［人性/有甜］- 屍•家•馬鞍山（隔日更新）: Chapter 349 - 決裂

雖然感覺不爽，但我還是保持警戒地與他們一起前進。

走了一段崎嶇的山林小路，映入我們眼簾的，是一個神秘廢墟。

「喂！好似真係伏伏哋喎～」原本主張全力追擊的 William，亦開始感到有點不妥。

King 示意我們停在廢墟外圍，自己則往前觀察。

我亦環顧四周查看，這裡有著不少呈半倒塌或完全破爛的房屋。看來，眼前是一個廢棄了的村落。



「芷晴、美鈴，你哋過嚟睇吓！」芷蕾正蹲在不遠處的地上，像是發現了一些重要線索。

從我的位置看到，她們發現的，應該是一些因發射後而遺留下來的子彈殼。

「King，地上面有啲子彈殼，係屬於我哋部隊嘅...」芷蕾向 King 說道，「睇嚟，佢哋好有可能入咗去。」

「唔...」King 亦走到她們身邊查看，「不過我頭先睇過吓，入面啲路又爛又窄，又九曲十三彎咁。我哋就咁入去，真係好易會中伏...」

「吓？太師叫得你哋嚟，就知道件事唔易解決啦！」芷蕾看來有點不滿，「你哋唔係諗住咁就走咗去呀嘛？」



「我諗妳要攪清楚幾樣嘢。」King 認真地答道，「第一，我唔同妳哋，太師淨係叫我哋幫手，唔係命令。」

「第二，我冇諗過個環境咁複雜，明刀明槍我都好有信心，但係入面嘅環境，分分鐘喺轉角比人批咗個頭，都未知咩事...」

「第三，我哋唔係唔去，只不過要從長計議。至少，起碼要多啲支援...」

「得嘞得嘞，你哋怕死唔想去，就無謂比十萬個理由出嚟！」芷蕾怒吼著，然後用普通話向二女問道，「芷晴、美鈴，妳們怕不怕？」

「不怕...」二女亦斬釘截鐵地回答道。



「妳哋真係要送死，我都阻止唔倒...」King 冷冷地答道，「不過我睇啲人猿怪雖然叫做有智慧，但都未至於識得扮打輸，誘敵深入。」

「所以我覺得，好大可能有更高智慧嘅怪物指揮佢哋...」King 續說。

「話唔定，可能係 Jacky 添！」King 作出推論，「如果係嘅話，小心唔淨係死咁簡單...」

他的説話，很明顯動搖了她們的決心。

又或者說，她們也實在太清楚，給 Jacky 侵犯後的慘況。

「你唔洗嚇我哋，必要時，我哋會自行了斷！」芷蕾仍故作鎮定地答道。

「唉～ 妳哋要堅持我都冇計，不過妳哋諗吓，佢哋喺樹林都叫有啲優勢，點解淨係得小貓三四隻對付我哋？」King 繼續提出論據。

「好明顯，佢哋有心引我哋入嚟...」King 突然靠向芷蕾問道，「照我睇，之前出事嘅小隊，一定有女隊員喺入面，係咪呀，副隊長？」



芷蕾低頭不語。

「我初頭都覺得奇怪㗎喇，太師又會無啦啦叫埋啲女嚟陪我哋出行動咁荀。而家睇嚟，妳哋係引 boss 出嚟嘅誘餌。」King 自信地分析道。

「不過我都真係佩服妳哋，明知比 Jacky 捉倒嘅下場係乜，妳哋都義無反顧去做，真係要比個 like 妳哋...」King 說得勝起。

三女頓時變得沈默。

「唔好怪我咁長氣，我同妳哋都話曬相識一場，個個又芳華正茂咁，無謂淪為隻怪物嘅肉便器吖！」

「你講咗咁耐，都係唔想同我哋入去啫？」芷蕾看似沒有被說服，「如果個個人都好似你咁，淨係顧住自己嘅生死，咁呢個世界一定好快滅亡！」

「冇錯我哋係隱瞞咗一啲嘢，不過呢樣只係增加咗發現 Jacky 嘅機會。而我哋係佢嘅主要目標，對你哋根本唔會有好大影響...」



「入面失蹤嘅係喺第二度派嚟嘅軍人，雖然你可以話係佢哋職責所在。但你唔可以否認，佢哋就係為咗幫一班原本唔關自己事嘅人，而身陷險境...」

聽著芷蕾的一番話，我們亦頓時變得沈默。

「Okay～ 道理喺妳哋嗰邊...」King 無奈地回應道，「不過，呢樣嘢影響唔倒我嘅決定...」

「至於兄弟們，你哋搏唔搏，自己決定...」King 向我們說道。

William 移向 King 表示支持，剩下仍猶豫不決的我。

「好！既然係咁，我都無謂嘥時間再講...」芷蕾準備出發，「姊妹們，我都唔迫妳哋，去唔去，自己諗...」

「我去！」芷晴義無反顧的舉手決定。

反之，有點失望地看著 King 的美鈴，有點拿不定主意...