［人性/有甜］- 屍•家•馬鞍山（隔日更新）: Chapter 229 - 海典灣 • 淪陷
我睜開雙眼望去，發現地下的玻璃門已經被打破。
而之前在警署擊敗權哥的高大身影，再次出現在我的面前。
而緊隨其後的，是為數不少的喪屍。
守衞們沿著平台邊的欄栅往地下掃射，可是，喪屍的數量遠遠超過他們可以抵抗的極限。
剛才兩男亦已經到達大門附近，與變異後的 Jacky 戰鬥著，可是身後的喪屍，卻乘機不斷入侵。
門衞竭盡全力地抵抗，但由於人手及裝備不足，喪屍群又不斷增援，他們大多數已經抵擋不住，壯烈犧牲。
轉眼間，喪屍群已經從樓梯跑到平台上面來，守衞們的防線瞬間崩潰。
一些人見狀，甚至拿著武器，率先往反方向逃去。
人們驚慌地走避，Clara 亦帶著我們向另一面出口離開。
「Venus... 我要... 救 Venus...」我實不想棄她而去。
「佢喺阿強度？」Clara 邊走邊問。
「係...」我回答。
「咁唔怕啦，阿強會保護佢！」Clara 回應道。
話雖如此，但我還是不能放心。
「我都係唔放心，妳哋走先！」我向 Clara 説道。
「馮若海！咁你就放心我㗎嗱？」Vicky 終於開口。
「吖... 佢處境危險啲...」其實，我仍不是百分百信任強哥。始終，他最醜惡的一面，仍在我腦內揮之不去。
「你去吖，你返去搵佢就唔好再搵我！」Vicky 作出嚴正聲明。
這實在令我感到兩難。
但我知道，我不能撇下 Venus 不理。
而最重要的，是我不想失去一樣辛苦得來的東西。
「對唔住，我真係唔可以唔理佢... 我應承妳，我會儘快 join 返妳哋...」我向 Vicky 解釋道。
「Clara 姐，我哋走！」Vicky 說罷，已經頭也不回的離開。
既然已經下定決心，我也無謂再糾纏。我立刻轉身，往強哥的住處直奔而去。
身體仍好像有點不聽使喚，甚至出現著幻影，但為了仍在等待著我的 Venus，我不得不硬著頭皮繼續。
喪屍已經充斥在屋苑的各處，我努力在屍群中前進，終於也走到電梯大堂外面。
之前住客們為了方便出入，大門全都被打開。幸好，大堂內並沒有喪屍的蹤影。
我內進後亦立刻把大門關上，希望儘量阻延喪屍入侵的時間。
幾經辛苦，我終於返回強哥家中。
Venus 已經在客廳準備，一看到我返回，便立刻飛撲過來緊緊的把我抱著。
「我都話你唔會揼低我，一定會返番嚟㗎啦！」Venus 激動地叫道。
「唉... 係你叻喇...」強哥説罷，再向我解釋道，「我頭先叫佢走，佢就堅持留喺度，話你一定會返嚟... 我叫極佢都唔聽，我話唔理佢自己走，佢都仲係堅持... 咁我咪留係等一陣囉...」
「強哥，多謝你！」我感到有點羞愧，因為我急著趕回來的原因，其中一樣是我對他的不信任...
「嘿！我本身都諗住走㗎喇，如果你再唔出現，我真係唔鬼理佢！」強哥不屑地答道。
我立刻摟著 Venus 深情擁吻。既是為了安撫她受驚的情緒，更是為了報答他對我的信任。
「喂！你哋咀完未呀？未咀完我就走先㗎喇！」強哥催促道。
我明白事情的輕重，於是我先把兒女私情放下。
「樓下平台全部都係喪屍，我諗要搵個第二條路走...」我向強哥說道。
「唔...」強哥認真地思考著，「我哋可以直接落地下停車場，可能會少啲喪屍...」
「咦？你受咗傷？」強哥打量著我的頸項說，「瘀到咁... 好似好傷咁𡃓！」
他説得沒錯，我的頸，現在仍隱隱作痛...
「哦！冇乜嘢，皮外傷啫！」我不想他們擔心，只有輕輕地帶過，「係呢，我個公事包喺邊度？」
「喺嗰度...」Venus 指著一角落。
我走過去拿起公事包，檢查無恙後便準備離開。
「碰、碰」忽然，整幢大廈發生一下又一下的震動...