［人性/有甜］- 屍•家•馬鞍山（隔日更新）: Chapter 511 - 西貢市中心

「記住！千祈唔好接戰，遇倒危險就即刻走...」Clara 在他們出發前千叮萬囑道，「總之要整整齊齊咁返嚟！」

「明白！」二人回應後便出發。

反正要等待二人的消息，所以我便打量一下四周的環境；原本這個每逢假日都被擠得水泄不通的西貢市中心，現在就猶如一個死城一樣。

除了警署內的微微亮光，和那淡淡的月色映照外，基本上全個西貢市中心，都是一片漆黑。

不！在警署旁的室外運動場，看來也泛著一點燈光。



若然警署真的不能輕進，我們亦能退而求其次，向運動場進發。

我向 Clara 示意，她亦認同我的發現。

而不消一會，光哥和良哥亦在打探之後回來。

他們剛剛到步，便急不及待的向我們報告外面的情況。

「警署入面一定有人，而且為數應該唔少...」良哥說道，「以我哋而家嘅實力，要強攻根本就冇可能...」



「不過...」良哥繼續說道，「頭先我哋喺大門附近嘅時候，我哋見到入面嘅人準備外出...」

「嗯... 咁好啦！」Clara 想了一想後說道，「佢哋選擇夜晚外出，即係佢哋都知道喪屍嘅習性。」

「而且佢哋嘅地方睇嚟都比較安全，出去不外乎去搵啲食物同日用品...」Clara 分析道，「與其等佢哋出嚟，不如我哋兵分兩路，一組人繼續留喺呢度戒備，另一組人就去附近超市埋伏...」

「我諗，佢哋都唔會去倒太遠...」Clara 補充，「不過大家記住，我哋主要係制服佢哋，所以免得過就唔好傷人。」

「照妳咁講，點解我哋唔索性補充完物資就走，再唔係直接同佢哋講，我哋想加入佢哋囉！」不明所以的 Aki 問道。



「阿光，交比你解釋...」Clara 明顯有點不耐煩，「阿 Roy，你同阿良去附近嘅超市埋伏，okay 嘛？」

「我 okay，不過...」我看著 Vicky 她們有點遲疑，「我想帶埋佢哋一齊去。」

「Up to you... 雖然留喺度都唔一定安全，不過同你一齊行動，危險性實會高啲...」Clara 回應道。

她說得不無道理，於是我只好交給她們自己作出選擇。

「我唔想留喺度...」Vicky 的言下之意，是要跟隨著我。

「Vicky 出去，我都跟住...」Suki 亦立刻加入我的行列。

「喂咪住呀！我都唔要留喺度呀！」正在聽取光哥解釋的 Aki，亦急不及待嚷著要跟我一起。

「妳唔係仲問緊點解嘅咩？」我忍不住譏諷她一下。



「超！佢哋話呢人唔會咁易比人喺勢力範圍內，拎走佢哋啲嘢喎！」Aki 不屑地答道，「所以一定要俾個下馬威佢哋，佢哋先會屈服喎！」

其實，Clara 所說亦正是我的所想。

在同一範圍下出現不同勢力，後果自得一個。

我對此別無異議，只是我一直也想不通，為何 Clara 不去求助於她們背後那強大的支援，再派出多一點人手，甚至派遣像我們在貨輪上遇到的同級怪物。

反之，卻選擇跟著我們一班戰鬥力低下的人。

是否出了什麼差錯？抑或是在背後潛藏著什麼陰謀？

我就乾脆跟隨著她們擬定的劇本進行吧！



「既然係咁，你哋就小心啲喇！」Clara 叮囑道，「總之，齊齊整整咁返嚟...」

「我哋都會遠距離睇住，如果你哋入咗去十分鐘都冇比 signal 我哋，我哋就衝入去！」Clara 補充道。

「Okay...」簡單收拾後，我們便前往附近的一間超市埋伏。

沿途的敵人不多，偶爾遇著一些擋住前路的落單喪屍，我曾經想過把它一下解決。

但當我想到，這很有可能為我們的埋伏留下不必要的線索時，我便決定繞道而行。

雖然時間因此而用多了，但我們還是成功趕在對方到達之前，作出埋伏。

我們選擇在超市前的一個被破壞了的商舖內躲藏，等待他們到來開門時，才衝出去把對方制服。

「一陣間你哋留喺度得㗎喇！我轉頭會返嚟帶妳哋走...」我向她們叮囑道。



無疑，我自己行動會比較自在。

「咪痴線啦！放我哋喺度！一陣又唔知有冇變態佬嚟攪我哋喇！」豈料 Aki 的反應很大，「頭先喺船上面仲見番嗰個衰人，仲扮到好似唔識我咁添呀！」

「船上面咁多人，你講邊個呀？」我假裝不解地問道。