[旅行鬼故事系列] [陳生返黎啦] 澳門旅遊之陰魂不散的傳教士: （一）
葡京酒店
時間：２００６年暑假
地點：澳門多處 & 大三巴
目擊者：６人
故事內容純屬虛構，如有雷同，實屬巧合
（一）
「喂，子鋒！點呀？去唔去者？」雷少問。
「我都想呀，不過阿奶唔知肯唔肯去！」我說。
「你問佢啦死仔包！唔問點知肯唔肯者！」天賜說。
「吓，佢會唔會誤會我想做D咩架？」我說。
「誤咩會，你個腦又諗緊D咩呀！今次我地六個人去，又唔係淨係得你兩個！」雷少拍了我的頭一下。
「做咩者，我驚佢誤會我唔想同佢單獨去旅行Ja嘛！你先係度諗緊乜呀！」我按著自己的後腦說。
「死仔你快D決定呀！個Package就黎無啦！」天賜催促我。
「得啦得啦，我依家打俾佢囉！」我不敵他們兩人的引誘，拿出手機致電給阿奶。
「喂，阿奶呀！係呀係呀，無呀，想問下你下星期一至三有無時間之嘛？吓？想約你去澳門囉。唔唔唔係呀，唔係兩個呀！我無諗D咩呀！係雷少同天賜話有優惠做緊，咪問我地去唔去囉！係呀，阿詩同冰冰都會去架！哦，好呀！咁我同佢地講啦！好，拜拜！」我掛斷線後，向他們點頭以示同意！
「睇黎阿奶真係好信唔過你，唔想同你單獨去旅行喎！」雷少奸笑道。
「呢條衰仔梗係唔知對阿奶做左D咩啦！搞到阿奶唔敢單獨同佢旅行！」天賜也取笑道。
「痴線，都唔知你地講咩！我同阿奶不知幾好，佢都不知幾想同我單獨去旅行！我地……我地無錢之嘛！佢顧慮我銀包Ja！喂，做咩呀，唔信我咁話囉喎！喂！」
就這樣，這次的三日兩夜開心澳門團，便正式落實了！
原本……應該是開心之旅來的……
就在出發前數天，我又來到天命叔的道壇！
為免大家不知道天命叔是誰，我在此簡單介紹一下他是誰吧！
他是一個仆街中年維園大叔，不過他跟一般的大叔有點不同，他是一個道士！
而我則是一個熱愛撞鬼的少年（據天命叔的說法，我會有十年的陰運，撞鬼撞不停的），由於之前發生的紅衣女孩和十不思議事件，我被半強逼的拜他為師！
我這位不羈的美少年，當然不會就這樣就範，我用了一點小聰明，拖延拜師的時間！
但是，由於我的撞鬼指數實在太高了，我也想學多點東西傍身！
所以，雖然還沒有正式拜師，我每個星期也會盡可能抽時間來到天命道壇，增加靈力又好，學新的道術也好，總之會來這裏消耗一下時間吧！
當然，另一個原因，就是來探望小詠吧！
「小詠，我黎左啦！你見點呀？」我拿著三支沉香，放在李麗詠的神主牌面前。
「好野，又係沉香！我好好呀，果位老人家俾我嘅力量好強大，我每日都覺得有氣有力！不過依家無得周圍飄，有D唔慣者！」小詠從神主牌冒出她的頭來，要不是我見慣了，還真會給她嚇得暈死過去！
「唔係呀，我之前明明見你飄到出黎，仲見到你係屋外面好似風箏咁，飄下飄下架！」我替小詠清潔她的神主牌。
「我依家一個星期最多可以出到黎一日，仲唔可以遠離個神主牌架！幾時先可以自由自在咁飄呀？」小詠歎了口氣說。
「你同呢隻野少D傾計，努力D練功，融合返果位老人家嘅力量，咁你就好快可以周圍飛架啦！你成日咁唔專心，十年都唔知夠唔夠你出返黎！」一把大叔的聲音傳來，正是天命叔！
果不期然，他在道壇裏又是一副維園大叔的模樣，絲毫沒有改變！
「師傅，我係神主牌入面真係好悶架嘛！你又唔帶我周圍去！」
「唔駛做呀你估！叫果隻野快D學好D道術，等佢有足夠力量帶你個神主牌走，咁你就可以周圍去啦！」天命叔指著我說。
「喂，大叔，我依家都每個星期過黎架喎！我仲照足你講咁訓練架！」我不滿的道。
「哼！照你果種訓練方法，你呢世都唔駛旨意追上我嘅功力！仲有，叫返我做師傅！」
「咩者，我都未正式拜師，師咩傅者！」我繼續替小詠清潔神主牌。
「你個死仔包！個個星期過黎我度，學呢樣學果樣仲唔當我係師傅，你係咪想死呀！」
說完後，天命叔拿著桃木劍一下子敲在我的頭上。
「哇！痴線架你，好痛呀！」我按著我的頭大叫。
「師傅、子鋒！你兩個次次見面都係咁唔悶嘅咩？子鋒佢唔鍾意跟果D規矩，師傅你咪隻眼開隻眼閉算囉！」小詠又從神主牌伸出頭來對我們說。
「哼！匿返入神主牌修練，唔好係度駁咀，學埋晒呢個死仔D衰野！」天命叔右手一揮，小詠馬上躲回神主牌內。
「係喎，天命叔，我下個星期一至三應該都抽唔到時間過黎。」我清潔好神主牌後，按天命叔教授的方法，在道壇前面打座修練！
「下星期一至三？搞咩呀你？」
「無呀，約左你個仔同班朋友去澳門玩幾日囉！」
「咩話？」天命叔手中的桃木劍猛然掉在地上！
「做咩咁激動？我去幾日旅行者，唔駛咁震驚呀？」
「唉……真係好醜命生成！你知唔知下星期係咩日子？」天命叔歎了口氣對我說。
「咩日子呀？唔係你生日呀？咪咁小氣啦，最多手信街拎D免費豬肉乾俾你做手信啦！」
我繼續以打坐的姿態回答，卻又換回來桃木劍的重擊！
「生你個死人頭！我生日個衰仔咁走左去我仲唔拎桃木劍打爆佢個頭！下星期一係七月十四呀！」
「七月十四？唔係喎，明明係八月七號喎！」
我剛說完，桃木劍又再向我襲來，幸好我早有防範，雙手高舉擋格！
「正一死仔包！我地道家講得都係講農曆架啦！中元節呀！」
「中元節？唔係盂蘭節咩？」
「盂蘭節係佛教稱呼，道家係叫中元節！雖然中元節正日係七月十五，但基本上成個七月都係陰氣最盛嘅時間，好死唔死你地又會揀中呢個時間去澳門！你地有無得改時間呀？」
「吓？無啦！Book晒野架啦，你唔係諗住依家叫我地取消呀？」我從打坐的姿態立刻站直了身子。
「取消咪取消囉，好出奇咩？你唔想撞鬼，果幾日就乖乖地留係道壇，當係陪下小詠啦！」
「你條維園阿叔梗係想我留係度啦，我咁辛苦先約到阿奶，要我放棄……呀，有啦！」我心中盤算著如何說服這大叔。
「唉，好啦，取消就取消啦，我都唔想煩！我諗天賜同阿詩應該都會取消旅行陪我嘅！我就無所謂呀，佢地兩個咁想去玩又無得去，都唔知會唔會影響佢地感情！唉，話唔定原本可以生米煮成熟飯，依家……無啦無啦！天賜之後又要去外國讀書，聽講呀，異地戀十對有九對都係分手收場，剩低果一對，唔係出軌就係……」
我還沒有說完，便感到頭頂傳來一陣壓逼感，又是桃木劍？也太小看我了吧！
我高舉雙手，卻是屁股處傳來一陣疼痛！
「講咁多你都係唔想取消去澳門者，望住我！」
我乖乖的看著天命叔，不敢造次！
「哼！你想去就去啦！睇你今次個相，你過左上次個大刧，應該唔會再有事嘅！不過……」
「不過咩呀？」我緊張的問，我可不想再次以命相搏了！
「不過你要幫我手製造多D空間俾天賜同阿詩！有機會嘅話，我唔介意佢兩個生米煮成熟飯架，我呢個老豆好開通，最好快D生返個孫俾我湊下啦！哇哈哈哈！」這維園大叔陷入了他的妄想中，看來他真的是瘋了。
「得啦得啦，製造空間我強項啦！」我隨口應對了他。
「仲有……」
「仲有？仲有乜鬼野呀？一次過好喎大叔！」當然，我屁股又吃了一劍。
「我想講，就算你面相無事都好，農曆七月唔係講笑，以你嘅體質，基本上係實撞鬼咁滯！記住D小禁忌唔好做呀！」
「你等等先，我寫低呀！」我在道壇上拿了紙筆，準備記低一些小錦囊。
「雖然你依家有學道，普通靈體應該傷害唔到你！而且普通嘅劍指應該都可以對付佢地！不過，雖然人鬼有別，但我地都唔可以亂黎，凡事都要留一線，如果對方無騷擾你，你就唔好隔硬趕佢地走啦！如果真係阻到你，叫佢地走或者嚇下佢地好啦，唔好亂咁打散佢地！」
「我又無諗過咁做，不過點解唔可以打散佢地？」
「呢個世界，其實除左人類、植物同其他動物，仲存在好多希奇古怪嘅野！妖呀、仙呀、神呀、佛呀等等！有好多唔同嘅存在，但大家都係融洽相處，唔會主動去干涉其他嘅存在！如果你主動去搞佢地，佢地就大條道理去搞返你！所以，盡可能禮貌D，唔好搞到其他嘅存在！」
「大叔你唔好再空泛D？起碼都話我知酒店果度有咩要注意啦！」
「第一件事收下你把死人口！對我亂講最多係硬食桃木劍，對果D靈體嘅話，隨時纏住你一世呀！另外，尤其係你住酒店，拍門果D你地都聽過，我唔多講啦！但最緊要係，入到去果陣，唔好打開散所有野，留返少少私隱俾『佢地』！真係見到對方好惡嘅，有得換房就換房，無嘅話就有禮貌咁講聲『唔好意思，住一兩晚之後俾返你架啦』！之後就自己唸咒，引導佢離開間房！咁樣正常都唔會搞你地架啦！」
「哦，咁都好簡單者！總之就以禮待人……呀，以禮待鬼先岩！」
「另外，你地會去邊D地方？」
「吓？我唔知呀，有阿詩係度，佢會搞架啦！」
「咁無辨法啦，你到時自己小心D！澳門嘅環境比起香港會更複雜，你陣間得罪左各路神明或者妖魔鬼怪，唔好叫我幫你執手尾呀！」
「得得得！我做事，你放心！話時話，點解頭先我明明Feel到頭頂有壓力，但結果你居然係打我屎忽嘅？」我回想起剛剛被桃木劍打到的情況。
「呢個係靈力嘅運用，專係對付你呢D死仔包嘅！呢D高級野你唔識架啦，你敬返杯師傅茶俾我，我就考慮下教你啦！」
「呀，我醒起有D野做，我都係走先啦！杯茶實有機會敬俾你嘅，不過應該唔係今日啦！小詠、天命叔，下次見啦！」說完後，我便奪間而去！
「師傅，你就咁俾子鋒走啦？佢今次去澳門應該會幾麻煩喎！」小詠從神主牌伸出頭來說。
「咁都無計架！佢死都要去唔通我阻到佢咩！」
「不如你同天賜佢地講聲啦，我驚今次有問題嘅係子鋒D朋友Ja！」小詠緊張地說。
「你係咪感應到D咩？」
「係呀，自從果位老人家俾左D力量我之後，我就可以感受埋子鋒身邊嘅人係咪會遇到危險！但究竟會係邊個有事，我就真係感應唔到啦！」
「咁……好啦，我同天賜講聲啦！子鋒出事唔緊要，最緊要唔好連累我個新抱仔！」
說完後，天命叔便致電給天賜，並要求他準備好一些護身的東西，以防萬一！
而我則回到家中，想著如何才能和阿奶「更進一步」！
哇哈哈哈，我可不會輸給甚麼靈異事件的！