［人性/有甜］- 屍•家•馬鞍山（隔日更新）: Chapter 588 - 下一個目的地 (明天停更一天，早一日分享給大家)
「出發？我哋要去邊度呀？」我想問個明白。
「吓？你係真唔係呀？」Clara 帶點責難的語氣，「你完全唔記得咗 Venus 嗱？」
「我... 我點會唔記得？」我強作鎮定地反駁道，「只不過，喺未諗倒點對付隻石頭怪之前，貿貿然出手盞全軍覆沒...」
「更何況，Venus 佢唔係要潛入去打探消息咩？做乜突然咁急要救番佢出嚟？」想深一層，她的行徑的確有點奇怪。
「哈哈！我都係講吓笑啫！」Clara 突然張起笑臉道，「我哋人手實在太少，要發動攻擊，首先要多啲人幫手...」
「咁... 即係點呀？」我有點摸不著頭腦。
「琴晚到今朝當值緊嗰陣，你有冇發現啲乜嘢？」她向我問道。
既然她有此一問，想她必已經留意到，大網仔迴旋處的情況。
「我發現... 之前喺大網仔迴旋處集結嘅嗰班喪屍，已經全部唔見曬...」我答道。
「嗯...」Clara 想了一想後答道，「我琴日發現 Dickson 佢哋喺隻遊艇上面，所以而家係一個大好機會，同佢哋會合...」
難道，昨晚她真的喝醉了？
「妳嘅意思係，已經搵倒 Dickson 佢哋喺邊？」我假裝驚訝地問到。
「嗯... 我琴晚見倒，佢哋應該喺隻遊艇度...」Clara 答道。
「咁... 咁仲等啲咩呀？」我興奮地說道，「即刻出發啦！」
說罷，我便準備動身離開。
「咪住！你唔好咁衝動先...」豈料 Clara 把我喝止，「呢個亦有可能係陷阱...」
我頓時停下了腳步。
「你試諗吓... 啲喪屍一直喺嗰度徘徊，但係突然喺一夜間消失...」Clara 分析道。
「除非異生教有乜嘢行動... 如果唔係，個情況就好似有人特單調走啲喪屍，比個氹我哋踩咁...」她進一步解釋。
「不過如果對方有心對付我哋，佢哋大可以直接攻擊呢度吖，又洗乜多此一舉？」我還有點想不通。
「呢個，亦都係我諗唔通嘅地方...」她說得有點無奈，「不過，呢度係異生教個大本營出去嘅必經之路，而你同阿良都冇話見倒佢哋經過，咁係異生教做嘅可能性又好似唔大...」
「唉！直係頭痛...」Clara 拍著額頭說道。
「既然咁多未知數，不如出去睇睇咩一回事？」我提議道，「嗱，我哋小心啲去遊艇方向走，就算真係遇倒咩事，我哋都盡力同 Dickson 會合咗先啦！」
當然我最擔心的，是 Carey 的情況。
「嗯... 我都同意你都諗法...」Clara 表示認同，「不過安全起見...」
「阿良，你出去搵多部車先...」她轉向良哥吩咐道，「你有十分鐘。」
「係，知道！」Clara 一聲令下，良哥便立刻轉身離去。
「一陣我同阿良行先，你同其他人喺後面跟住...」Clara 再向我安排道，「而家你同班 friend 準備定先啦，一陣搵倒車就出發...」
我再次回到屋內，向各人說明之後的安排。
他們都沒有異議，只是 Vicky 跟阿聰逕自在一旁有說有笑，好像沒有把我的話放在心上。
我知道，要令她原諒我，必先以行動去證明。
那，我應當怎樣做？
我想，必須先跟其他女性保持距離，才能展現我的誠意。
可是，我真的能夠辦到嗎？
可我還沒有想透，Aki 卻已經像小貓般飛撲了過來。
這個小惡魔...
「咦～ 你知唔知道你搞到人哋好攰呀！」Aki 摟著我撒嬌道。
我立刻往 Vicky 的方向望去，卻發現她仍然與阿聰談笑風生。
反之，鋭利的目光卻從 Suki 那邊傳來。
「Aki... 妳唔好咁先啦～」我扭著腰想要離開，可是不得要領，「妳不如同我一齊去執定啲乾糧，以備不時之需啦！」
沒有辦法脫身，我只好拉著 Aki 走進廚房，以遠離其他人的視線。
但當我們進入了無人的空間，Aki 的手便急不及待的在我身上探索。
「喂，轉頭就要出發㗎喇！我哋再唔快啲攞，一陣就要捱餓㗎喇！」我不想令她不悅，只好以這籍口讓她知難而退。
「咁好啦！今晚先再曳曳...」幸好她終於肯放棄，跟我一起收集一些易攜的乾糧，準備隨時出發...