［人性/有甜］- 屍•家•馬鞍山（隔日更新）: Chapter 237 - 對強哥的疑惑
我們開始搜尋食物和日用品，但貨架上的物資已經近乎清空。
這也難怪，經歷近乎三周的消耗，大部分的貨品都已經被掏空。
我奇怪強哥為何帶領我們走進這地方，因他們理應對附近物資的情況瞭如指掌。
「呢度係佢哋之前搶返嚟嘅，聽講仲殺咗個經理，搶埋條鎖匙...」強哥開始解說，「不過已經過咗咁耐，你見大部分嘅嘢都冇曬...」
「倉入面都仲有啲嘅，應該暫時夠我哋用。」強哥補充道。
於是我們便拿出倉內的食物果腹，過了一會，King 亦拍門進入超市內。
「我帶佢哋遊咗一個圈先返嚟，應該暫時都安全㗎喇！」連體能極佳的他，亦弄得氣喘吁吁，看來戰鬥比想像中辛苦。
「飲枝水，唞吓先！」Vicky 慇勤地遞上清水，盡顯女朋友的關心。
「多謝妳！」King 正假裝往前索吻，卻被 Vicky 輕輕用手推開。
我不想再看著她俩在打情罵俏，於是我走到，正與 Kimi 談天的 Venus 身邊。
「阿 Roy，原來你仲有個細佬㗎，佢... 而家...」Venus 好奇地問，卻又突然覺得有點不妥，所以欲言又止。
「哦... 我都搵緊佢... 不過無乜頭緒...」我不想向她們透露太多。
「係呢 Kimi，喺富寶之後就冇再見，呢兩個禮拜妳去咗邊呀？我仲以為妳...」我好奇地向 Kimi 問道。
「冇呀... 呢兩個禮拜都係呢度住吓、嗰度匿係咁，最後咪去咗大水坑站囉！」Kimi 只是簡單地回應。
我感覺到，她對我存在著很大的戒心。
於是我臨時抽起了一個我原本想問的問題，改口問道，「呀係呢，喺富寶嗰陣妳因乜事唔見咗？有人捉咗妳？」
「富寶？啫係咪同 Eva 姐一齊嗰間百佳嗰度呀？」Kimi 奇怪地問，「不過佢哋好似話嗰度係咩... 錦英喎！」
「唔係呀！富寶喎，保安室嗰度喎！素恩同妳一齊嘅呢！」我提供更多資料給她。
「咩呀？你唔好嚇我喎！」Kimi 感到莫名其妙，「我哋救咗小巴啲人，佢就即刻走咗去，臨走仲叫我自己一個小心啲添！」
我一時說不出話來。
「你喺嗰度見過我？」Kimi 追問。
確實，一切都是來自素恩的口述，我完全沒有見過 Kimi 出現。
到底，發生了什麼事情？
為何素恩要說謊？
我只有淡淡地搖頭，「咁算啦！當我冇問過...」
「不過我有樣嘢想問...」Kimi 壓低聲線問道，「點解你會同咗強哥一齊嘅？」
「佢咁咸濕，你唔怕...」她打量著身旁的 Venus 説。
老實說，我亦不是十分放心，但他一次又一次的幫忙，他又真的好像已經改過自新，我實在不好再懷疑他。
「佢已經改咗好多，而家做返好人...」我説了一句，連自己也覺得可笑的話。
「你自己衡量吓啦！人係你嘅... 不過要男人轉死性，仲要戒咸濕，我覺得可能性低啲囉！」這些話從眼前的小妮子說出，確實有點格格不入。
我望著不遠處的強哥，正與他心目中的女神談笑風生。
「妳會唔會因為 Eva 嘅事，而對佢有偏見呀？」我仍想替他辯護。
「吓！你咁諗我都冇辦法。不過有一次我匿喺利安商場嗰陣，就見到好多全副武裝嘅人衝入嚟，咁我咪同其他人一齊搵地方匿埋囉！」Kimi 回憶著說。
「我好彩搵倒地方匿埋，不過有一個媽媽就冇咁好彩，比佢哋搵倒捉咗出嚟，仲當住佢嗰仔面前比人攪... 之後仲殺死埋過細路，先帶個阿媽走... 我見倒帶頭嗰個，就正正係強哥！」Kimi 續說。
「一個連細路都唔放過嘅人，會突然改過自新？我就唔信囉！所以我琴日見倒佢，我都好驚！」Kimi 反駁道。
其實 Kimi 正正道出了，我曾經懷疑過強哥的問題。但觀乎他近來的表現，他又好像已經誠心改過。
難道，一切都只是他假裝出來的嗎？
沒有辦法，我亦只有盡量小心。
「喂，大家過一過嚟！」King 突然召集著我們。
「上次比考信走甩咗，佢又以為我哋攞咗個公事包，所以我諗佢遲早都會嚟搵我地。既然係咁，倒不如我哋直接殺去佢個大本營，可能反而可以殺佢個措手不及...」King 開始敍述他的計劃，「不過去之前，我哋返一返去海典灣先，睇吓而家變成咩環境。」
休息一會後，我們再次準備出發...