［人性/有甜］- 屍•家•馬鞍山（隔日更新）: Chapter 419 - 隱蔽的敵人

「大佬，你打算點對付啲狙擊手？」Keith 看來還是未放心。

「我諗佢長期用狙擊槍監視住我哋，應該會有盲點。所以我諗住用貨櫃做掩護，儘量接近佢，然後突然衝出去殺佢一個措手不及！」我興奮地比劃道。

可是，卻換來 Keith 質疑的目光。

「做乜，有問題？」我明白這計劃十分草率，但我實在沒法在這緊要關頭，想出一個更好的辦法。

「先唔好講我哋唔知佢哋喺邊...」Keith 解釋道，「我諗你都係估佢哋喺船頭嗰道啫！」



我點頭示意。

「雖然我都認為佢哋喺嗰度嘅機會好大，不過就算我哋走得快，都快唔過子彈啩？」Keith 續說。

「而且你假設嘅盲點，根本就唔存在！」Keith 突然認真地説道。

我有點摸不著頭腦，只有等待他的解答。

「我哋面對緊嘅係一班正規軍人，而且可以留番喺太師身邊嘅，更加係軍隊入面嘅精英...」



「你睇我哋已經有同伴死傷，咁你就知道佢哋唔係咁易對付。佢哋全部都係用緊正規編制對付我哋，所以我推斷，負責狙擊我哋至少有兩個人！」

「你嘅意思係，佢哋唔止一個 sniper？」我感到有點無奈，因為若他們不止一人，在互相支援下，我根本難以入手。

「我相信係，而且佢哋一般係以小組編制... 即係一個 sniper 加一個觀察員。所以我先話，你假設嘅盲點唔存在...」

我反復細想，他的話好像很有道理。

「咁你諗住點對付佢哋？」我只好聽一下他會否有什麼妙計。



「之前冇諗到佢哋有 Sniper，如果佢匿埋喺一個有利嘅位置，我哋多多都唔夠死...」Keith 無奈地答道。

我不想半途而廢，但實在也無計可施。

「話時話，Dickson 唔係同你一齊㗎咩？」我想多一個人參與，會較易找到解決方法。

「我哋之前遇到敵人，諗住分開行，點知轉個頭就已經唔見咗佢...」Keith 回答得有點冷靜。

「咁... 你唔去搵番佢嘅？」我好奇追問。

「嘿嘿！一個有心唔比你搵倒嘅人，直係咁易比你搵倒咩？」Keith 好像知道點什麼，「我始終覺得，佢唔似一個普通人...」

的確，以 Dickson 的身手看來，他一定受過某程度的專業訓練。

而他出現的時機，確實也有點巧合。



「如果我冇估錯，佢遲早都會再出現，所以完全唔需要擔心...」Keith 補充道，「反而，身為佢目標嘅我哋，小心比人暗算好過啦！」

看來，現在已經沒有可以信任的人。

「我都係出發喇，遲咗我怕華叔有危險...」始終，我不想耽誤太久。

「咁你係咪已經諗倒咩辦法？」Keith 好奇問道。

「冇！」我理直氣壯地答道，「我只係知道唔可以再等！」

「路，係人行出嚟嘅！」我霸氣地回應。

「咁不如...」Keith 看來有點擔心。



「唔洗喇，你不如同芷蕾交待吓芷晴嘅事仲好啦！」我快一步阻止他的提議。

「嗯...」Keith 若有所思。

「Okay... 咁你自己小心啲啦！」Keith 看來同意我的建議。

「你要記住，有好多人等緊你平安返嚟㗎！」想不到他竟也說出這樣肉麻的説話。

「大家咁話...」我趨前與他相擁，「總之，一切小心！」

事不宜遲，一輪簡單道別後，我們便再分道揚鑣。

我轉身往前，穿越身旁那一排又一排的貨櫃，快速地往船頭方向移動。

為免好像剛才那樣受到伏擊，我不斷依靠住貨櫃作掩護前進。



因為我知道，剛才向我們放冷槍的人，仍然潛伏在暗處，等待著機會。

稍一不慎，我便成了那些人的獵物。

在高度警戒之下，我終於也走到了貨櫃群的盡頭。

只要我再往前走，便暴露在一小段空曠地區之中。

我必須反應敏捷，才有機會突破火網去把敵人解決。

我深深的呼吸一下，便頭也不回的往前疾衝。

通往船首的階梯，已經出現在我的面前...