［人性/有甜］- 屍•家•馬鞍山（隔日更新）: Chapter 717 - 世外桃園？

眼前是數楝簡陋的村屋，放眼望去，恍似渺無人煙。

「有冇人呀？」我大叫著，希望有人回應。

「......」可換來的，只是四周的一片寂靜。

我已經有點筋疲力盡，只好先行進去其中的一間破屋藏身。

我在屋內找來了一張尚算完好的椅子，好讓我先行把 Vicky 放低。



這一刻的 Vicky，已經再也沒有作出任何的反抗。

「對唔住，我頭先...」我正想為，剛才發生的一切道歉。

「你帶我嚟，諗住做咩呀？」Vicky 面無表情的看着我問道。

「我...」其實，我只是一時衝動。

「如果冇乜嘢，你不如比我走啦！」Vicky 冷冷地說道。



「我... 我諗住同妳喺到一齊生活之嘛～」我急忙說出心底話。

Vicky 看著我，沒有半點回應。

「真㗎～ 妳相信我啦～」我捉住她的手說道。

「你叫我信你？你叫我點信你呀？」豈料 Vicky 竟激動地叫道，「你嗰頭同人哋又咁又咁，轉頭就去搞其他女人？」

「我...」我實在不知道，該怎樣去解釋。



「我知道錯㗎喇～」我決定直認自己的不是，「所以... 所以我決定咗，喺呢度同你喺埋一齊㗎喇～」

「嘿嘿！」豈料 Vicky 冷笑道，「馮若海，你仲叫我點信你呀？」

確實，我無法令她安心...

「我唔知可以承諾啲乜，但係我係真心嘅...」我已經不知道該說什麼，「我真心希望妳以後都可以同我喺埋一齊...」

我真心希望，可以憑這一句說話將她打動。

「馮若海，你唔係諗住就咁講兩句嘢，我就會唔記得晒你啲衰嘢，重新再相信你呀嘛？」她的態度依然十分強硬。

「我知道我做錯咗...」我答道，「但係妳放心，時間會證明一切...」

「時間、時間... 我究竟我仲要俾你幾多時間呀？」Vicky 不滿的反問道。



「我知我宜家講咩都冇用，不過如果妳肯俾機會我嘅話，我會證明俾妳睇...」我屈膝跪在地上道，「我真誠同妳道歉，希望妳可以原諒我...」

這一次的回應，終於令她的雙眼亦泛起了淚光。

「求吓妳，比多最後一次機會我！」我低下頭懇求着她道。

「......」她依舊沒有答應。

「呢度冇水冇電冇嘢食，妳叫我點樣喺度生活吖？」看來，她的態度已經有所軟化。

「得得得... 呢啲妳交比我，我即刻出去搵...」我興奮得差不多要跳起來。

我二話不說，立刻跑到外面找尋。



可是，當我走到了那一望無際的叢林時，我才感到有點無助。

我始終，想得太簡單...

一直以來，我都是遊走在不同的群組之中。要完全獨立生活，真的有一定難道。

但是，我不會輕易放棄。

水，我想這是頭一個必需品...

但清澈乾淨的食水，除了超級市場內的樽裝水外，我還可以在哪裏找得到？

難道，我還是要折返市中心才能生存嗎？

我覺得有點不甘心，於是在打算返回城市之前，我還是決定在這裏先逛一圈。



這裡可說是荒蕪一片，既沒有可供食用的東西，就連最基本的飲用水亦欠奉。

正想放棄的時候，卻發現遠處那 Vicky 所在的房子外面，有一個身影正在窺看著。

我二話不說，立刻飛奔返回房子查看，以防 Vicky 會遇上什麼危險。

我用生平最快的速度跑到屋前，發覺門外的身影已經消失。

萬分擔憂的我，立刻衝進屋內找尋。

「嘩～ 嚇屎人嚒？」剛剛闖進屋內，卻看到一老婆婆以半純正的廣東話叫道，「仍又下什麼水啊？」

我想了一下，才定下神道，「我係佢男朋友，以後諗住喺呢度生活㗎喇～」



「唔係呀婆婆！」豈料 Vicky 否認道，「佢唔係我男友嚟㗎～ 我冇啲咁衰嘅男友呀～」

「嘻～ 原來手夫痴吵架...」老婆婆看著我們說道，「唔怕哩、長頭打嘲長尾和哩...」

我跟 Vicky 對望了一下，卻又再迴避彼此...