［人性/有甜］- 屍•家•馬鞍山（隔日更新）: Chapter 370 - 華叔的回歸

芷晴亦感受到我身體的狀況，於是她只著重於身體的清潔，沒有再進一步的行動。

就這樣，我們清潔過後，便倒頭大睡。

由於睡床實在不大，我只有把位置讓給二女，自己則在地上呼呼入睡。

晨曦初現，由於我睡得不是太好，我起來得比她們早。

拋下二女，想立刻關顧一下仍在病床上的 Carey。



始終沒有見過她，完全沒法放下心來。

正打算前去找尋太師，卻在大門附近遇上熟悉的面孔。

「華叔？」我剛巧與返回基地的華叔碰上。

「嗯...」他的反應卻是比我想像中冷淡。

我好奇地打量着他的身後，發現素恩和 Vicky 跟在後面。



素恩首先流露出喜悅的神情，Vicky 亦好像想作出同樣的反應，可是瞬間又被自己壓制住。

在各人之後，還有一個陌生男子。

看著他，有種奇怪的感覺。

而且，為何不見了 Keith？

「你們先跟我來...」還沒法跟他們多談，已經有人把他們帶走。



我想，應該是先要作例行檢查吧！

雖然不捨，但我亦只有多等待一會。

我默默在醫療營外面守候，終於得以跟他們見面。

「華叔、Vicky...」從裡面走出來的，就只有他們兩人。

「素... 素恩呢？」我擔心地問道。

「素恩佢...」Vicky 正要回答，卻被華叔快一步阻止。

「佢哋要同佢做個詳細啲嘅檢查...」華叔冷靜地回答，然後示意我待會再談。

我真的放心不下，但與其盲目亂闖，倒不如先聽取華叔的意見。



於是我們只有一起返回華叔的房屋中。

真不湊巧，原來他就住在我的屋旁。

安頓下來後，華叔便準備把事情道來。

「咯咯咯...」這時，外面傳來了有點急速的敲門聲。

屋內氣氛頓時凝固著，只有華叔不慌不忙地去接應來者。

「華 uncle～ 你哋真係返咗嚟呀？」大門打開，只見 Suki 興奮地叫道，「不過，阿 Keith 呢？」

「入嚟先講吖...」雖然我看不到華叔的表情，但憑他的語氣聽來，答案也不見得好。



但華叔和 Vicky 沒有立刻向我告知 Keith 的狀況，我想他們也都不是太肯定。

Suki 亦被引領到屋內，答案很快揭盅。

「先講咗 Keith 個情況先...」華叔亦急不及待說道，「嗰日我揸車返番去，仲未見佢出番嚟，我唯有膽粗粗入去搵佢。」

「我一路入番去個廢村度搵，但係就鬼影都唔多隻。」

「結果行咗幾個圈都唔見影，唯有返番㗎車上面，喺附近兜吓...」

「兜嚟兜去，都係得過吉...」華叔之後壓低聲音說，「跟住我就去咗體育館嗰邊搵，雖然都係搵唔倒 Keith，不過就比我搵番我個女...」

「之後唯有帶咗佢哋返嚟先。」華叔作出總結。

「我諗佢唔會有事嘅，可能佢想引隻怪物走遠啲先返嚟...」我看到 Suki 擔憂的神情，只有出言安慰。



「你唔洗安慰我喇... 都過咗一日，要返一早返咗啦...」Suki 仍是無法釋懷。

「唔洗咁擔心嘅，佢身手咁好，唔會有事嘅...」Vicky 亦幫忙安慰。

「Vicky... 好耐冇見喇... 擔心死我...」Suki 看到好友 Vicky 後，亦終能把緊鎖的眉頭釋放。

我亦不便打擾二人的重聚，於是我繼續向華叔探問道，「有啲嘢我諗極都諗唔通...」我想儘快找出答案，「究竟我細佬，係忠定奸？」

「咁你又覺得自己係忠、定係奸呢？」華叔反問道。

我沒有預計到他會這樣問，使我一時無法回應。

「你都唔知道，係咪？」華叔好像預期到我的反應，「其實自私啲咁講，同自己有利嘅，咪就係忠㗎囉！」



好像有點道理...

「喺呢個亂世，每個人都為自己打算，對自己冇著數嘅嘢，係唔會有人做...」華叔答道，「就好似呢度咁，你估又真係為咗救人咁簡單？」

我當然也有這樣的懷疑，但看來，華叔應該可以把我的疑難解開...