【陸月添故事系列】《等一個人茶走》: Ch5 棍波論

到了晚上，我，恆輝和健華準備去蘇基茶餐廳吃晚飯。

健華拿著車匙：「揸我果架」

恆輝：「你果架得兩坐炸點坐」

我：「唉自私車，一齊行過去啦咁近」

其實蘇基茶餐廳只位於巴士站旁，所以步行五分鐘便到達。





「唔知今日台灣姐姐係唔係到呢」步行途中我說

恆輝：「係到掛，唔係到就去食其他囉哈哈」

我：「我知道佢星期二同星期四係到，星期三唔見佢係到」

 健華：「哇你係到跟蹤人」

 恆輝：「係咪真係咁正呀」





 我：「我唔係變態呀，我去食飯架炸」

 我們到了茶餐廳門口，然後，認真地看一看店裡面。我看到台灣姐姐正在清理餐桌。

 我說：「係到呀係到呀」

 恆輝：「邊個呀」

 我：「緊係執緊枱果個啦」





 健華：「下，好一般般炸喎」

 我：「下唔靚咩，執緊枱果個喎，唔係發緊夢果個喎」

 恆輝很無奈地說：「一般啦」

 我：「sosad」

 不過我認同自己的口味跟很多人不同，很多被大眾認定為女神的女人，十個之中有八個我都不讚同。 

此時台灣姐姐看到我們，然後從店內走出來。

 台灣姐姐雙眼亮晶晶望著我問：「hello，三位嗎？」

 我呆一呆答：「對呀三位」





 然後我們三人跟著台灣姐姐走入店內，去到卡位坐下了。

 台灣姐姐放下三份餐牌和三杯熱茶，我們拿起餐牌看，但台灣姐姐並沒有走開，她站在旁邊看著。

 恆輝問我：「有咩好食呀？」

 我指著貼在牆上的餐牌：「我平時都係叫果啲ABCD餐，同埋我叫過一次海南雞飯，幾好食」

 健華：「我要食焗野，識食一定食焗野」

 恆輝：「咁我食海南雞啦」

 我：「我都食海南雞飯」





 我對台灣姐姐說：「要兩個海南雞飯」

 健華：「和一個焗豬扒飯」

 台灣姐姐寫餐單，然後問我：「然後一杯“茶走”嗎？哈哈」

 我：「哈哈對呀」

恆輝：「要一杯凍檸茶」

健華：「我要凍奶茶」

「好的，thank you」台灣姐姐收起餐牌然後返回水吧工作。

健華模仿台灣姐姐的語氣：「wow茶走！」





我：「咩呀」

健華：「好得意喎，仲要主動問你係咪要茶走」

我：「我呢幾日都係呢間食，次次都係佢幫我落單，應該知我淨係飲茶走」

我再道：「你望下佢係咪真係有啲似劉亦菲，特別係佢對眼」

恆輝轉頭看一看：「似咩」

我：「我覺得似喎」

健華：「都係鬼妹正啲」





我：「妖知啦」

⋯⋯

到了結帳的時候，又是台灣姐姐幫他們結帳。

健華問台灣姐姐：「可以分開給錢嗎？」

台灣姐姐：「可以喔」

 「哎呀又無帶食神卡」付錢後我醒起自己又沒有帶集點卡

台灣姐姐看到我皺起眉頭便知道我沒有帶集點卡。

 台灣姐姐問我：「你沒有帶嗎？」

 我搖搖頭：「沒有呀對不起」

 台灣姐姐：「沒關係，要不要我多給你幾張？哈哈」

 我：「不用啦，我已經有兩張了，我下次一定會帶」

 台灣姐姐：「ok，對了，你們是哪裡人？」

 我：「香港」

 台灣姐姐害羞著：「喔喔」

 我以微笑回答台灣姐姐，然後轉身走和恆輝健華一起走。

 台灣姐姐：「byebye」

 我們回頭揮手：「byebye」

回到家裡，我們都進入了健華的房間。

 我和恆輝躺在床上看著健華玩電腦。

 我：「點呀，星期一番學諗住識幾多女仔呀？」

 健華：「緊係問哂啲鬼妹拎電話啦」

 我：「聽住先啦下」

 恆輝：「你地中意咩類型嘅女仔？」

 我：「我中意應采兒果類，好True唔會做作，敢愛敢恨，又靚」

 健華：「應采兒好老呀，把聲又沙」

 我：「佢係我心目中係完美架，好羨慕陳小春呀，我都想揾番個似應采兒嘅女仔」

 健華：「我中意鬼妹，有腿又有蘿」

 我：「算啦你講咁耐都未見過你帶鬼妹番黎」

 健華：「拿，媾女呢就好似揸棍波車咁，要控制好個離合器，你踩得太入架車就會唔夠力行，放得太快架車又會好易死火，個離合器要岩岩好放到磨擦點果到先駕馭到架車，同媾女一樣，要揾到個G點」

 恆輝：「痴線，咩離合器，當啲女係架車哈哈」

 我：「佢中意玩棍波玩到上腦」

 健華：「咁係真係咁呀麻」

 我大開手掌：「咁女呢？你啲車係邊」

 健華：「唉星期一就拎鬼妹電話」

 我：「繼續吹，留名等睇架車係咁死火」

 恆輝：「你慢慢用你啲乜鬼棍波論啦哈哈」

 ⋯⋯