【小喬初嫁了】初戀女友結婚前的一場鴻門宴: 第二章
我記得上一次跟她聊天，已經是上年四月的時候。
其實都算不上聊天，因為她沒有回覆我。
誰會猜到這次一來就是結婚。
究竟該不該去她的婚禮？
「梗係去啦！唔係她以為你仲對佢餘情未了咪大劑，男人最忌哩樣。」
「點解要去？去嚟你方會好受？你係前男友喎。」
我身邊的朋友意見分成兩派，其實兩邊都有道理，令我一時間難以決定。
「有啲女人未必真心想前度出席自己婚禮，寄帖只係禮貌。你不如係佢結婚前，約佢食一餐飯就算啦，好好睇睇。」其中一個友人說。
我也認為這的確是一個好方法。
可是她之前不理我的呀，對我的Whatsapp通常都是不回覆。
「咁你咪直接打電話去囉。」
我盯著電話差近十幾分鐘，仍不能鼓起勇氣撥出電話。
明明只是打一通電話，卻弄得像殺人後要自首一樣。
手指靈活的按下長久沒打、但仍熟悉得很的號碼。
電話傳來長久的接線聲音，「嘟嘟」的聲音越長，我的心就越不安。
「嘟......嘟......嘟......」
她會不會不想理我？
「嘟......嘟......嘟......」
最終，連線的聲音停止了。
「喂？」
「我想搵.......XXX」
「打錯！」
「打錯？」
「係呀，無哩個人呀！」
我正懷疑她轉了電話號碼時，原來是我太過緊張，將4當成5。
咦，不是說很熟悉的嗎？
「不如唔好打......」
正當想放棄之際，我的電話卻莫名奇妙地響起來。
是我要撥打的那個號碼。
面對這麼戲劇性的一幕，我反應不過來。
實在難以想像她會動打給我，我當然不能狂妄地以為她想婚前來一招復合之類。
現實哪會有求婚大作戰的劇情。
「喂？」
聲音，即使相隔多少年，依然是如此的熟悉和不變。
「喂？」我心呯呯地跳過不停。
「係咪阿鹿？」
「係呀。」
「阿鹿，你係咪收到我張請帖啦？」
「收到啦......恭喜哂妳，估唔到咁快結婚。」
「哈哈，多謝你.....」
「妳有野搵我？」
「無呀，因為我就嚟搬屋，執到啲野好想畀返你。」
「喔......係咩嚟架？」
「到時你咪知囉。」我正奇怪什麼叫「到時」之際，她下句就是：「你方唔方便一齊出嚟食餐飯？」
呃，竟然這樣？
竟然是她約我食飯？
「都可以，幾時？」
「如果後日夜晚你得唔得？」
「後日.....可以呀。」
「呃......如果多一個人，你會唔會介意？」
「多一個人？」
「因為我未婚夫話都想嚟，佢都話好想見下你咁喎......」
為什麼要見我？
可是在這個關頭，如果我說不行，就顯得我太沒有風度。
「喔，當然唔介意啦。」
「如果你有女朋友都可以帶埋嚟。」
「好呀。」
「.......咁......你有無咩想食？」
「我揀好無？我遲啲Whatsapp餐廳畀妳。」
「呵呵，好呀，咁到時見啦。」
「喂！」我叫住她。
「吓？」
「記得睇我Whatsapp呀。」
「我會呀。」
「我嘅意思係......覆我......如果唔係我唔知你鍾唔鍾意。」
「哈哈，我會架啦。」
「到時見啦。」
幾分鐘的對話，進展那麼大，事情忽然變成攜眷出席飯聚。
我心情感到莫名奇妙的喜悅，好像有一塊沉重的石頭放下。
朋友阿明知道這件事後，他反應與我的心情成了極大反差。
「嘩痴線架你！你做乜會應承佢架？！」
「做咩？食餐飯啫。」
「飯？你唔係咁蠢以為真係食飯呀嘛？」
「唔食飯唔通唱K咩。」
「你自已諗下，佢未婚夫都嚟係咩意思？」
「唔......代表要加多個茶位？」
「係代表哂馬呀！擺到明不懷好意啦，舊情人相見，仲要拖埋現任情人嚟，咁同宣戰有乜分別？簡單嚟講就係佢想比較下大家現況。」他還喃喃自語：「女人嘅心理真係極度複雜，不可不防！」
不知道是否阿明受過情傷，從此一朝被蛇咬，十年怕草繩，覺得天下烏鴉都是黑的。
「我覺得無咁誇張啵......？」
「你諗下，男女朋友分咗手之後，根本無可能做返朋友。你睇下啲19金句，都係勸人活得比前度好，而家佢約你出嚟，擺到明就係想Show佢幸福過你啦。」
「咁都無乜野啫......好似.....唉我都唔知。」
「點解佢男朋友都要嚟呀？好明顯，佢要監察住你兩個，第二係要同你比較。哩場戰爭，你輸，就輸一世。一世都後悔，永遠佢地都覺得佢比你幸福，佢會諗：『多謝你讓條女畀人，我而家攬你條女好幸福。你永遠都係輸家。』」
我沒有考慮過阿明說的話，但他好像說得頭頭是道，我開始有點動搖。
「人地結婚，幸福值爆燈，你孤家寡人，簡直就係劉邦，勢孤力薄。」
「咁我可以點？」
「仲可以點？當然要做到個樣畀佢幸福啦。」
「哩場戰爭，係男人尊嚴之戰，梗係唔可以比你輸。」他搭一搭我肩膀：「放心，有我。」
這兩天，阿明極度積極地為我準備飯聚的事，好像他才是出席的主角。
我腦海一直幻想她未婚夫的盧山真臉目。
前一晚，我又在看她送給我的禮物。
「生日快樂呀！唔準唔準唔準嫌我整得唔靚架！」
「點會呀，係我收過最好嘅禮物。」
對於不諳美術的她來說，這已經算是大師級作品。
又是一個失眠的晚上。