［人性/有甜］- 屍•家•馬鞍山（隔日更新）: Chapter 326 - 甲乙丙

好奇心使我們走到了丙區的閘前。

而閘前門衞的一句說話，更令我們對這地方增添一份戒心。

「進去以後，隨身物品要小心看管。特別是你的身份咭，給別人拿去就麻煩喇！」

隨著分隔區域的閘門關上，我們亦自然地提高了戒備。

這一區的人看上去沒有跟乙區有著很大的差別，基本上男女老少都有，這使我更想不到他們是拿著什麼標準去分區。



我們繼續往內走，希望得到多一點的線索。

「喂！肥西，乜你仲未死咩？」一名身型瘦削的男子向 William 叫道。

「大家咁話啦，肥強！」William 口中說的，應該就是面前的男子。

「你應該要改口啦！叫我肥強都唔會有人信。」肥強回應道。

「事 9 爛旦啦，咪係一句...」William 答道，「話時話吖，點解你又會喺度嘅？」



「唉... 真係說來話長...」肥強好像有一個很長的故事，「總知就係喺屋企等到彈盡糧絕，先至俾人回收嚟到呢度啦！」

我想，這也是此地方大多數人的遭遇。

「喂肥西！你啱啱先入嚟㗎，唔多見你嘅？」肥強問道。

「吖... 係，我啱啱先到...」William 答得好像有點猶豫。

「哦～唔怪之得啦！」肥強說道，「不過而家先入嚟，應該會派到你好入囉...」



「唔... 我其實唔係住呢區...」William 尷尬地答道。

「吓？乜仲有次等啲嘅貧民窟咩？」肥強想去嘲笑他，「唔係丁區呀嘛？」

「嘿嘿！唔好意思，係甲區...」William 一幅洋洋得意的樣子。

「你條死窮 L 會分配倒甲區？」肥強覺得不可置信，「乜佢哋冇帶到豬肉佬隨軍咩？所以你條友仔變咗專材？哈哈！」

「你唔好理，總之你就唔恨得咁多...」William 反駁說，「咁你又點解編咗入嚟呢個貧民窟呢？」

「妖我點 9 知喎！我哋比人送咗入嚟，淨係比張身份證佢登記，填啲基本資料，做咗個簡單嘅身體檢查，佢哋就已經分派咗我嚟呢度喇！」肥強無奈地答道。

「咁即係佢哋一早已經安排好曬？」William 答道。

「點 L 知喎！」肥強說得有點氣憤，「可能我唔識切豬肉啩！哈哈！」



「不過同我哋一齊嗰幾個公屋 L，都一樣編咗入嚟呢度。」肥強續說，「總知我都老吹自己住銀湖算...」

「可能唔關事呢！」William 不置可否地答道，「不過我都想知，佢哋以咩標準決定嘅。」

「哈哈！佢哋點分真係唔知，我淨係知啲地方差到不得了！」肥強激憤地叫道，「我情願訓街都冇咁慘！」

肥強忍不住要帶我們到他的住處參觀一下，我們亦樂於見識一下他口中的惡劣環境。

我們走進丙級住房的裡面，只見一望無際的上下格床，整齊地安放在房間的兩旁。

房間的門口設於兩端，分別設有洗手間和沐浴設施。

平心而論，這裡除了缺乏私隱，和由洗手間傳來的陣陣臭味外，環境也不算太惡劣。



當然，這裡亦無法跟甲、乙區的房屋所比美。

不知 William 怎樣想，但我見他亦收起了剛才的臭嘴臉，沒有再多說話。

參觀完畢，我們便告別肥強，繼續往前查看。

丙區的盡頭，便是另一個的軍事區域。但這跟之前見過的軍事區不同，這裡除了那哨站外，四處都烏燈黑火。

苛槍實彈的門衞正用凌厲的眼神看著我們，像要告訴我們不得跨越雷池半步。

好漢不吃眼前虧，亦犯不著多生事端。於是我們便在門衞的跟前，漸漸消失。

「你覺唔覺得有古怪？」我問 William。

「覺又點？唔覺又點？我淨係知閒事莫理啫！」William 答道。



說的也是。

我們根本就說不上朋友或同伴，與他一起冒險絕不明智。

況且，在我仍未攪清楚他們胡蘆裡賣什麼藥時，我亦不好先生事端。

看來一切留待明天，可能會有更多的線索。

我們回程時，特別途經海旁附近。海上泊滿了大大小小的貨船，應該是軍隊運送物資的主要途徑。

不過，為何他們都是使用一些民用貨船，而不是一些軍用的運輸艦？