［人性/有甜］- 屍•家•馬鞍山（隔日更新）: Chapter 488 - 力量提升的秘訣
「Veronica? 佢唔係乜嘢生化危機處理小組嘅人咩？」我實在攪不清。
「係...」Clara 再次打量著我，「估唔到你都知道唔少嘢㗎喎...」
「呢樣係 Veronica 自己同我講嘅...」我回應道，「咁點解佢又會幫妳哋嘅？因為 Jacky？」
「你都估到啦！」Clara 好像有點不屑，「主要都因為 Jacky...」
我完全明白...
我還記得當天，Jacky 為了保護 Veronica，竟不惜將靈魂賣給惡魔，令自己陷入一個萬劫不復之地。
「嗯...」我點頭示意。
「Veronica 就係用 Jacky 犧牲自己而換返嚟嘅抗體，作出進一步嘅研究。」Clara 解釋道，「結果研發咗一種令人立刻變異嘅藥...」
「雖然因為資源有限嘅關係，隻藥嘅穩定度亦唔高。但至少可以令我哋喺呢班怪物面前，挽回唔少劣勢...」
「之後 Veronica 仲用啲抗體，提取咗一啲病毒嘅原坯....」Clara 續說，「你所講嘅 "啫喱怪" ，都係佢嘅傑作...」
想不到，她竟然這樣出色。
「不過就算 Veronica 研究咗啲藥，都只係令你哋變異啫，冇理由突然變得咁好打㗎？」我問道。
「我就算努力去提升力量，都好似進展得好慢...」我說著有點尷尬。
「因為...」Clara 遲疑了一會後回答，「你用錯咗方法...」
「唔係... 應該咁講...」Clara 想了一下再道，「你用嘅方法係啱，不過對象錯咗...」
這令我更摸不著頭腦。
「我諗你一定知道，同異性行埋就可以提升力量啦！」Clara 繼續解釋，「不過，如果你搵嘅只係普通人，個效果會差好遠...」
這還是我第一次聽到。
「咁邊啲先唔係普通人？」話語剛出，我便好像想到了答案，「唔通... 就係我哋呢啲感染咗病毒嘅人？」
「嚴格嚟講，係注入咗病毒原坯嘅人...」Clara 答道。
「或者簡單啲講，就好似打機升呢咁...」Clara 補充，「你打普通怪有 10 EXP 嘅話，打大佬就有 100 EXP。」
「所以我先講，搵啱對象好重要...」Clara 再次打量著我，「當然，大佬唔係咁易遇倒...」
她進一步向我靠近，我亦十分明白她的意思，但這一刻，我只想獲取多一點的情報。
「咁唔通， Dickson 都係？」說罷我慢慢從她身旁移開。
「嗯...」她只是點頭回應。
「咁妳同 Dickson 咩咪得囉！」我立刻將視線轉移。
「唉... 你估我冇試過咩？簡直係瘋狂咁試添啦！」Clara 無奈地答道，「不過後嚟我哋知啲，不斷搵同一個對象做，力量係唔會無止境咁提升...」
「所以我哋推斷每一個 partner 比倒你嘅 EXP 係有上限，所以如果你同同一個 partner 做耐咗，就要轉過第二個...」Clara 繼續解釋。
「咁你而家知道，我搵你入嚟做乜啦！」Clara 說罷，又再次向我靠近。
「Okay！咁妳不如話我知，妳係企喺邊邊㗎啦！」我想先要弄清敵我。
「哈哈！我咪講過，我哋係 CIA 派嚟嘅囉！」Clara 不忿地答道。
「呢個係之前嘅情況，我要嘅，係而家個答案！」我覺得她這樣執著去把自身的力量提升，一定不是純粹為了任務這麼簡單。
「我唔明你問乜喎！」Clara 仍是不慌不忙地答道，「我所做嘅嘢都係為咗國家、為咗全人類！」
「你唔可以質疑我！」Clara 咬牙切齒地說道。
「Okay... Okay...」我無謂迫虎跳牆，「聽妳咁講，即係你哋嗰日係諗住阻止隻船去台灣？防止病毒喺嗰度散播？」
「我咪講咗囉！信不信由你！」Clara 有點不快。
「咁如果妳哋真係要阻止隻船去台灣，點解又要中途放棄走咗去？」我覺得她的說話有點可疑。
「因為隻船係唔會去倒台灣嘅...」Clara 淡淡地說道，「我哋撤退之前，已經喺船上面裝在個定位裝置，台灣軍方收到資料之後，就會將隻貨船擊沉...」
回想起來，當天若不是我決定離開，我們一夥人定必成了海上亡魂。
但是，她說的支援，該不是那三艘被擊沉了巡邏船吧？
可事已至此，我們亦自身難保，台灣人的下場，只能聽天由命了...