［人性/有甜］- 屍•家•馬鞍山（隔日更新）: Chapter 181 - 戰前會議

可是，守衞們並沒有帶我到正確的樓層。

於是我立刻與他們確認，「喂兄弟，我之前唔係住呢層㗎喎！」

「啱㗎喇，權哥話今晚你食住自己先，等聽日信哥見完你先決定點喎... 哈哈！」兩人同時在嘲笑著我。

「唔得，我要去見吓我啲朋友！」一陣不安感來襲，於是我想返回升降機乘往目標樓層。

可是，我一轉身便被二人攔住。



「阿 Roy 哥，你都係乖乖哋留喺呢度好啲，無謂令兄弟難做吖！更何況，你咁做對你啲朋友冇乜好處...」一守衞向我說道。

他說得並沒有錯，現在發難，對我相當不利。

我只有乖乖的返回他們安排好的房間，靜靜的過了一夜。

第二天一早，我便前往酒樓準備好。其他的隊員都已經陸續到場，只是孝信仍未有出現。

我看到他們今天的裝備十分輕便，於是便開始與他們打聽。



「吓！乜冇人話你知咩？今日日頭唔會有行動，大家休息到今晚先至出發嘛！」一男子説道。

「呃，係呀... 我之前個任務有啲阻濟，琴晚好夜先返到，冇收倒風喎！」我無奈地答道。

「喔係呀！不過，其實要做啲乜，我哋都唔係太清楚，我諗一陣個 briefing 應該會講多啲啩！」他回應道。

於是我只有靜待孝信的到來... 過了大半個小時，孝信才與他的兩名貼身手下，以及一些小組隊長出現。

「喂兄弟們早晨！」孝信熱情地與大家打起招呼來，「好！基本上我都已經同你哋個阿頭傾過㗎喇！同上次有啲唔同，今次我哋有足夠嘅火力進攻，同埋已經搵倒控制啲喪屍嘅方法。所以今晚大家等啲喪屍做先頭部隊先，跟住我哋班兄弟先至攻入去！」



眾人立刻議論紛紛，只有我完全摸不著頭腦。

我唯有向身邊的隊員們打聽。

「屌，又係嗰啲咩嘢喪屍聯合作戰喎！上次攪到老子我差的連命都冇埋，今次又嚟？」一中年男説道。

「上次我都有兩個 friend 返唔倒嚟... 唉今次實死冇生啦！」另一年青男子説道。

「大家聽我講！」台上再次響起孝信的聲音，「我知上一次作戰失敗，大家都有啲唔好嘅經歷。不過多得大家之前搏命攞返嚟嘅血液樣本，我已經可以完完全全控制倒喪屍嘅走向。」

「而我自己都已經反覆測試過，效果非常理想！等我哋搶倒呢度嘅控制權之後，就可以著手研究量産，到時大家都可以好似我咁擁有不死之身，哈哈！」

不死之身？他該不是認真的吧？

「好！大家同自己個條 team 確認咗任務時間之後，就可以解散，盡情咁放蹤一下。酒店入面嘅所有女人，你哋都可以盡情享用，哈哈！」孝信續説。



「咁如果搵倒信哥啲女，係咪都砌得先？」一口痕男坐在櫈上叫道。

孝信先是面色一沉，然後再次展示出笑容後説道，「大家都係兄弟，冇計嘅！我話可以就可以啦，哈哈！」

「哼，呢條友仔都唔知係咪有心玩嘢，問一個明知冇可能嘅問題。阿大老細啲女一早就收埋曬啦，會比佢搵倒咩！」剛才的中年男説。

「咩呀？除非佢啲女唔喺酒店入面啫，如果唔係，真係比人搵倒，信哥都唔會反口啩？」年青人問道。

「哈哈！年輕人，你真係太年輕了！」中年男不屑地答道，「酒店頂樓你冇咭喺唔會上倒，孝信啲女長期喺上面，你影都見唔倒呀！」

「曾經有人想行樓梯上去，結果之後冇再出現。我諗頭先個口痕友，就算今晚好彩返倒嚟，佢都唔會過倒聽日囉！」另一人亦加入討論。

「可能佢就係知道自己冇乜機會返嚟，所以先盡地一舖咁講啩！」年青人説道。



孝信的説話令我感到不安，因 Carey 她們很大可能不在頂層的房間中。若果不幸被他們找到，後果將不堪設想。

於是我離開正在散去的人群，毅然走到孝信面前。

孝信看到我後，便吩咐兩面貼身手下先行離開，然後笑著走過來。

「喂，兄弟！我仲未得閒搵你添！」孝信向我説道，「不過阿權已經同我講咗關於阿強嘅事，good job！」

聽他這樣説後，我終於也鬆了一口氣。因為我的大話並沒有被揭穿。

因此我更鼓起勇氣，向他提及剛才的事。

「孝信哥，你頭先咪話比佢哋放蹤吓嘅，咁我啲朋友～」我問道。

「呢層你可以放心，我已經安排咗佢哋喺一個其他人唔會搵倒嘅地方，哈哈！」孝信笑說道。



「咁，我可唔可以去見下佢哋？」我還是不太放心。

「吖... 暫時未得住，我要同你傾吓今晚個任務先...」孝信把我的要求拒絕...