天啊！點解我係毒男: 平安夜，孤獨夜

　　有人話平安夜係失身夜，但係對於毒男黎講只係一個孤獨夜。
　　先唔好講女朋友、女性朋友，有時甚至連男性朋友嘅邀約都冇，真係慘過咩咁。
　　所以聖誕節於我黎講就只係兩日紅假，同清明重陽一樣。
　　當然啦，一年如是，兩年如是，廿年都如是嘅話，你感覺就會慢慢淡左。尤其我係一個感覺遲鈍嘅人，如果冇咩刺激，我真係可以完全忘記聖誕節嘅存在。
　　尤其今年工作比較忙，所以我只係一直計緊自己仲有幾多日可以清左手頭上嘅工作。因此，我一直平靜咁渡過聖誕節前夕，直至……


　　「聖誕快樂！」
　　提醒我今年平安夜存在嘅係一個男人，提前喺群組發左個訊息黎，問心我麻麻地呢個行為，一啲誠意都冇，同喺FB度講生日快樂係同一個層次。而最重要嘅係……
　　佢地究竟明唔明聖誕節根本就唔係屬於毒男！明明我都忘記左，自得其樂，點解佢地係都要令我諗返起。




　　因為呢個訊息，我被迫重新記起聖誕節嘅存在。
　　因為呢個訊息，我被迫記起返自己嘅孤獨。
　　因為呢個訊息，我被迫尋找不屬於自己嘅快樂。
　　我嘗試去搵一班貌似都係毒拎嘅人，不過原來毒拎都係分層次，而我好明顯係最毒果種，所以最後都係食哂檸檬。
　　結果，平安夜我就只好一個在家。
　　如果結局係咁簡單，咁上天對我都未算殘忍，而呢篇文亦未必會出現。
　　喺平安夜真正將我打沉，話俾我知咩係毒男嘅係無記。


　　本來我已經接受左平安夜一個人過嘅事實，甚至可以話係忘記左，點知打開電視一睇，所以嘅不快就一次過襲來。




　　第一個打擊來自東張西望，無無聊聊搞個投票問平安夜收到幾多個異性邀約。我一聽個心已經一沉，第一個反應係計自己有幾多人約，諗緊聖誕前後算唔算？廿號出去果次到底係邊個約邊個？（係啊，我最近聖誕嘅約會已經係廿號喇，你滿意未？！）
　　終於，我得出自己個結果係Ａ（０個異性邀約）
　　哈哈（苦笑），係啊！我冇人約啊！一個都冇啊！
　　節目臨完前，公布個投票結果，其中一個主持好驚訝咁話原來有六成以上嘅人投Ａ。
　　我心諗靚女你用個腦諗下啦，有人約果班大部分都出左去啦，邊有時間睇你呢個無聊節目。留得喺屋企睇你呢種無聊野嘅人，咪只有我呢種可憐蟲囉。六成我諗講少左，因為隨時有班人係特登玩野投其他選項，而更重要係一大班可憐蟲如我，係會自命不凡懶得去投票，又或者即使喺網上都唔想承認自己孤獨寂寞。


　　受完打擊，加上晚餐唔係太飽，我決定對自己好啲──
　　落街買左個Ｍ記。
　　係，我喺平安夜自己一個食Ｍ記，夠毒了吧？




　　係，食Ｍ記特價包同薯條已經係我對自己好嘅方法，夠毒了吧？
　　喺Ｍ記入面，我終於見到好多形單隻影嘅人，第一次覺得Ｍ記咁溫暖、咁有「家的感覺」。
　　不過踏出Ｍ記轉個彎，又係另一個世界。原本以為喺空無一人嘅街道上，唔會見到成雙成對嘅人。點知……


　　炸彈唔洗多，夠殺你就夠。
　　竟然咁都俾我見到一對熊抱著嘅情侶向我行埋黎，即使四周好黑，但佢地親密嘅舉動就好似射燈一樣，把附近照得光光的。
　　個女仔遠睇幾靚，打扮亦係我鍾意果類型，令我忍唔住想望多兩眼。但喺廿四號呢一日，我實在唔想再望到任何溫馨嘅野，因為咁樣只會令我更加空虛寂寞同凍。
　　為免再自添煩惱，我決定行快兩步返上樓算。
　　返到屋企，愛回家已經做緊，我嘅第二個打擊亦正式開始。


　　呢類處境劇一向緊貼潮流，大時大節嘅內容一定同節日有關，我亦因此而中伏，一個大大嘅伏。
　　前半段嘅節目講一對情侶計劃平安夜嘅活動，因為兩人各有打算，睇落都冇咩野。但後半段講幾對情侶去唔同地方約會，當中嘅背景都係拍拖熱點，就好難唔令我觸景傷情。（關於小弟僅有嘅情史，遲下有機會會同大家分享）
　　曾經，這些景物、這些動作、這些說話是多麼的接近，多麼的熟識，但現在都已成了帶刺的回憶。




　　之後編劇安排劇中單身的男和女都回家和家人並度佳節，讓佢地感受家庭溫暖和節日氣氛。
　　劇中就算唔係成雙成對，都起碼能夠三五成群，而我……
　　諗返起屋企人只係在出門前買低包烏冬，叮嚀我肚餓時可煮黎食……
　　心，已傷透。不過，無記對我開嘅玩笑還未完……


　　最後，當鏡頭拼連幾對情侶，一起大叫「Merry Christmas」，簡直有如穿心箭一樣貫穿我嘅心。如果個心之前叫傷透，咁喺呢一刻簡直完全粉碎。
　　望住電視上嘅幸福笑容，聽著喇叭傳來嘅祝福話語。我，只感到無限悲涼。
　　原來當你身處谷底，笑容可以很傷人，祝福可以很諷刺。