［人性/有甜］- 屍•家•馬鞍山（隔日更新）: Chapter 244 - 重返海澄軒

「如果我返去，你哋係咪同我一齊？」我問 Keith。

「原本我都想，不過我好幸苦先等倒信哥肯放返 Suki 比我，我想同佢 settle down 咗先...」Keith 無奈地答道。

「咁你諗住去邊？返屋企？」我問道。

「嗯！都冇其他地方啦！」Keith 說。

「咦，咁你之前有冇返過去？」我乘勢追問。



「幾時先？上次咪同你一齊㗎囉，之後仲一齊去咗恆安添... 不過跟住就同華叔失散咗...」Keith 答道。

「你唔知華叔死咗？之後你又冇返過去馬中屋企？」我再追問。

「吓？華叔死咗？我嗰日同佢哋分頭入屋苑，之後出返嚟好耐都唔見佢哋。我再入去屋苑搵又唔見，跟住我見倒附近有人猿怪出現，咁我唯有走先...」Keith 解釋道。

我對此半信半疑，正打算進一步追問，卻見臣哥已經走了過來，「喂傾咁耐比足面啦，仲唔走！」

「係咪救阿妹呀？我又去！」Venus 繞著我的手不放。



「係呢 Keith，攻警署嗰日有冇見倒一個咁高倒、長頭髮、肥肥哋嘅女仔呀？」我比劃著說。

「捉人呢啲嘢唔係我負責，所以我都唔係太清楚...」Keith 搔著頭說，「不過嗰日我哋都捉咗一啲人返嚟，但係就唔多覺你形容嘅女仔...」

「不過我就唔建議帶埋佢去搵。」Keith 示意著 Venus 説，「我諗你明我講乜啦！」

我想 Keith 的說話亦不無道理，只是我擔心應把 Venus 交託給誰。

我實在不希望另一個 Venci 出現...



「臣哥，可唔可以比多五分鐘我...」我向臣哥要求著。

「嗯...」臣哥沒有正面回應，只是淡淡的走開。

這一刻，我才發覺自己可信的人實在不多。

甚至，連自己的親弟弟也不是令我感到放心的人選。

我只有拖著 Venus 的手，慢慢地走到素恩面前。

「素恩，有件事我想拜託你...」我硬著頭皮問道，「我知我咁要求好唐突，不過，我真係好希望你可以幫我照顧住 Venus 先...」

二人同時展現出不可置信的表情。

「阿 Roy，我唔...」Venus 話音剛起，便已經被我打斷。



「Venus 妳聽我講...」我說道，「我會去搵妳個妹，不過妳要我毫無顧忌咁去，妳就要乖乖哋聽我話...」

Venus 雖然流露出不捨的表情，但還是默默地點頭。

「素恩，我真係希望妳可以幫幫我...」我誠懇地說道，「妳係我唯一信任嘅人...」

「哼... 妳想我幫就緊係咁講啦！」素恩終於也開口回應道，「唔通你冇一刻懷疑過我咩？」

我突然心中一凜，但仍故作鎮定地説，「吓？妳有咩值得我懷疑先？」

「唓！我點知喎！乜妳唔係成日都懷疑我有嘢呃住你㗎咩？」素恩開始咄咄逼人。

「冇... 我淨係想知妳鐘意我多啲定孝信多啲啫？」迫於無奈，我只有問她這個尷尬的問題。



「我冇鐘意過你喎，唔好自作多情...」素恩絕情地答道，「不過我可以應承你睇住佢...」

就好像一盤冷水直往我身上倒，使我尷尬異常。

「但係先旨聲明，我未必保證倒佢嘅安全㗎！」素恩打量著 Venus 説。

「唓！我洗乜佢保護呀！」Venus 搶著說，「放心啦 Roy，我識自己照顧自己...」

交待清楚事情後，我立刻感到如釋重負，放心面對眼前的路。

與 Venus 輕輕吻別，便依約跟臣哥往酒店方向走去。

而 Venus 和素恩她們，亦與 Keith 他們一起返回馬中的家。

有 Keith 和素恩同行，我不是太擔心怪物們的襲擊。



自己內心想著的，是其他東西...

剛才大家都在，所以不便言明，只盼她們自己小心。

臣哥箭步如飛的往前走，完全不擔心我會逃走。

是的，孝信手上的籌碼，根本令我別無選擇。

轉眼間，我們已經走到了酒店門外...