［人性/有甜］- 屍•家•馬鞍山（隔日更新）: Chapter 322 - 芷晴、芷蕾

我們沿著茂密的山林中往上爬，簡直就是伸手不見五指。

若不是有部隊們的射燈，很難想像他們怎樣前進。

「芷晴姐，可唔可以話我知，你哋點搵倒我㗎？」我向身後的芷晴問道。

「乜嘢姐姐聲呀，我點睇都細過你喎！」芷晴不忿地反駁。

「你嘅行蹤一早比我哋監視住，所以我哋一知道你發生咗意外，就即刻派人搵你。」女人插口答道。



「黑蚊蚊你哋都搵倒？係咪用嗰啲夜視鏡呀？」我追問。

「係！不過為咗你，我哋先要用射燈。」女人冷冷地答道。

走過了一小段山坡，便看到兩部七人車等待著我們，女人示意我們登車。

我被引領到後方的七人車，而在前頭的車上，看似已經坐上了一個熟悉的身影。

那胖子看來也活過來了...



跟我同車的是芷晴，來者不是那冷冰冰的女人，這讓我鬆了一口氣。

透過車內開著的燈，我終於可以窺探一下身邊人的樣貌輪廓。

雖然説不上是大美人，但也可算是清純活潑形的少女。

這令我想起了 Vicky...

她跟素恩一起，現在應該安全吧！



她們任何一個受到傷害，我也不願看到。

只好儘快取得解藥，救回 Carey 後便去尋找她們。

車子终於出發，沿錦英路往西沙路駛去。

「係呢？妳唔似係大陸人喎，啲廣東話講得咁好...」我開始對她打探。

「喂你想溝我呀？我同你唔係好熟咋喎！」芷晴狠狠地拒絕。

「識個朋友啫！」我以退為進，「妳唔想講就算！」

車內頓時一片寂靜。

「其實我係土生土長嘅香港人嚟...」芷晴终於開口，「幾年前爹哋媽咪北上同人攪生意，點知冇幾耐就意外死咗。我哋喺上面淨係得大伯一個親戚，所以我唯有搵佢幫手。」



「好彩大伯都好照顧我，仲叫芷蕾表姐幫我搵份工做吓，輾轉之下就嚟咗呢度...」芷晴說時有一點傷感。

「唔好意思，我唔知道...」我為提到了她的傷心事道歉。

「我 okay 喎，不過表姐唔比我同人講呢啲嘢，你千祈唔好話我講過...」芷晴答道。

「表姐... 係咪頭先個女人？」我想確認一下。

「係！佢叫芷蕾，佢對我好好，好多嘢都係佢教我...」芷晴答道。

「不過妳唔似係做呢啲嘢嘅人喎...」我內心真的是這樣認為。

「唉... 說來話長...」芷晴看似若有所思，「呢啲嘢唔方便講...」



「妳好似唔太願意咁嘅？」我好奇追問。

「唔係！總之你唔好再問啦！」芷晴堅定地要把這話題終結。

車子已經駛到西沙路口，然後赫然發現我們正跟著前車，一起往右轉。

「芷晴，佢哋行錯咗路喎，應該左轉先啱...」我向芷晴叫著。

芷晴往外張望後説，「啱呀！呢度直去咪烏溪沙，再左轉咪入白石囉！」

「白石？！乜唔係去體育館咩？」我感到有點不妥。

「哦！之前發生咗啲事，你要嘅嘢，已經轉移咗過嚟喇！」芷晴從容地答道。

這真的是實情嗎？



事已至此，我亦只得選擇相信。

車子開始往白石方向駛去，四周的守衞開始越見深嚴。

沿途的棄車都已經被清理，取而代之的是由裝甲車輛群築起的哨站。

我們慢慢地穿過一層又一層的防線，他們互相緊扣，看得出是久經訓練的隊伍。

從盛大的軍容看來，看來軍隊重新收復失地，也只是時間問題。

說也奇怪，剛才一直從錦英路過來，也一點都沒有看到怪物的痕跡。看來，軍隊的行動也漸見成效。

終於，我們到達白石高爾夫球場附近。這裡燈火通明，完全沒有受到電力供應中斷的影響。



是後備發電，還是這裡沒有受到停電影響呢？

正想向芷晴詢問，卻已經有人打開車門，要求我落車前進。