跟我可謂零交流。跟他成為深交的契機是在九月十四日上午的中文課。其實我只是胡說，那會有人記得何時跟他相識？
       
「今日我準備咗個遊戲大家玩，畀大家試下做古代嘅詩人，我就會出一段上聯，而你哋就試下接下聯。」如此有趣的活動令全班都大叫無聊，但老師仍繼續在黑板上寫起上聯來。
「大家有冇聽過祝枝山，佢同唐伯虎同為江南四大才子，而呢對聯嘅下聯就由點秋香嗰個唐伯虎對嘅。大家不妨試下，記住要留意平仄。」




隨後課室靜了三分鐘，大半班的人已經睡了午覺起來。突然一個架著眼鏡的肥仔站起來。

「 風扇扇風，風出扇，扇動風生。」好假的肥仔運用特別的朗誦技巧誦出下聯，並意氣風發地輕輕一笑，準備接受班上如雷動的掌聲。
       
「死肥仔收聲啦，睇到你Google啦！扮乜鬼自己原創啊？」班上的小霸王借機揶揄肥仔，全班頓時笑聲四起。
       
「咪笑！起碼馮同學肯Google出答案，踴躍答問題。冇錯，呢句就係唐伯虎所對嘅下聯，大家見到上聯仄平平仄，仄平平，平平仄仄，下聯就對返平仄仄平，平仄仄，仄仄平平喇！」
       
「老師乜個出字唔係平聲嚟咩？」同學甲問。
       




「可能嗰時個出字唔係而家既讀法，至於到底點讀我就不得而之喇，大家諗唔諗到其他好既下聯啊？」老師轉移話題的功力可不深……
       
平時寡言的他突然舉起手說：「衣架架衣，衣附架，架折衣失。」
       
頓時全場啞然，無人會猜到一個新來的插班生可以接到這句對聯。
       
「尿兜兜尿，兜存尿，兜穿尿漏。」我決定迎戰，班上又是一陣掌聲。
       
「書袋袋書，書放袋，袋爛書出。」看來他都不肯認輸，我想了半分鐘終於再說出下聯。
       
「相框框相，相存框，框消相落。」
       
「泥鏟鏟泥，泥入鏟，鏟動泥移。」他不消十秒就悠然接了我的下聯。
       
「Okay, 我輸。」我實在在想不到怎回應，唯有像頭喪家犬般搖尾投降。




       
從那一日開始我們的較量就沒有停止過，在中文作文考試中拼高分，一起寫文章投稿去徵文比賽，他成為了我高中生涯的好對手、好伙伴。中學畢業之前他說過他要成為作家，但我沒有跟隨他，我背叛了他。
       
「乜讀書真係對你嚟講咁重要？而家周街都大學生啊！點解唔試下趁早向自己嘅夢想努力去出發？」
       
「你自己考唔到大學實咁講㗎喎，你唔想做asso仔咋嘛，我明喎！」
       
「咩asso仔啊！」他一拳打向我。當然，打不還手不是我的作風。

「你打我？我識詠春㗎，我入你中路㗎！」我們打得遍體鱗傷，不到十分鐘便雙雙躺在地上喘氣。

「你真係上大學？」他回頭問我。

我無言。