［人性/有甜］- 屍•家•馬鞍山（隔日更新）: Chapter 661 - 不安感

這個話題頓時膠著，雙方也沒有再多發一言。

「係呢，你應該肚餓㗎啦～」還是 Vicky 先帶起話題，「素恩佢拎咗啲嘢食嚟，我哋可以食啲嘢先...」

「嗯...」我只能點頭應同。

素恩留下了不少的乾糧，應該足夠我們數天的食用。

「做乜呀？你冇胃口呀？」Vicky 看著正呆坐在食物前面的我，「我仲以為你一直食流質嘢，起身會肚餓添～」



我也覺得有點奇怪；在我剛剛恢復意識的那一刻，我好像有著無可制止的饑餓感。

但在這些食物面前，我又好像提不起勁。

究竟，身體正產生著什麼變化？

「唔知呀～ 可能餓得濟，餓過龍而家唔想食嘢啦～」我只好這樣回答。

「係呢，點解你哋會同泫雅失散咗嘅？」Vicky 一邊吃著乾糧，一邊向我問道，「佢唔係一直跟住你哋嘅咩？」



失散？看來 Carey 沒有把真相道出。

「失散？我哋唔係同佢失散喎～」反正屋內只有我們二人，我亦無需對 Vicky 隱瞞什麼，「係我同 Carey 要出去搵妳，而泫雅就唔肯走...」

於是，我把事情的始末完全告知。

當然，過程中作了一點的修飾。

「吓！咁大件事～」Vicky 聽畢後竟大叫了起來。



「咩事？」我對她的反應感到奇怪。

「冇... 我記得 Dickson 一見返 Carey，就好緊張咁問泫雅去咗邊，話佢一定唔可以唔見...」Vicky 答道。

「佢仲好緊張咁想出手叫醒你，不過好彩 Carey 同素恩及時阻止，Carey 又同 Dickson 講大致上喺邊度失散，佢先冇再搵你麻煩咋～」Vicky 補充。

「咁佢跟住就走咗？」我問道。

「吖... 都唔係嘅～」Vicky 回想道，「Carey 好似比 Dickson 嚇親，所以 Dickson 都留低咗一陣，氹番佢先至出發...」

我聽得有點不是味兒，想不到 Carey 就這樣的回到了 Dickson 身邊。

但回想過來，Carey 本來就已經是 Dickson 的女人。

我究竟期待著什麼？



那麼在那一夜的人，應該不是她。

觀乎 Vicky 的言行舉止，也不似是跟我有過親密的接觸。

看來，素恩才是真正的主角吧！

「你諗乜諗到咁入神呀？」Vicky 發現到我的心不在焉，「仲掛住你個 Carey 呀？」

「掛住佢咪追囉～ 而家追應該仲追得倒...」Vicky 打量著我說道。

很明顯，她口不對心。

「哦？我冇呀～」我編了一個謊話，「我喺度諗緊，點解 Dickson 會知道我哋喺呢度...」



「同埋，如果佢發現泫雅原來唔係同我哋失散，佢會唔會返轉頭質問我？」

雖然這是我臨時編造的藉口，但我所說的，也絕對有可能發生。

「其實我同素恩都覺得有啲奇怪...」她答道，「照計就算有人跟蹤我哋，都冇可能咁清楚我哋喺邊個單位...」

「除非，有人通風報信...」Vicky 補充。

其實我也是這樣想，甚至懷疑通風報信的正是素恩。

可就 Vicky 所言，又好像不是她。

我真的攪不清楚...

「咁會唔會，佢哋一直喺暗角監視緊妳哋？」我推論道，「如果佢哋鎖定咗妳哋喺邊一棟大廈，再留意吓妳哋喺夜晚嘅活動...」



「要知道妳哋喺邊，亦都唔係太難...」我把玩著窗邊的白蠟燭說道。

「係喎～ 我哋喺夜晚有點蠟燭㗎喎～」Vicky 也發現了問題所在。

只是，以素恩一向的處事手法，這未免太過輕率了吧！

甚至，還把燃點了的蠟燭，放到外人容易發現的窗邊。

直覺告訴我，這絕對不是一時大意。

但她為何刻意的引導他們到來？

她跟 Dickson 是一伙的嗎？難道她又不怕，招野到其他敵人？



看來，一切都不是那樣簡單...

而令我感到不安的，是我突然覺得，留在這裏好像並不安全...