［人性/有甜］- 屍•家•馬鞍山（隔日更新）: Chapter 641 - Keith 的行蹤

「拎開塊紗布先...」巧兒著我先把紗布移開。

「吱～」巧兒再往阿賢的傷口噴射。

這一次，滲血的情況終於有所改善。

「繼續，㩒多陣...」巧兒示意我再把傷口按壓。

如是者，又過了十多分鐘。



「Okay... 幫我咁樣㩒住...」巧兒要求我調整角度，好讓她為阿賢進行包紥。

看到阿賢那蒼白的嘴唇，可想而知他受的傷也不輕。

「之後就睇佢自己喇...」巧兒擔憂地看著他，「如果冇細菌感染，應該唔會太大問題嘅...」

「阿 Roy，可唔可以幫我搬佢上返床上面？」巧兒請求道。

「Okay... 冇問題...」話雖如此，但我花盡了九牛二虎之力，才半拖半拉的把阿賢放到床上。



「啊！好攰...」我累得跌坐在地上。

「唔該曬你...」巧兒趨前向我說道，「你落樓下唞唞先啦！一陣我整啲嘢比你哋食...」

「喔！我哋有帶嘢食，我諗唔洗喇！」我想起他們說過的下藥事件，使我不禁立刻拒絕。

「嗰啲嘢邊好食㗎？」巧兒回應道，「起碼都食啲熱嘢吖！」

「真係唔洗哩～」我堅持拒絕，「吖話時話，頭先阿賢話可以借套甲比我，副嘢喺邊度？」



「吖...」她思考了一會，但好像沒有打算回答，「其實我都唔知道，佢收埋咗啲嘢喺邊度...」

「妳講笑咋嘛？妳會唔知？」我十分質疑。

「我呃你做乜？」巧兒堅定否認，「阿賢佢唔會咁輕易信人，包括我在內...」

看到她流露出有點難過的神情，我便立刻追問道，「佢係咪發生過啲咩事？」

「唉...」巧兒好像有很多的鬱結想傾訴，「阿賢之前有個好兄弟，一直同佢出生入死...」

「不過有一次，佢哋比喪屍圍困，結果...」她表情變得深沉，「佢朋友喺重要時候出賣佢，攪到佢差啲冇命...」

我不以為然，因為這些出賣和背叛的戲碼，每一天也在上演。

「冇辦法啦！喺呢個世界生存，好多人都會不擇手段...」我回應道。



「不過...」巧兒好像不太同意，「咁做未免太過...」

我對巧兒的話感覺有點奇怪，她剛才不是向阿賢提議過，要讓我們變成他們的奴隸和食物嗎？

「哈哈！我估唔倒妳會咁講...」我直接把心裡所想道出，「妳之前先同阿賢講要殺死我哋...」

巧兒隨即變得沈默...

「所以點都好啦！呢啲嘢都無謂太執著...」我回應道，「每個人為咗生存，都會做盡自己都估唔倒嘅嘢㗎喇...」

「嗯...」巧兒點頭回應，「不過，佢個妹都因為咁失咗蹤，所以...」

不知怎的，我並沒有因此而覺得，阿賢值得同情。



在這個時勢，每個人都不斷找籍口為自己的惡行開脱。

好像，人們都已經習以為常...

大家都把底線越放越低...

「咁阿賢有冇同妳講過，見倒一個奇怪嘅人...」我只好另作打探。

「奇怪嘅人？」她好像不明所以，「我好似冇聽過喎～」

「啊？係呀？咁冇嘢喇...」我只好放棄。

「不過話時話，我好似聽過阿賢話，見過一個好好打嘅人...」巧兒好像回想起來。

「咁你有冇聽過，佢喺邊度見倒嗰個人？」我追問道。



「吖... 阿賢佢好似講過，喺帝琴灣附近見過佢...」巧兒憶述道，「佢當時應該去緊馬鞍山方向。」

「阿賢嗰陣出去搵物資同阿妹，諗住返嚟嗰陣，突然有一大班喪屍喺屋苑入面衝出嚟...」巧兒續說，「佢好快比喪屍包圍，唯有焗住同佢哋死過...」

「佢著住幅甲，一開始都叫應付得嚟，不過班怪物打極都唔死，阿賢開始頂唔住...」

「就喺佢諗住搏命突圍嗰陣，嗰個人就突然出現...」巧兒敘述著。