［人性/有甜］- 屍•家•馬鞍山（隔日更新）: Chapter 202 - 背叛

我加緊戒備繼續前進，終於在一道閘門前，發現了一個熟悉的身影。

「阿 Dee？」我探頭問道。

「喂～Roy 哥～」阿 Dee 沒精打采地答道。

我打量著阿 Dee，他的腰間被破布包紮著，血水不斷滲出，滴在地上。

原來他便是令喪屍瘋狂的原因。



「喔！我頭先為咗避啲喪屍，爬咗上冷氣槽度。跟住聽到外面冇乜動靜，就諗住落番地啦！點知我肥得滯，卡住咗出唔返嚟。我又唔想就咁卡死咗喺度，咪夾硬用力推自己出嚟囉！點知個人就出倒嚟，條腰就𠝹開咗...」阿 Dee 急不及待解釋道。

「跟住我諗住過去搭𨋢，點知比隻喪屍發現咗我，我咪發曬癲咁走囉，好彩啱啱有部𨋢停喺嗰層，我咪即刻㩒開道門，狗衝入去囉！」阿 Dee 續説。

「咦？咁隻喪屍冇跟住衝入嚟咩？」我有點懷疑。

「吖...」他猶豫了一會，「佢追入嚟之前已經閂咗門...」

「哦...」雖然有點可疑，但我暫時不想深究，因我有更重要的事情擺在眼前。



「你有鎖匙開門？」我示意著面前的閘門説。

「就係冇！」他爽快地答道，「不過，比啲時間我，一定開倒...」

得知這裡的情況後，我便返回升降機，將情況告知阿亮，然後安排大夥兒準備。

那邊箱的拍門聲亦漸見急速，阿 Dee 的血腥味已經吸引了越來越多喪屍的注意。

阿亮亦已經留意到這一點，正用眼神向隊友示意著。



「嘞嘞嘞...」防煙門不斷傳來聲響，看來它快要不勝負荷。

「噹」「OK，攪掂！」閘門應聲彈開，各人立刻跑進裡面。

「咪住！你唔入得！」此時阿亮卻把阿 Dee 逮住，「你自己知自己事。」

阿 Dee 亦明白他的用意，便努力解釋著，「我頭先同 Roy 哥解釋過，條腰係爬冷氣槽嗰陣整傷㗎...」

「嘭」外面傳來破門聲，看來喪屍已經把防煙門擠破。

「入去先講啦！」我把握時機，把阿 Dee 推進閘內後，便回身把閘門關好。

「嘭」發了瘋的喪屍不顧一切的向我們衝過來，卻被厚厚的閘門擋住去路。

「吼～」無奈的喪屍只有從鐵枝間伸出利爪，隔著閘門瘋狂吼叫。



「佢就算入咗嚟，都只可以住喺臭格入面！」阿亮叫道。

雖然有點無奈，但阿亮的擔憂不無道理。若阿 Dee 真的受到感染而異變，我們一夥人的後果將不堪設想。

「阿 Roy 哥，我真係冇嘢㗎喎！」阿 Dee 哀求道。

「我信你... 一係你比個傷口我哋睇吓？」我想這才能證明他的清白。

「你唔信就算！」他聽罷便立刻回頭，逕自走進一羈留倉去。

我們離開相隔著閘門和羈留倉的房間，好讓耳根清淨。

以防萬一，我和阿亮在羈留室內巡視一遍，確保沒有異樣。而正如阿 Dee 所説，大部分的羈留倉都堆滿了貨品。



而當中有四間羈留倉已經被清空，看來這兩星期的使用量確也不少。

而除了那四間空置的羈留倉，其他全部都被鎖上。

看來，我們仍需要阿 Dee 的幫忙。

巡視完畢，我們返回眾人的面前。

「好！為咗方便管理，而家分配你哋住嘅地方。」阿亮清點著人數後説，「計埋我哋三個總共二十個人... 嗰個人要隔離，自己住一間，咁其他人就同我哋六至七個人一間，我哋負責分配！」

「唔洗預我，我同阿 Dee 一間...」為方便監察阿 Dee 的情況，和逃避我曾經與他們定下的協議，我選擇不去和他們住在一起。

阿亮聽罷亦不置可否，只專注於住處的方配，「你哋六個，最埋嗰間！」

「吓... 我可唔可以同阿妹住同一間呀？」一少女問道。



「哦？邊個係你個細妺呀？」阿亮忽然細心地問道。

少女向他示意，阿亮亦同意她們住在一起。「咁妳哋兩個，同妳、妳、四個人就住呢個倉啦！」

少女興奮地與妺妹走進倉內，但此時的她仍沒有料到，自己親自選擇了一條通往地獄的道路。

分配工作完成後，阿亮便安排眾人進入倉中，然後毅然把倉門關上。

我立刻跑過去阻止，可是他已經把兩個倉的倉門都關掉。

「喂，阿亮你做乜呀？我哋冇鎖匙㗎！」我走到他跟前理論，卻冷不防被他用槍指著我的前額。

「同我乖乖地行返入倉，如果唔係我就唔只隊冧你，其他人都唔會有命出番去！」阿亮恐嚇著説。