［人性/有甜］- 屍•家•馬鞍山（隔日更新）: Chapter 407 - 突入前準備

經歷了一輪沒有結果的討論後，我們還是先整理好自己，慢慢地走出房間。

從船艙內各人的表情看來，我們剛才的事都被他們聽得一清二楚。

「嘿嘿大佬，睇嚟你好想做老豆喎～」Keith 拍著我的肩膀挖苦著道。

我看一下素恩，她的頭低得好像快要跌下來。

而其他人則是一副奇怪的表情。



「其實，我哋而家喺邊？」我想弄清楚自己身在何處，順道把眾人的話題轉移。

「你都想知自己喺邊嘅咩？你攬住條女就夠啦！」芷蕾毫不客氣地叫道。

果然，她們還是十分在意。

「我哋應該喺前往海南島嘅途中，以我哋嘅船速應該可以趕喺太師去到海南島之前，追倒佢哋...」Keith 主動的為我解圍。

「其實佢哋去海南島做乜？」我好奇問，「果度係佢嘅基地所在？」



「呢層我都唔係咁清楚，照計太師應該會返去佢廣州嘅管轄範圍，不過可能中間發生咗一啲嘢，令佢哋突然改去海南島...」Keith 繼續說道。

「但係最奇怪嘅係，佢哋突然停咗喺海上面，冇再繼續向前行...」

「咁即係好快會追倒佢哋？」我想確認一下。

「好明顯啦！等你仲掛住攪嘢...」芷蕾還是冷冷的對我說。

「照我睇，大概仲有個幾鐘就會到...」Keith 向我示意著，「時間無多，你哋都係食啲嘢先，我哋邊食邊講。」



於是我們便享用著，一早已經放好在枱上的食物，然後聆聽 Keith 與芷蕾提出的作戰計劃。

「隻貨船都好大隻吓，所以我哋喺船尾上船之後，最好兵分兩路，盡快搵返華叔佢哋出嚟...」Keith 首先說道。

「由於唔知道佢哋突然喺海中心停低嘅原因，所以如果有啲突發嘅嘢發生咗，就盡量用對講機通知另一 team 人。」芷蕾亦開口說道。

「我會自己帶一 team 人從船嘅左則出發，而芷蕾就會帶另一 team，大家有冇異議？」Keith 問道。

船艙內鴉雀無聲，好像沒有人對將要面對的事情有所覺悟。

「咁大家冇異議嘅話，而家就開始分隊...」Keith 向各人示意道，「大佬、素恩同芷蕾一隊，而芷晴、Daphney 同 Dickson 就跟我一齊出發...」

我明白，在眼前有限的人手下，Keith 這樣安排已經儘可能平衡兩隊的戰力。

「不過 Dickson，問題係你有冇打算同我哋一齊冒險...」Keith 打探著。



「Okay，I am fine！」Dickson 爽快地答應，「橫掂你哋走曬，我喺度都唔會有咩可以做，不如同你哋一齊啦！」

我留意著他的神情，好像有意讓 Daphney 明白，他這樣做主要是為了她。

「Okay，咁大家冇乜問題，就收拾好準備出發...」Keith 總結道，「上到船後唔知會點，總之一切小心...」

「Keith...」久未開腔的芷晴，忽然提出發問，「我想問，出面嗰兩個人點呀？」

是的，我亦差不多把他們二人忘記...

「大佬，你點睇？」Keith 向我問道。

這的確是個頭痛的問題。



「留佢哋喺度，有太多不確定性，但係帶埋佢哋又好似係一個負累...」我實在拿不定主意，「你哋有冇好提議？」

船艙內的人互相對望，好像沒有多大的意見。

「不如比佢哋跟埋我哋一齊囉～」芷晴提議道。

「但係佢哋手無寸鐵，到時又要救人，又要顧住佢哋，我驚我哋理唔倒咁多嘢喎！」Daphney 亦說出她的意見。

「不過呢隻船係我哋唯一嘅退路，如果佢哋揸走隻船，我哋如果想走都冇得走...」Dickson 也參與討論。

「我都同意你嘅講法，但係應該點樣處置佢哋呢？」我贊同 Dickson 的說法，但真正傷腦筋的，是妥善處理他們的方法。

「唔... 咁不如殺咗佢哋兩個，跟住揼佢哋落海啦！」

大家立刻停下討論，互相對望。



我也實在想不到，Dickson 竟提出這樣冷血的做法。

「哈哈！睇吓你哋，嚇到呆曬...」Dickson 急忙打完場道，「我講吓笑之嘛，唔通無啦啦殺咗佢哋咩～」

我不知道 Dickson 的說話是否出於其本意，但他有這樣的想法，令我覺得也要對他小心提防...