［人性/有甜］- 屍•家•馬鞍山（隔日更新）: Chapter 240 - 不受歡迎的富仔
沒有經歷多大的波折，我們便再次與 Clara 她們滙合。
看來，King 他們還沒有回來。
富仔看到 Vicky 後，便忽然面色一沉。
「你要搵嘅就係呢個衰人？係佢攪到我哋死咗咁多人㗎！係佢害死我老豆㗎！」Vicky 激動地叫道。
雖然這裡的喪屍已被清空，但我還是害怕她的大叫，會引起其他不速之客的注意。
「喂，Vicky 妳冷靜啲先！」Clara 亦知道這樣不妥，「有咩我哋慢慢傾啦！」
「仲傾乜嘢呀！佢害死我老豆喎！總之，有佢冇我！」Vicky 仍是難掩激動。
我完全明白她的感受... 但人是我救的，現在的情景令我有點尷尬。
「做乜攪到我嘅 baby 咁嬲呀？」討厭的 King，偏偏就在這時出現。
他身後還跟著一個熟悉的身影。
「乜係你呀？」另一個可厭的身影出現，「原來就係你做咗我大佬隻狗，哈哈！」
我狠不得立刻打他一身，可是我明白在 King 面前，這樣做簡直是自取其辱。
「細佬你又唔好咁講...」King 冷嘲熱諷道，「我哋拍住一齊啫，唔好話人係狗咁難聽...」
他們一唱一和，根本就有心把我奚落。
「呀！頭先究竟發生咩事？」King 刻意再問。
「我唔要同呢個人一齊！」Vicky 指著富仔，大聲地嚷著。
「哦～係呀？」King 的嘴角流露出半點奸險的笑容，「不過佢係阿 Roy 嘅人嚟㗎喎！呢樣嘢要問番阿 Roy 喎！」
很明顯，他要把責任強加於我身上。
不過，我其實對富仔的去留亦沒有多大的感覺。若大夥兒不同意，我不會強留他在我們的團伙。
我正要開口，卻被 King 快了一步說道，「但係佢話曬都救過阿 Roy，如果冇佢通風報信，佢哋分分鐘死咗喺警署度...」
「嘿嘿！所以我唔覺得阿 Roy 會忘恩負義趕佢走囉！」King 的說話，已經為我關上了讓富仔離開的大門。
「我都知我唔啱，不過我都係一時衝動，冇心㗎！」富仔終於主動回應，然後向著 Vicky 說道，「對唔住呀 Vicky 姐，妳原諒我啦！」
「哼！你而家害死咗我老豆呀！我點原諒你呀！」Vicky 寸步不讓。
情況陷入膠著狀態，看來 King 也會應 Vicky 要求，令富仔離開。
這也好讓我不需左右為難。
「唔... 一係咁啦！」King 看似有所決定，「而家要富仔走，就等於送佢去死。我諗我哋暫時分兩 team 行動，富仔就暫時跟住阿 Roy 先，阿 Roy 負責睇住佢。而 Vicky 就同我哋一齊，咁咪算大家唔同 team，但必要時都可以互相照應囉！」
這個看似節衷的計劃，卻完全是為了他自己的私心而設。
「哼！Clara 姐，我哋走！」Vicky 沒有任何回應，卻已經搶先一步離開。
結果，Vicky、Clara、King，與他的弟弟走在前頭。而除了 Venus 與富仔理所當然地與我一起，強哥亦義氣地跟我同行。
而最意想不到的，是 Kimi 亦自願與我們一起。
King 知悉後亦只是用奇怪的眼神看了她一眼，但不知道是否因我們在現場，他沒有再進一步行動。
相比表兄妹，他們更恰似一雙情侶。
「咁好啦 Roy，就麻煩你負責幫我哋殿後喇！」King 說出一句滿是得體的話，然後便跟了上去。
「跟喺我哋後面啦！跟尾狗！」走在團伙最後的 King 弟弟，再次向我挑釁著。
我忍...
兩隊人再次出發，終於到達恆安馬鐵站附近。舊地重遊，Vicky 想必十分感觸。
可是，我現在無法得知她的情況。
經過一星期的光景，隧道內的屍體都已經開始腐爛。陣陣的惡臭，從行人隧道內飄散出來。
雖然我們都已經習慣了屍臭，但這一次的味道確實比較強烈。
忽然，隧道內傳來動物的吼叫聲。
牠們一唱一和的，好像為數不少。
King 亦聽到這些聲響，回頭用手勢示意我們要把聲浪放低。
我曾經亦想過動物成為喪屍的可能性，而推斷的結果就在眼前。
可是，我真的不希望與牠們相遇...