［人性/有甜］- 屍•家•馬鞍山（隔日更新）: Chapter 483 - 遊艇上的對話

登船處有兩個門衛把守著，但不知道是否 Clara 早有吩咐，他們並沒有對我們的內進作出阻攔。

我們走進船艙，卻見 Clara 跟 Tommy 一起談論著。

「喂阿 Roy！」Clara 走過來說道，「雖然預咗你會嚟，不過真係冇預到咁快...」

我打量了 Tommy 一下，他只是露出了一個尷尬的笑容。

「Aki... 乜妳都喺度呀？」Tommy 向 Aki 問道。



「係呀！我仲未死得！係咪好失望呢？」Aki 對她冷嘲熱諷道。

「嘿嘿！見妳特登嚟搵我，慌唔係掛住我咩？」Tommy 自信滿滿地答道。

「掛你個頭！我睇你死得未咋！」Aki 不屑地答道。

「嘿嘿！妳入得嚟，妳覺得我會咁易放妳走咩？」Tommy 威脅道。

我留意著他那擺動自如的雙手，看來他那被我扭斷了的手，已經被人重新較正。



可是，在這樣缺乏物資的環境下，又有誰能幫他復原？

「咦？你隻手冇事喇咩？」我試探地問道。

「哈哈！小意思啦！」Tommy 自信地答道，「呢度有唔錯嘅醫療，佢哋攪咗一陣，我就已經可以活動自如喇！」

雖然他好像說得有點誇張，但我看著他，確實可以活動如常。

「話時話，估唔到你到而家仲未死...」他不忘譏諷著我。



「哈哈！好笑喇，你都未死，我又點會死先呢？」我反駁道，「不過，我諗唔倒你做咗人哋嘅走狗啫。」

「呢啲叫識時務...」他不忿地答道，「喺呢個世道，有人保得住你條命仔，認少少低威又有乜所謂...」

這就是弱者的所謂生存之道嗎？

「睇嚟，你都係嚟做人隻走狗啫，咁又有乜嘢分別？」他還是繼續挑釁道，「吖唔係！我加入先嘅，你應該叫我做大佬先啱！」

原本我不想與他再作糾纏，但看著他那不可一世的嘴臉...

「Clara，如果我話殺咗條 PK 我先考慮加入，妳會點做？」我試探她道。

「咔嚓...」Clara 二話不說，手槍的槍口已經貼在 Tommy 的太陽穴上。

「吖... Cla... Clara 姐...」這一刻的 Tommy，應該被嚇得屎流尿瀨。



「等你一句...」Clara 向我示意道。

她的舉動，真的嚇了我一跳。

我十分相信，她就會這樣的在我面前把 Tommy 殺掉。

「我... 未考慮清楚... 暫時留住佢條命仔先啦！」我差點就被她的氣勢嚇倒。

「Okay... 有決定就話比我知...」Clara 亦好像有點得意。

「係呢？妳哋下一步諗住點呀？」我問道，「會唔會有咩任務？」

Clara 打量著我，卻沒有說話。



「哈哈，你都幾好笑㗎喎！」Clara 掩著嘴笑說道，「叫你加入又唔制，又要問我哋想點...」

「乜你覺得我又會答你咩？」Clara 又再次收起笑容。

「冇嘅！我都係問吓啫...」我回應道，「妳肯講咪講囉。」

「好！咪又話我哋冇啲誠意喇...」Clara 竟也答應。

「唔怕話你知，九龍同港島一帶基本上已經封鎖咗，所以坐船去嗰度基本上冇乜可能。」Clara 開始說道。

「新界近岸地方嘅情況應該差唔多，所以無謂冒險...」

「你都見倒，隻船係仲有少量嘅燃油嘅。但係我哋一嚟要 make sure 啲油足夠隻船嘅基本運作，二嚟要準備有咩突發事件，我哋都夠油走得甩...」

「所以我哋始終都係著手搵吓有冇燃油先，跟住就返去相對冇人把守嘅西貢馬鞍山一帶...」



西貢馬鞍山？

既然她們可以離開，為何還要執著回去？

「照妳咁講，應該有人同妳通風報信啦！」我試探地問道，「咁妳可唔可以話我知，西貢同馬鞍山以外嘅地方，依家係咩嘢情況？」

「呵呵！與其問我其他地方點，我諗你最想知嘅，反而係點解我哋要返西貢同馬鞍山啦？」Clara 突然向我靠近，「我講得啱唔啱呀？」