食屎唔可怕，可怕在鍾意左食屎: 第二十七章
「聽落命中率都幾高喎。」子剛在聽完我解釋我鍾沛澄的認識經過後說道。
在麥當勞﹝金拱門！？﹞中我像一個來街症的病人，把最近的前因後課經過總結後說出，而面前的子剛則搖身一變成了醫生，一個感情醫生；我不知道這樣形容他合不合適，因為我跟他交情太深，完全知道他拍拖次數是五隻手指都用不上。
「但係出到黎我驚會咩分都扣曬。」我說。
「你唔做埋啲 on 9 野嘅話都唔會扣好多嘅。」
據我經驗，我估到他指的是什麼。
「咁做咩先加分？」我問。
「首先呢，你諗做咩可以加分唔夠好，依啲係一般人為咗討好女神先會諗嘅野。你要諗嘅野係，點樣可以係佢面前好好表達自己，去吸引佢鐘意你。」
我的身體向前傾，雙眉鎖起，專注地理解他所說的話。
「同埋依加最重要係諗你地嗰日嘅行程，諗好去邊未？」
「無呀，睇場戲咁囉。」我望住他，理直氣壯地說。
「唔得，咁太普通啦，咁樣佢搵呀豬呀狗都得啦，點顯得你係特別啲。一個豐富嘅行程可以令佢難忘好多，出黎睇戲係最差嘅，睇緊戲個時大家邊會講野，可能有人會覺得唔講咁多野咪好囉，唔會 dead air，不過咁樣跟本就無咗約會嘅意義，佢對你嘅了解根本無增加到，所以佢就無可能會對你有感覺，換句話說你對佢黎講根本毫無吸引力。」
「吓，咁唔睇戲仲有咩可以做。」我的眉頭扣得更加緊，一時間又想起我跟鄧泳芝曾經去睇戲的畫面，這時我開始認同子剛所說的。
他停頓了一會，為接下來的大量訊息作整合：「你地雖然係訊息上傾得好好，但一開始出到黎一定會有反差，你地仲要係網上面識，佢第一下見到你個感覺會好陌生。如果要係短時間內拉近同一個嘅距離，最好就係大量嘅場景轉換，你諗下，你啱啱識一個朋友，本身都唔係好熟，但出過黎幾次後你忽然間就會覺得同佢 friend 咗好多，講野都唔會再只係留係表面咁恭敬，咁係因為你地幾次間去咗唔同地方做咗唔同野，可能係去唔知邊到食飯，行過唔知邊個商場，經過唔知邊條街。而你依加只不過係將以上分成幾次所做嘅野濃縮成一日，甚至乎半日，在於你地有幾多時間。」
看他能這麼完整的說出，該不是隨口 up 當秘笈，但縱使我明白，可就不懂得運用，除了睇戲我就不懂其他了。
「唔睇戲仲有咩好做。」
「屌，大把啦，香港地雖然細，不過都好多野玩，更何況你地有共同興趣架嘛。我唔知有無，不過比如話搵個工作坊係可以一齊整把結他出黎個啲。」
「整結他應該無咩可能啦，細件啲嘅可能就得。」我這才發覺我一直都沒有留意過這些東西，以前音樂在我眼中就只有不停練習和表演。
當我們斷續討論該如何安排行程時，場景已經從麥當勞轉換成往天悅邨的行人路，不知是否引力的關係，我們經常很自然的會沿著這條路行過去天恆，如果肚餓的話，我就會在糖水鋪附近的小店買一碗生菜魚肉，而子剛則會買煎釀三寶，然後往紙袋中擠滿甜酸醬。
我每次來很自然的都會四處望，看看會不會碰到鄧泳芝，全因為我曾經一次就在這裡見過她，當時在遠處的她正穿著校服，雙手棒住一箱她的生日禮物，急步的走回家。
在我張望的其間子剛跟我說：「不過依啲最緊要都係心態。」
「心態？」我確定附近沒有發現就回到對話上。
「係，所謂技巧，其實都係源於心態上，技巧係死嘅，可能我依加同你講幾個，到時出到去又唔啱用，心態啱嘅話你就知道幾時要講咩野同做咩野。」
「即係點？」我不太明白。
「例如最簡單嘅，依加個個都開口埋口叫自己追緊嘅女仔做女神，有啲自以為自己只係講下笑，結果做出黎嘅野咪又係行好人 flow ，唔敢得罪條女。」
他輕笑了一下再說：「其實係適當時侯係要踩下條女，唔洗太過火，睇你點拿獵啦，慢慢可以增加個次數，但又唔洗下下都踩，一下沙糖一啖屎你應該明嘅。」
「都明嘅，不過你頭先講咩好人 flow ？係咩黎。」
「即係依加普遍男仔都用緊個招囉，下下以條女為先，管接管送呀，成日讚佢呀，又比曬啲時間佢，自以為韓仔暖男咁對條女好撚好個啲。」
我聽著只想到自己，我也是普遍男仔中的一個，於是只能笑著點頭稱是。同時也想到卓琪，她前排跟子城分手，轉眼間就被我班籃球隊一個花名叫爆炸的人一齊，那個爆炸在他們還未分手前就已經不停對卓淇出手，我看過他傳結她的訊息，一定就是走好人路線，更是強烈那種，只不過他成功了。當中細節原因我不知道，我只是覺得無比噁心，再也不想見到爆炸，無奈我跟他同班，不得不每天見到他的臭臉。
「你應該係打浪漫 flow 架啦，我諗下點同你講先。」他吸了一口風，發出「匙」的一聲。
我本來想問他最近有沒有找過子城和世傑，但見他在幫我就不方便另起話題。
卓淇的分手是我們這個圈子分散的開始，首先是我們四個一致地對卓淇感到失望，然後男跟女的也分成兩邊沒有再一齊出街，到最近剛好子城和世傑識了兩個新的朋友，本來我們總共六個人都會一齊打波，但後來子剛又和世傑鬧翻，加上那兩個人的性格和子剛不合，導致關係進一步疏離，子剛現在已經位於離開這個圈子的邊沿。
我們正朝著我一直最擔心的情況前進......
「你可以係成個過程之中，搵一啲位係講關於愛情嘅野，佢只要不停聽某一樣野，腦海裡面就自然有畫面同幻想，然後潛意識就會認定個樣野。咁當你不停同佢講愛情，調轉當提到愛情嘅時侯佢就會想起你，唔洗聽到咩我只係當你朋友嘅廢話。」
他續說：「不過你講愛情野就千其唔好講負面嘅野，例如之前感情路點差法，又追唔到人又或者分手諸如此類......」
我沒有拖過手，又何來分手？不過也多得他的提醒，不然我到時可能真的會跟她說我感情上的失敗。
「咁仲有咩可以講？」我繼續問。
「你依幾日返去諗下.....諗一件係你人生中發生嘅事，個一件事係可以令佢覺得你係一個孝順嘅人，或者重友情，或者會照顧朋友，或者有品味，同埋童年回憶都唔錯，越多越好，總之就係可以突出你好嘅性格。然後將依件事重整，編排返好，再用一個故事既形式同佢講。一定係要故事！千其唔好直接同佢講我個人點點點，又點好點好。諗下可以點樣將你依個故事講得引人入勝，自己練多幾次。」
停頓一會後他積極的補充：「依堆故事終生受用，多一個就係多一個，講完之後佢可能又會分享佢嘅，咁你地之後嘅話題就開始深入，之後就進入下一個過程，就係交換價值觀。」
聽到這裡我才驚覺他說了這麼多，也不過是其中一個步驟，而且估計當中省略了不少，大概我要知的東西還多得很。
「我諗頭嗰 part 我都未必做得到。」要做本來自己不做開的事是很難的。
「照住做起碼衰極有個譜，你黎緊第一個 date 專注打咗吸引力先啦，之後先再搞其他野。」記得他提過高手是能夠由相識到上床都是在一天內完成，他的意思是要把所有事分拆成三至四個約會。
當中他所省略的，在他接連幾日的說明後都牢記了，很多平常不曾想過的都像擴寛了視野般，更多曾經的錯誤想法都被糾正過來，這幾天所知道的雖然很微不足道，也不能令我一下了成了情場高手，但比起一無所知，多少都有一點優勢。
在危險的情場上，每個女人都手執一把利刃，她們每一個都比我們想像中邪惡，多少人被傷害得血流如注，當中有愛得失去自我的，有被拒絕但依然心甘情願苦等的，有被玩弄感情的，更加多的是，在穩定交往中卻被蒙在鼓裡的。技巧是刀，我們不一定要用這把刀去攻擊人，反而是要用這把刀保護自己，以免在在感情路上受傷。
而我選擇用這剛出爐的小刀主動出擊，為的就是從第二個人身上得到感情的慰藉。
星期六準時下午一點，我到達了屯門市廣場門外的樹蔭下，找到了她。
「橙！」她曾要求我在電話上把她叫做橙。
她回頭，兩人的瞳孔對上了，這是我們第一次真正的見到大家。