［人性/有甜］- 屍•家•馬鞍山（隔日更新）: Chapter 175 - 強哥的另一面

「其實，你係咪好憎我？一定要我死？」強哥這突如其來的問題，使我再次產生了戒心。

我沒有立刻回答，因我確實也沒有一個確切的答案。

「我知我傷害過你啲朋友，但係大家都係男人... 有啲嘢，你都應該明嘅！」面對目無表情的我，強哥只有努力地向我遊説著。

其實，我和強哥又有多大的分別？只是可能我比較幸福罷了。

那我不斷追擊著他，是否也只是為了自己的解脱？



「嗯... 之前我覺得你大奸大惡，又捉走咗 Vicky，我先想對付你啫！不過而家發現咗係一場誤會，我都冇乜嘢啦！」我向他説明我的立場。

「不過嗰日你見倒我攪嗰個女仔，有機會就替我同佢講對唔住啦... 我知你救咗佢，不過唔知你信唔信啦，嗰日我都算幫咗你一把㗎，如果唔係，成個商場又點會無啦啦冇曬電先？」強哥説道。

我對他的話感到十分驚訝，「咪住先，你話係你 cut 咗商場啲電，你肯定冇吹水？」

「我做乜要呃你呀？係我自己忍住痛跑去閂大制㗎！不過嗰陣當然唔係為咗你啦！我知道熄曬啲燈，大家都易走啲！不過我走咗出嚟之後，都有留意你哋有冇走到，可惜淨係得兩個女仔走得返出嚟...」強哥續説。

這跟我當初所想的完全不一樣...



「咁之後我哋打傷你啲人，搶走埋㗎車，又係咪你特登放生我哋？」我好奇問。

「嘿嘿！咁又唔好諗到我咁偉大... 嗰陣嘅我純粹係唔想節外生枝啫，所以先由得你哋走。不過我都大致估倒係你哋㗎喇！」強哥沾沾自喜地答道。

「其實我一直都想問，點解孝信佢哋有咁多裝備同物資嘅？佢啲嘢真係好似源源不絕咁。」我再問道。

「其實我都覺得奇怪，所以都同啲手足打探過，不過每個人講嘅都有啲唔同。較為可信嘅，係話佢原本屬於北韓嘅間諜，不過後來佢偷偷哋自立門戶，利用啲物資招兵買馬，好似想做土皇帝咁。」

「不過女神就話佢係南韓派出嚟嘅反間諜，好似話背後有重大嘅陰謀。不過，詳情就要自己問佢喇，因為佢都唔多願講比我聽...」強哥解釋道。



「咁你係咪打算一直留喺呢度？」我想打探他的去向。

「嘿嘿！你都知我已經喺呢度搵倒人生目標啦！總之女神去邊，我就去邊...」強哥甜絲絲的答道。

他見我沒有反應，於是再向我説道，「點呀，煩緊點交差哩？咁啦，見你始終都冇落手殺我，我比樣嘢你去交差啦！」

強哥説著把手上的名貴手錶脱下，「嗱！你拎呢樣嘢返去啦，隻錶係我啱啱加入孝信嗰陣，佢親手送比我嘅，所以佢應該認得。你就拎住佢話已經解決咗我啦！」

「唔該曬你...」我雖然感謝強哥的幫忙，但當我想到真正的難關現在才開始，面上亦難掩失落之情。

「喂兄弟，做乜仲咁愁呀？」強哥看著我道，「係咪唔知點救佢哋出番嚟呢？」

我慢慢地點頭示意。

「嗱，方法就唔係冇，不過唔知你肯唔肯做啫。」強哥答道。



「去搵 Clara 幫手？」我回應道。

「嘩！醒目仔喎，其實你一早知㗎啦，只不過唔知點開口啫！洗唔洗兄弟我幫你問呀？」強哥盛意拳拳地問道。

我猶豫了一會，終於有所決定。

「我都係決定自己返去喇，我唔想比人睇死，自己嘅問題自己解決！」我説得嚴正嚴詞。

「唔... 點都好啦，兄弟我支持你，你自己都小心啲...」強哥叮囑著我。

我們再閒聊一會後便打算返回，之後我們亦在升降機外閒談了幾句。

「你諗住幾時出發呀？」強哥問道。



「我諗住收拾一下就走，夜晚行動都易啲。」我回應道。

「嗱！比番你！」強哥把我的軍刀遞給我，「佢哋管啲槍械管得都好嚴，我哋都只係執勤時先可以佩槍，所以我鼠唔番你知槍返嚟。不過有呢把嘢都好過冇啦！」

「多謝你！」此時升降機亦已到達目的地，強哥與我相擁一下後，便關門離開。

「吖！差啲唔記得同你講...」升降機門再次被打開，「任何同孝信喺埋一齊嘅女人，你都千祈唔好信！佢哋就好似撞咗邪咁，原原全全聽曬孝信嘅説話，就好似嗰個 Karen 咁...」

「咁，素恩呢？」我焦急地問道。

「佢就更加要小心啦！」強哥用疑惑的眼神看著我，「你唔係又鐘意咗佢呀嘛？唉... 咁你自求多福喇！」

我呆立不語。

「兄弟，我真係走喇，你自己小心啲啦！」強哥説罷便關門離去。



得知這不安訊息的我，亦只能若有所思的返回屋中...