<< 那年初夏，我們在微信釣的狗公 >> 再釣一次?: Part 46 第五章 – 智囊團

Part 46 第五章 – 智囊團


「喂…認真mode，你地聽我講…」 結束早上professor既堂，我就立即拉著坐係我隔離既「智囊團」係度商議大計。由於時間已經到左中午十二時，為左節省時間我地就去左carteen邊食邊傾。

「我知啦…意思就係你想搵返六年前果個初戀情人丫嘛，係咪？」柒龍係我識左三年既大學同學，人如其名柒頭一個；雖然個樣都ok見得下人，唔出聲的確幾呃得下，但係個性對住女仔就變到成隻鵪鶉咁所以注定冇女溝。

關於阿怡既事，三年黎我同柒龍講左只有廖廖數次，今次見我咁積極亦睇得出佢露出「唔撚係啊，你都有女追？」既葡萄表情。

「但點都係六年前既事…你冇佢contact真係好難搵得返佢架喎…」坐係阿龍對面既阿彤好自然咁答。




 
 「你同佢之前係同學黎既不如你試下係facebook搵下啦～應該點都會有一兩個mutual friend掛～」而坐係佢隔離既阿雯都好主動咁比意見我。

除左阿龍之外，阿彤同阿雯算係我比較熟既朋友，雖然唔係話特別friend但係話哂都係一齊做過project既groupmates，所以關係都算唔錯。  

「facebook…唔通最尾都係要靠佢？」

阿雯既諗法我唔係唔知…但係當年中學時期facebook仲未盛行，到左興果陣根本連一個中學同學都搵唔返。

紀念冊上面既msn 同 mail address係有既，但係好不幸MSN係今年三月中已經收左皮，所以依家唯一既線索係facebook撞下中學同學Ｄemail ，唯有寄望有人會用返msn address去申請facebook啦… 





係大學生涯入面，只有對住柒龍佢地我先可以肆無忌彈講出我既心底話；阿朗雖然都係我個兄弟，但係一黎佢識當事人所以我都唔好意思搵佢傾，而且識左咁多年先講埋依Ｄ婆媽野梗係覺得格格不入咁，你知啦！做兄弟既野「在心中」啦。最重要係阿朗同我唔係同一個系，係campus既見面次數其實都柒龍佢地比較多。



  叮叮———咚！



  嘿？中午時段竟然有人send訊息比我既？





  「嗚…Melody我又比Kay同Monico蝦啦！你一定要幫我啊！╤ ﹏ ╤ !!」打開一睇原來係Melody傳比我既私人訊息。

 由於習慣左每日臨訓mute group直至放學先開返既關係，所以除左一般私人信息會有提示鈴聲之外基本上wechat都唔會影響到我現實既日常生活。

  睇下先———

  事源係Melody尋晚釣到一隻厹，但係純如白紙既佢比厹既甜言蜜語攻陷而動左真情，展開左一段禁斷既人獸戀。

  Kay: 「Melody你柒少陣當幫忙啦。」

  Monico: 「你係咪已經唔記得左我地會規第八條啦？時刻記住你現實既身份同姓別！」

  縱使其間Melody極力維護依名呢稱為「Ken b」既厹，但面對Kay同Monico兩個極為針鋒相對既攻擊，硬膠如她也變得遍體鱗傷。





  厹始終都係由男性墮轉而成…會對有丁既生物動之以情…唔通Melody現實係絲打黎？

 再望一望Melody icon既女生，晶瑩剔透既一雙美目，一臉楚楚可憐既面容令我一剎那遺忘她從前種種膠事，一顆「護絲心切」既憐憫心油然而生。

 「好啦好啦…你地唔好再咁話Melo———」正當我輸入緊為Melody作辯詞既時侯，突然感受到一股殺氣由旁邊傳來。

  「Hi…? 柒龍…?」注視著坐係我身旁既佢，原來早己進入左超三狀態，盯著我擺出一臉「有荀野都唔益兄弟」既猙獰面孔。

  「Hi你老母。」柒龍短短的回答透露出無極限既怨氣。

  「平時唔聲唔色…原來你咁叻追女好架喎…」連坐係我對面既阿彤同阿雯都已經察覺我不尋常既舉動。

 「唔怪之得平時whatapps從來唔搵我地啦…原來～」一向眼利既阿雯擺出一副瞬間看柒頭既姿態，露出淡淡的慨嘆。

 「唔係…你…你地聽我解釋先啦！」





 「我同你，已經冇野好傾，係咁先。」柒龍既眼神充滿鄙視，他孤高既身影消失在carteen既門口處。

 「哎…我同阿雯上去library print埋d notes先…一陣見！」阿彤強拉著阿雯快步離開carteen，猶如為了逃離禽獸捕獵的黑班羚一樣敏捷。

 「……」

 喧鬧的飯堂，仍充斥著為了一頓午餐而不相往來的人潮。 

然而這裡卻只剩下我一個。



 叮咚———！ 







我緩緩地打開手機，無力的看著飄浮在螢光幕上的訊息…

  Melody:「Queena bb豬！多謝你幫我 >333< LoVe YoU FoReVeR！」


  …

 「我屌。」