［人性/有甜］- 屍•家•馬鞍山（隔日更新）: Chapter 551 - 志宏與泫雅

看來，那個泫雅並沒有看上，這個可憐的志宏。

「咁之後呢？」我急不及待問道。

「原本我哋一直都相安無事，不過之後有一日...」志宏的聲線開始變得沉鬱，「我同我個 friend 好似平時咁落去街市搵嘢食，但就喺我哋想走嗰陣，突然就有班喪屍出現...」

「本來兩、三隻喪屍我哋都可以勉強應付，但係嗰日嘅喪屍出奇咁多，我哋諗都冇諗，就即刻掉頭走...」

「我哋喺街市入面一直走，希望走得甩，但係啲喪屍真係太多，咁我哋唯有決定分頭走，希望可以返番入屋裡面...」



「不過，最後淨係得我返倒去... 我個 friend... 就再冇出現...」

「你哋係喺日頭出去搵嘢食？」我插口問道。

「係...」志宏無奈地答到，「不過後來先知道，咁樣係等於自殺...」

「嗯...」我明白，經驗都是由別人的犧牲組成。

「咁因為街市已經唔再去得，我哋嘅糧食好快就出現咗問題。我哋冇曬辦法，唯有試吓冒險過去，運動場對面嗰間超級市場搵物資...」



「不過，我完全唔知道，咁樣等於推佢哋去死...」志宏看似有點悔疚，「結果行咗冇幾遠，我哋就被喪屍發現狂追...」

「我理唔倒咁多，唯有拖住泫雅就搏命咁走，不過最後，我哋冇地方走，困咗喺間舖入面...」

「我入到去即係攞嘢頂住度玻璃門，不過，唔洗一陣，啲喪屍就衝咗入嚟...」

「我哋都諗住死緊，點知喺重要關頭，班喪屍就突然停曬手腳，淨係企曬喺度張牙舞爪，但就冇再行埋嚟...」

「跟住班喪屍就好奇怪咁向後退，然後就有過身穿白袍嘅男人同幾個手下走咗入嚟，話帶我哋去安全地方...」



「呢個人，就係嗰個金神使...」他咬牙切齒地說道。

原來，他跟我在馬鞍山決戰後，便走到了西貢這裡來。

難道他那天的落敗，也是早已安排好了的嗎？

「嗰個人見倒我哋，就同手下講，淨係帶走女嘅就得。泫雅見倒咁嘅情況，就跪咗喺度苦苦哀求金神使救我...」

「而嗰個賤人...」志宏又變得激動，「竟然同泫雅講... 要泫雅以後都服侍個賤人，佢先會救我...」

「估唔到泫雅諗都冇諗，就即刻應承咗佢...」他說得咬牙切齒。

我一點也不覺得奇怪，因為我認識的孝信，便正正是這一類人。

「如果你唔想泫雅服侍佢...」但我覺得有點不合情理，「咁你冇同金神使講，唔洗佢幫咩？」



志宏的表情立刻變得尷尬。

「我... 我怕比班怪物分屍...」他呑呑吐吐地答道。

果然，他也是個貪生怕死之徙。

而直覺告訴我，那泫雅是心甘情願的服侍孝信。

「咁都好難怪你...」我只有勉強打完場，「不過如果有機會，我都想見一見呢個女仔...」

「你其實都應該見過...」志宏答道，「佢每次都會喺頭先換衫嗰度幫手，今日個儀式開始前都見過佢，不過之後應該走咗...」

「可能... 走咗去同孝信一齊...」志宏說著有點失落。



「哦... 係... 係咩？」我感到有點不安，「不過佢喺個儀式入面幫手，就唔怕比人攪咩？」

真的想不到，事情會這麼湊巧。

「哼！金神使嘅女人，邊個夠膽掂？」志宏答得有點不快，「我就連行埋去同佢傾吓計嘅機會都冇呀！」

我想志宏萬萬也想不到，他千方百計想要親近的女神，竟然被我這樣糟蹋。

「不過話時話吖，既然你咁憎金神使，點解你又會做咗佢嘅手下嘅？」我確實無法理解。

「咁... 外面咁危險，搵個靠山好啲...」志宏答得有點尷尬，「更何況留喺度幫手，可以留意住泫雅嘅情況...」

「呃... 到喇，神使...」我們走到了一樓房外面，志宏努力引領著方向，「話時話，神使點稱呼？」

「我姓馮...」我打量著眼前的人，覺得他的一切都不可信。



甚至，有點後悔委託了他去幫我。

但是，我卻沒有更好的方法。

只好見步行步吧！