［人性/有甜］- 屍•家•馬鞍山（隔日更新）: Chapter 434 - Dickson 的懷疑

「對唔住 Dickson 哥！」Tommy 立刻哀求道，「係我亂咁吠，你大人有大量，放過我啦！」

看來，Tommy 正被 Dickson 持槍威脅。

「我警告你，如果你再阿趦阿趄，我就一槍打瓜你！」Dickson 怒道，「仲唔同我同我躝返入去！」

「係... 係...」沒有再多花唇舌，Tommy 已經如敗犬般逃竄。

外面再次回復平靜。



遊艇高速前進，看來很快便會尋回失去的目標。

我一直留意著門外面的情況，直到腳步聲再次往上層走去。

我為了進一步打探消息，決定稍為推開房門窺看。

視線之內，沒有其他人存在。

我聽到上層傳來的對話聲，於是我毅然走出房間，再次潛伏於梯間窺探。



「話時話，點解我個追蹤器會唔響㗎呢？」Dickson 正在質問著 Daphney。

「我都唔知你講乜追蹤器... 不過，會唔會係佢壞咗呀？」Daphney 冷靜地回應。

「哈哈！會唔會咁啱呀？」Dickson 質疑道，「呢隻嘢係軍用追蹤器，只要目標距離超過一公里，佢就會即刻通知我...」

但 Daphney 仍看似摸不著頭腦。

「我以為佢係隻普通手錶咋喎...」她說著有點委屈。



「妳真係唔知我講乜？」Dickson 的態度看來有所軟化，「妳好似對機械好有認識㗎喎！」

「哼！對機械有認識又等於知道呢啲嘢嘅？」Daphney 不忿地叫道，「你都識講係軍用嘢啦，我又點會知喎！」

Dickson 一時無法應對。

「你唔信我就算！」Daphney 說著便要離開。

「Daphney！」豈料 Dickson 立刻把她拉住。

「對唔住！佢哋唔見咗我好緊張，一時控制唔倒...」Dickson 把 Daphney 摟在懷中，然後強吻著起來。

Daphney 面對他這樣突如其來的行徑，卻沒有逃離的意思。

二人打得火熱，我亦無謂再作打擾。



我返回房間，打算盤算一下該作的準備。

思前想後，我還是決定靜待事情的發展。

而在此時，Carey 亦已經梳冼完畢，正從洗手間走出來。

頭髮仍是微濕的她，帶給人另一種的感覺。

「做乜眼甘甘咁望住人喎？」Carey 給我注視得有點不自然。

「冇... 我覺得有個咁靚嘅老婆，我好幸福啫...」我回應道。

「口花花，信你至奇呀！」Carey 一邊表示不滿，一邊卻已經坐到了我的雙腿上來。



「我講真㗎！」我誠懇地說道，「不過你唔信就算...」

「係喇，信你喇！」Carey 嘺嗔地答道，「不過，我哋而家點呀？」她刻意壓低聲音問道。

「唔... 我哋暫時跟住佢哋先...」確實，這是唯一可行的方案。

「嗯... 你話點就點啦！」她固然同意，「不過...」

「唔洗擔心，我頭先聽佢哋講，隻遊艇應該返緊轉頭，所以我哋好快會同 Keith 佢哋會合㗎喇！」我興奮地答道。

「其實，我擔心嘅並唔係呢樣野...」她帶點無奈地回應。

想不到，我竟也誤解了她的意思。

「我只係想講，以後唔好比我見倒 Dickson...」Carey 認真地説道。



我明白她的苦衷...

現在的她，已經無法去面對 Dickson。而作為始作蛹者的我，是否也一樣對他有所虧欠？

話雖如此，但很明顯，Dickson 跟我並不是站在同一陣線。

若然要我親手解決他，我也無法不痛下殺手。

一切，就順其自然吧！

而在此時，我的心跳亦不斷地在加快。

因為我感到，遊艇再次減慢速度。



我立刻拉開窗簾窺看，果然看到巨輪出現在眼前。

面前的貨輪，就彷似失去了動力一樣，孤寂地在大海中漂浮...