［人性/有甜］- 屍•家•馬鞍山（隔日更新）: Chapter 436 - 船上物資

「係，可唔可以幫吓手...」我決定忍辱負重。

「嘿嘿！幫你，我有乜著數先？」Tommy 竟向我開出條件。

「Dickson 返到嚟你都唔慌有運行，最多我幫你解決咗佢？」我回應道。

「幫我？你原本已經想殺咗佢㗎啦！」他不屑地答道，「你呢個條件好似唔太吸引喎！」

確實，我只打算賣一個順水人情。



「咁你想點？」我亦不想繼續蹉跎，只有主動詢問他的要求。

「其實我要求好簡單，條女你都玩厭㗎啦，不如就留低佢喺度陪我啦！」想不到他仍是死性不改。

這根本是得寸進尺。

「你諗都唔洗諗，夠薑你就唔好開門！」說罷，我已經向 Carey 示意，準備往趟門撞去。

Carey 亦機警地把 Aki 拉往一旁。



「嘭！」我運勁踢出一腳，趟門便應聲往房內飛去。

我亦沒有打算給他任何喘息的空間，緊接著便往房間內衝去。

Tommy 亦來不及作出任何反應，只能呆坐在床上。

如我所料，他只是在虛張聲勢。

而我的右手，亦已經把他的脖子緊緊握住。



「你頭先咪好巴閉嘅，而家冇聲出嗱？」我緊握著他説道。

他的樣子看來十分痛苦，於是我把力度放輕，以免錯手把手殺掉。

「喺我未摙死你之前，你好講喇吓！」我作出最後通牒。

「咳咳... 好... 我... 我講...」Tommy 痛苦地答道。

我把 Tommy 放開，讓他跌坐在床上。

「咳咳... 係下層個雜物房度，有一條伸縮鋼梯...」Tommy 慢慢地說道，「不過我就唔知道，佢夠唔夠用...」

「你係講堅至好呀！」我警告著他道，「比我知道你玩嘢，我實有排你受！」

「仲... 仲敢玩嘢咩大佬...」Tommy 惶恐地答道，「不過條梯如果唔夠長，就唔關我事喇...」



「你條友帶曬頭盔咁，好明顯條梯都唔慌有用啦！」我感到有點氣憤。

「我知... 不過我呢度都只係得呢一個方法，用唔著我都冇計...」Tommy 帶點無奈地答道。

「總之冇用你就知味道！」沒有辦法，我亦只好暫且相信他，「你仲坐喺度？帶路啦！」

「係嘅大佬，即到！」他說罷立刻從床上跳下來。

他帶著我往船的下層去走，然後走到一房間外面。

「就係呢度...」Tommy 示意著。

「不過條鎖匙就唔知去咗邊...」他說得有點尷尬。



我怒視著他，想去打他一頓。

「Sorry 呀！呢度啲鎖匙一早已經唔見曬...」看他說得真切，不像在説謊。

回想過來，他亦看來所言非虛，否則剛才已經把 Carey 的房門打開。

沒有辦法，只好訴諸暴力。

我打算強行把門撞開，但卻無意中發現，房門並沒有完全關上。

我把趟門拉開，然後打量著那偌大的雜物室，發現除了那鋼梯外，還放置著很多水上用品。

浮床、水泡、潛水衣、甚至是氧氣樽，可説是應有盡有。

這個人，真的十分懂得享受生活。



要不是這一場災難，他也不會落得如此下場。

但這刻我卻突然想到，一旦他重拾自由，重新擁有財富和權力，他又會否向曾經對他施以毒手的我報復？

看來，此人是留不得。

至少，現在也不能讓他得到自由。

只是，當下還未到殺他的時機。

因為一旦遊艇因故而無法啟動，他便是我們唯一的鑰匙。

於是我拿取所需後，便把他推進雜物房內，關上房門，讓它自動鎖上。