[旅行鬼故事系列] [陳生返黎啦] 澳門旅遊之陰魂不散的傳教士: 最後一隻彩蛋：子鋒與天命叔 － 澳門之後（上）

從澳門回來後，本應盡情休息的，但由於天命叔強烈要求，加上天賜更於翌日早上來到家裏把我抓走，所以，回來後的第二天早上，我已經出現在天命道壇！
 
「小詠！我返嚟啦，我喺澳門買咗D香俾你呀，等我燒呢支新嘢俾你試下啦！咦？小詠呢？咦？黃炎冰！點解你又會喺度架？」我來到道壇，馬上跑到小詠的神主牌前，才發現小詠的神主牌不見了！然後才發現，炎冰也出現在這道壇，究竟是甚麼情況？
 
「小詠我交咗俾師兄睇住佢，唔好走嚟走去啦！過嚟坐低！我要幫你開多次命盤！天賜、炎冰，你地幫我手整個結界，我要一個絕對密封，唔會有任何力量入到嚟嘅結界！」天命叔少有地認真，吩咐著二人！
 
很快，兩人回到天命叔身旁，像左右護法般守護著他。
 
「哈哈，搞咩呀你地？駛唔駛咁認真呀？」我實在不習慣他們這種行為！
 




「唔好出聲！安靜！我要問多次你嘅出生時間！你諗清楚先好答我！」天命叔拿出他的獨門工具，一臉嚴肅的說。
 
「吓？之前咪算咗次囉？又算？我出生日期同時間咪就係……」我看見天命叔一臉嚴肅，也不敢多言，再次把自己的生辰八字告訴天命叔。
 
只見這次天命叔拿出的工具，比起第一次見到的還要多！
而且，還有一些從沒有在道壇內看到的東西！
 
「天命叔，呢D咩嚟？」我指著一旁，看上去像是西洋占星用的東西說。
 
「唔好問咁多！跟住落嚟，我會問你一系列問題！第一個出現喺你腦入面嘅答案，就即刻講出嚟！」天命叔無視我的提問，拿出了一本黃色簿，問了我一些問題！




 
經過了一段時間，只見天命叔凝重地蓋上了那本黃色簿，深深地嘆了口氣！
 
「點呀老豆？係咪算到D咩呀？」天賜估計天命叔已經算好，詢問他的結果！
 
「奇怪！好奇怪！」天命叔像是不敢相信算命結果，只是不斷在搖頭！
 
「喂，者係點呀？你唔好玩我喎，算完乜都唔講！」我也變得緊張起來！
 
「你仲記唔記得第一次幫你算命，我講過D咩？」天命叔抬頭看著我，一臉凝重的說。




 
「記得！你咪話我會好黑仔，一黑就黑足十年囉！撞鬼呀、受傷呀、大病呀……線之要幾黑有幾黑啦！不過你都話，除咗黑D之外，同埋中間有一兩個大刧之外，都唔會死得去嘅！大慨係咁囉！」我回憶起那時天命叔給我的算命結果，其實也算是非常負面，但我現竟能若無其事的說出來，人的適應力真可怕！
 
「老豆，我仲記得你話子鋒十年入面中會有兩個大刧比較危險！黃大一果個刧已經化解咗，嚟緊第十年應該會有第二個刧！」天賜補充。
 
「嗯，無錯！本來應該係咁……」天命叔又搖了搖頭！
 
「喂，點呀？唔好賣關子啦！快D講啦！」我忍不住說。
 
「我都唔知點解釋好……呀！咁啦，我先解釋下咩係命盤啦！無論中方西方定其它門派都好，所謂嘅命盤即係出生圖，就好似一個固定嘅棋盤咁，我地可以行唔同嘅棋，走唔同嘅步法！所以即使係同年同月同日同時同秒嘅人，或者命盤完全相同嘅人，佢地嘅人生都可以好唔同，就好似捉圍棋咁，基本上變化係無限嘅！」天命叔在這停頓了一下，我們點頭示意明白！
 
「就算變化幾多都好，都唔應該超越棋盤嘅範圍！呢個就係所謂嘅定數！但係，我啱啱幫你起命盤嘅時候，已經唔係超越棋盤嘅範圍咁簡單……」天命叔再次盯著剛剛起的命盤，一臉難以置信地道。
 
「點呀？你唔好成日窒下窒下好喎！」我再次追問。
 




「簡單講，你嘅命盤同之前完全唔同！無論係棋盤嘅規格定係內容，都完全唔係我之前所算嘅結果！命盤算出嚟嘅結果，應該會係一模一樣！同一堆時辰八字，無理由會出現咁離譜嘅變化！出現呢種結果，我諗到嘅原因有兩個！一，就係我自己之前算錯咗！二，就係子鋒你一開始俾錯時辰八字我！」
 
我本來還想諷刺他，是否他算錯了！
想不到他竟自己提出了這種可能性，即是說天命叔已經徹底想過這種可能性，而且按過往的經驗，天命叔算錯的可能性是非常低的！
 
但，我也不可能說錯自己的生辰八字啊！
即使有錯，我兩次說的生辰八字，也是一模一樣的，所以我非常肯定自己不會說錯了資料！
 
「唔會，我兩次講嘅時辰八字應該係一樣嘅！我記得好清楚！」我否定了第二種可能性。
 
「但照道理，拎住同一批資料，老豆你都係按照一般流程去做，無理由會算錯架！」天賜則否定了第一種可能性。
 
「會唔會有機會係鬼上身或者奪舍，雖然身體仍然係子鋒，但係已經係第二個人嘅命運，所以算出嚟嘅命盤都有唔同？」炎冰提出另一種可能！
 
「炎冰講嘅會較為接近！但問題係，就算係另一個靈魂，只要佢講嘅，仍然係同一組生辰八字，命盤就唔應該有錯！」天命叔推翻了最後一種可能性。




 
「咁……咁即係點呀？我完全理解唔到喎！」我想破頭也沒有任何確切的想法。
 
「老豆，我記得你每次算命，都會幫D客收起佢地個命盤同時辰十年架！我地不如搵返出嚟睇下，話唔定其實一樣呢！」天賜提議。
 
「其實，係子鋒嚟之前我已經搵過，我無留低佢嘅命盤……」天命叔無奈地說。
 
「無可能！老豆你維持咗呢個習慣十幾年，無理由淨係無咗子鋒個命盤！」天賜不能相信這是事實！
 
「係囉，你係咪擺埋咗一二邊唔記得Ja！不如等我幫你搵啦，呢個道壇我都好熟架啦，再唔係叫小詠幫手……」我開始感到混亂，這算甚麼啊？
 
「你地兩個冷靜D先，其實再詭異嘅情況我地都遇過啦，唔駛咁驚住！師伯，不如你話俾我地知，究竟兩個命盤有咩分別？」炎冰冷靜地說。
 
「兩個命盤嘅分別太大啦，簡單講就係兩個唔同嘅人生！舊果個命盤，子鋒會遇到大刧，雖然唔知可唔可以過到個刧，但至少佢本來嘅命盤係正軌嚟！但依家呢個命盤，無論點樣去睇，全部都係極邪之路，一係君臨天下，一係不得好死！就算有其它道路，都係一D遺害人間嘅道路！」天命叔再次審視眼前的命盤，像是希望找到另一種解釋！
 




「吓？唔係卦，我點會變到咁呀？」我的話音剛落，頭部感到一陣劇痛，像是回想起某些東西，但又不能清楚記起！
 
「咁以前或者師公佢地，有無遇過呢種情況？同埋，師伯，點解你會再幫子鋒睇多次命盤，係咪你知道咗D咩先咁做？」炎冰再次問到重點，天命叔的臉色沉了一沉！
 
「我之所以幫子鋒再睇一次命盤，係因為我一個熟人喺你地返嚟之前搵過我！佢提醒我，子鋒身上有一異物！但礙於佢都有自己嘅顧慮，所以無講得好清楚，佢只係叫我起多次命盤就會知道！我完全估唔到，竟然會出現另一個完全唔同嘅命盤！至於呢種情況，我記得，的確有試過一次！不過，我都係聽師傅佢地講，好似曾經喺正一真人果陣，出現過一個咁樣嘅情況！相同嘅八字下，命盤完全唔同！」天命叔開始回想以往的情況。
 
「正一真人？東漢時期？」天賜驚訝地道，這年代也太久遠了吧！
 
「正確嚟講，應該係東漢後期，黃巾之亂嘅時代！而遇到呢件事嘅，係第二代天師，張道陵之子 － 張衡！佢繼承咗正一真人之後，曾經幫一個人算過命盤，果個人你地都應該聽過，就係黃巾之亂嘅領導人之一！」天命叔嚴肅地說。
 
「吓？連三國都玩埋？你唔好再吹大D！」我實在不得不這樣說，太荒謬了吧！
 
「你信唔信都好啦，果陣張衡曾經同張角起過命盤，佢十歲果年，命盤顯示，佢只係一個比普通人更普通嘅人，如無意外，一係死於戰亂之中，又或者喺農村耕田渡過一生！但五年之後，張衡喺一次偶然嘅機會下，再幫張角起命盤，但已經發現佢嘅命盤完全唔同咗！顯示出嚟嘅，係亂世之路！之後，張角創立太平道，以神奇嘅法術去擾亂天下！歷史話佢係病死嘅，但相傳，當時係張角向某個人發動挑戰後失敗而亡！」
 
「照咁講，張角嘅命盤出現變化之後，就搞到當時嘅朝代立立亂？唔係咁嚴重卦？」我實在不能相信！




 
「就係咁嚴重！出現呢種情況嘅時候，好大機會有更大嘅亂局出現！不過，又唔係一定絕望嘅！據師傅佢地所講，呢種命盤轉變嘅情況，唔單止喺中國出現，就連喺外國都一樣有，不過好在嘅係，每一次嘅亂都好快就平定，而未有變成更大嘅災害！但……果D命盤改變嘅人，無一個係可以善終嘅……」天命叔一臉凝重的看著我，我背部馬上湧起一陣寒意！
 
天賜和炎冰也意識到事情有點可怕，一臉不安的看著我！
 
「但……老豆，究竟點解同一組數字，命盤會完全唔同咗？未免……未免太奇怪啦！」天賜不解地說。
 
「呢點我都唔明，就連師傅佢地都唔能夠肯定咁答到我……或者……有某種力量，影響緊我地，俾我地睇到呢個命盤啦！」天命叔不斷搖頭，看起來實在不像那個自信的他。
 
「痴線啦！依家又無咗我以前果個命盤，話唔定我地全部記錯呢？果個張角個故仔，都唔知係咪同一個人嚟，要解釋嘅話大把解釋啦，無事嘅！我一D都唔驚！」我本想用這種輕鬆的手法來打破這種氣氛，但腦海中仿佛有某種力量告訴我，張角的故事不是假的，頭很痛！
 
「細路，我都希望你講得啱！我叫天賜同炎冰展開結界，就係為咗避免有任何嘢影響到我嘅命盤！但結果……算啦，我都希望只係我記錯咗！」天命叔無奈地說。
 
「無事喎，你睇我依家幾精神，真係老虎都……都……」好痛，我的頭好痛！我按著自己的頭，連話也說不清了！
 
「做咩呀子鋒？無事呀嘛？」天賜走到找面前，擔心的說。
 
「哈哈，無事！少少……少少痛……」我的頭愈來愈痛，痛苦地按著自己的頭。
 
「天賜，炎冰，按實佢！綁佢喺張櫈度！」天賜和炎冰還沒有反應過來，天命叔便拿了一條粗麻繩出來，上前想把我綁著！
 
我不知道哪來的力氣，一下子推開了天命叔，想奪門而出！
天賜而先我一步站在門前，狠狠的把我摔在地上！
 
然而，痛楚並沒有阻止我的行動，我的背部碰到地板時，以一個蜈蚣彈站了起來！
但三人已經把我包圍著，然後把我狠狠的縛在椅子上！
 
這些情形，都是天賜後來告訴我的，當時的我，其實已經失去了意識！