［人性/有甜］- 屍•家•馬鞍山（隔日更新）: Chapter 536 - 同行的人選

「我... 我有妳本寫真...」阿聰面紅耳赤地答道。

原來，他只是個忠實支持者。

「妳唔會同 Roy 哥...」阿聰看著我和 Aki，覺得有點不可置信。

「嗯...」Aki 只是輕輕地點頭。

阿聰頓時流露出，既羨慕又妒忌的神情。



這一刻，我感到莫名的驕傲。

「阿 Roy 哥，你唔係有 Vicky 姐喇咩？點解又同 Aki 一齊呀？」心生忌妒的阿聰，竟不惜出言分化我跟 Aki 的關係。

我不屑與他計較，只是淡然地回應了一句，「你，唔恨得咁多㗎喇...」

說罷，我便主動地拖著 Aki，走到 Clara 的營帳面前。

「哼！你終於肯返嚟嗱？仲諗住你就咁走咗去添！」Clara 剛剛與我見面，便急不及待的向我挖苦道。



「說來話長，我哋入去先傾...」為免隔牆有耳，我示意 Clara 內進詳談。

「阿 Roy，Vicky 呢？乜佢唔係同你喺一齊咩？」沒有看到朋友身影的 Suki，亦緊張的向我問到。

「放心，佢而家喺好安全嘅地方，晏啲再同佢會合。」我安撫 Suki 不要擔心，然後與各人進入營帳之中。

為免被人竊聽，Clara 還特意吩咐手下在外面把風。

「真係？」Suki 用質疑的眼神看著我，好像不太相信。



「嗱！妳唔信就問吓佢喇！」我向 Suki 她們介紹，「佢叫阿聰，Vicky 嘅情況佢都知道...」

「係... Suki... 姐...」阿聰戰戰兢兢地答道，「我真係見到 Roy 哥帶住 Vicky 姐去咗前面嗰間大屋度，佢應該都安全...」

「佢話要幫手照顧生還者，所以暫時留喺嗰度...」我補充，「啱啱阿 Rex 威脅我今晚要幫佢手，我估佢可能安排我去接一班，喺第二度捉嚟嘅活人...」

Clara 聽得有點摸不著頭腦，於是我向她簡述一下，今早我在大網仔路的經歷，這才令她明白事情的來龍去脈。

「照你咁講，佢哋經水路運入嚟西貢嘅話，應該會經西貢碼頭或者早禾坑碼頭兩條路...」Clara 分析道。

「正常咁諗，今晚跟住 Rex 班人，應該就可以知道佢哋係邊度上岸...」

「不過，頭先你話班人好似有心放你哋走，所以我都唔排除，佢哋特登洗走你。」

是的，我好像沒有想到這一點。



那亦正好解釋，異生教置我於不顧的原因。

「所以我今晚應該唔會有咩收獲？」我終於明白。

「嗯...」Clara 點頭回應，「不過安全起見，我哋都係兵分兩路，你跟阿 Rex 出發，而我就帶其他人去第二個碼頭。」

「咁妳點知我哋去邊？」我問。

「好簡單，我哋先會去近啲嘅西貢碼頭附近，睇吓你哋喺唔喺度。」Clara 進一步解釋道，「之後我就睇情況，趕去另外一個碼頭...」

原來，她已經計劃好一切。

「我頭先喺嗰邊圍欄外面，留低咗部單車，妳可以用嚟代步。」我想提供多一點的幫助。



「嗯... 不過阿 Roy 你要記住，我哋今次淨係要 locate 敵人嘅位置，知道咗之後，記住返嚟從長計議，千祈唔好私自行動...」Clara 叮囑道。

「Okay... 明白！」她指揮若定，我亦只好乖乖聽命，「如果阿 Rex 真係比我帶多個人，Suki 妳可唔可以同我去？」

我想，Suki 的戰鬥力應該能幫我一把。

「Okay...」Suki 亦欣然答應。

「阿 Roy... 我想去...」如我所料，Aki 亦打算同行。

「今次唔得，因為可能會有危險...」我不想太多顧慮，「同埋我哋都係出一出去，打探完消息就返。」

「吓... 你又留低我喺度呀？」Aki 十分不滿，「你話過唔會揼低我嗰喎！」

「我知，不過...」我實在有點左右為難。



「Roy 哥，不如比我留低保護 Aki 吖？」阿聰自告奮勇地提議道。

「吓？咁咪仲驚...」Aki 明顯不受落，「我唔得囉！」

「總之，我就一定要痴實你㗎喇！」Aki 看來十分堅決。

「我知！不過今次真係好難講...」我答道，「如果 Rex 真係同異生教夾埋，今次行動可能會有危險...」

「我唔理！唔通留喺度就冇危險喇咩？」Aki 仍是不肯輕易罷休。